‘ഇനി മുതൽ അനശ്വരയുടെ ഫോണിന് വിശ്രമം ഉണ്ടാകില്ല’; രാംചരൺ

മലയാളത്തിന് ഒരുപിടി മികച്ച സിനിമകൾ സമ്മാനിച്ച താരമാണ് അനശ്വര രാജൻ. ‘ഉദാഹരണം സുജാത’ എന്ന ചിത്രത്തിലൂടെ ആണ് താരം അഭിനയജീവിതത്തിലേക്ക് കടന്നത്. തുടർന്ന് നിരവധി ഹിറ്റ് ചിത്രങ്ങളുടെ ഭാഗമാകാൻ നടിക്ക് സാധിച്ചു. ഇപ്പോഴിതാ ചാംപ്യൻ എന്ന ചിത്രത്തിലൂടെ തെലുങ്കിൽ അരങ്ങേറാനൊരുങ്ങുകയാണ് അനശ്വര രാജൻ.

ഈ മാസം 25-ന് തിയേറ്ററുകളിലെത്തുന്ന ചിത്രത്തിന്റെ ഓഡിയോ ലോഞ്ച് കഴി‍ഞ്ഞദിവസം ഹൈദരാബാദിൽ നടന്നിരുന്നു. ഈ വേദിയിൽവെച്ച് നടൻ രാംചരൺ തേജ അനശ്വരയെക്കുറിച്ച് പറഞ്ഞ വാക്കുകളാണിപ്പോൾ സോഷ്യൽ മീഡിയയിലെ സംസാരം. ചാംപ്യൻ റിലീസാവുന്നതോടെ അനശ്വരയ്ക്ക് തെലുങ്കിൽ തിരക്കേറാൻ സാധ്യതയുണ്ടെന്നും രാംചരൺ പറഞ്ഞു.

"#AnaswaraRajan, you're going to get many phone calls from the BEST PRODUCTION and the best directors.

Be ready for that.. I think you'll have a great future in Indian film industry."

– #RamCharan | #Champion pic.twitter.com/D1QNdNn52y

— Whynot Cinemas (@whynotcinemass_) December 18, 2025

മാതൃഭാഷ മലയാളമായിട്ടും അനശ്വര തെലുങ്ക് പഠിച്ച് സിനിമയ്ക്ക് വേണ്ടി ഡബ്ബ് ചെയ്തത് മതിപ്പുളവാക്കുന്ന കാര്യമാണെന്ന് രാംചരൺ തേജ പറഞ്ഞു. അനശ്വരയുടെ മുഖത്ത് വല്ലാത്തൊരു തിളക്കമുണ്ട്. ആർക്കും ഇഷ്ടം തോന്നുന്ന പ്രകടനമാണ് അനശ്വരയുടേതെന്നും അദ്ദേഹം അഭിപ്രായപ്പെട്ടു.

“അനശ്വര രാജനെ കുറിച്ച് പ്രത്യേകം പറയേണ്ടിയിരിക്കുന്നു. രണ്ട് കാര്യങ്ങൾ നിങ്ങളോട് തീർച്ചയായും പറയണം. ഒന്നാമത്തെ കാര്യം, ഈ സിനിമയ്ക്ക് ശേഷം നിങ്ങൾക്ക് ഒരുപാട് വലിയ സിനിമകളുടെ കോളുകൾ വന്നുകൊണ്ടേയിരിക്കും. ഏറ്റവും മികച്ച പ്രൊഡക്ഷൻ ഹൗസും, ഏറ്റവും മികച്ച സംവിധായകനും നിങ്ങളെ വിളിക്കും, അതിന് വേണ്ടി തയ്യാറായിരുന്നോളൂ. അപ്രോച്ചബ്ൾ ആയിട്ടുള്ള, ലൈക്കബിൾ ആയിട്ടുള്ള പെർഫോമൻസാണ് താങ്കളുടേത്. ഇന്ത്യൻ സിനിമ ഇൻഡസ്ട്രിയിൽ നിങ്ങൾക്ക് വളരെ വലിയൊരു ഭാവിയുണ്ട് എന്ന് എനിക്ക് തോന്നുന്നു.” രാംചരണിന്റെ വാക്കുകൾ.

സ്വന്തം മാതൃഭാഷ മലയാളമായിട്ടും തെലുങ്ക് പഠിച്ച്, മനസ്സിലാക്കി കഥാപാത്രത്തിന് വേണ്ടി അനശ്വര തന്നെയാണ് ഡബ്ബ് ചെയ്തതെന്ന് രാംചരൺ എടുത്തുപറഞ്ഞു. തന്റെ ജോലിയിൽ അനശ്വര എത്രത്തോളം സ്വയം സമർപ്പിച്ചിരിക്കുന്നുവെന്ന് ഇതിലൂടെ വ്യക്തമാണ്. ഈ കാലത്ത് എത്ര നായികമാർ അങ്ങനെയുണ്ട് എന്ന് അറിയില്ല. അതുകൊണ്ടു തന്നെ നിങ്ങളുടെ ഡെഡിക്കേഷനിലും പാഷനിലും താൻ അത്രയധികം ഇംപ്രസ് ആയിരിക്കുന്നു. എല്ലാവിധ ഭാവുകങ്ങളും നേരുന്നുവെന്നും രാം ചരൺ പറഞ്ഞു.

മഹാനടിയുടേയും കൽക്കിയുടേയും സംവിധായകനായ നാഗ് അശ്വിനും അനശ്വരയെ അഭിനന്ദിച്ചുകൊണ്ട് സംസാരിച്ചു. “അനശ്വര, ഞാൻ നിങ്ങളുടെ ഫാൻ ആണ്. ഈ സിനിമ റിലീസ് ചെയ്തു കഴിഞ്ഞാൽ നിങ്ങൾ പലരുടേയും പ്രിയപ്പെട്ടവളായി മാറും. ഇതുപോലെയുള്ള സിനിമകളുമായി മുന്നോട്ട് പോകുക”,നാഗ് അശ്വിൻ പറഞ്ഞു.

ദേശീയ പുരസ്കാര ജേതാവായ പ്രദീപ് അദ്വൈതം സംവിധാനം ചെയ്യുന്ന പിരീഡ് സ്പോർട്സ് ഡ്രാമയാണ് ചാംപ്യൻ. സ്വപ്ന സിനിമാസ്, ആനന്ദി ആർട്ട് ക്രിയേഷൻസ്, കൺസെപ്റ്റ് ഫിലിംസ്, സീ സ്റ്റുഡിയോസ് എന്നിവർ സംയുക്തമായി നിർമ്മിക്കുന്ന ചിത്രം കൂടിയാണിത്. റോഷൻ മേകയാണ് ചിത്രത്തിൽ നായകനാകുന്നത്.