അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.അഖിൽ സത്യൻ സംവിധാനം ചെയ്ത് നിവിൻ പോളി നായകനായ ‘സർവം മായ’ മികച്ച പ്രേക്ഷക പ്രതികരണങ്ങളോടെ തിയേറ്ററുകളിൽ പ്രദർശനം തുടരുകയാണ്. റിലീസ് ചെയ്തതു മുതൽ തന്നെ സിനിമയ്ക്ക് ലഭിക്കുന്ന സ്വീകാര്യത അതിശയിപ്പിക്കുന്നതാണ്.
സാധാരണ പ്രേക്ഷകർക്ക് പുറമെ മലയാള സിനിമാ മേഖലയിലെ പ്രമുഖരും ചിത്രം കണ്ടിറങ്ങിയ ശേഷം പ്രശംസയുമായി രംഗത്തെത്തിയിട്ടുണ്ട്. ബേസിൽ ജോസഫ്, അനുരാജ് മനോഹർ, ആനന്ദ് ഏകർഷി, ദേവദത്ത് ഷാജി, അൽത്താഫ് സലിം തുടങ്ങിയവർ സിനിമയ്ക്ക് വൻ പിന്തുണയാണ് നൽകുന്നത്.
പ്രശസ്ത സംവിധായകൻ അനുരാജ് മനോഹർ ‘സർവം മായ’യെ വിശേഷിപ്പിച്ചത് “നനുത്ത കാറ്റ് പോലെ വന്ന് നമ്മുടെ ഹൃദയത്തിൽ തൊടുന്ന സിനിമ” എന്നാണ്. അഖിൽ സത്യന്റെ മുൻ ചിത്രം ‘പാച്ചുവും അത്ഭുതവിളക്കും’ നൽകിയ പ്രതീക്ഷയോടെയാണ് താൻ ടിക്കറ്റെടുത്തതെന്നും അദ്ദേഹം പറഞ്ഞു.
നിവിൻ പോളിയുടെ സ്വാഭാവികമായ അഭിനയത്തെയും ഹാസ്യം കൈകാര്യം ചെയ്യാനുള്ള അസാധ്യ പാടവത്തെയും സംവിധായകൻ കൃത്യമായി ഉപയോഗിച്ചു. നിവിൻ-അജു വർഗ്ഗീസ് കോമ്പിനേഷൻ രംഗങ്ങൾ സിനിമയുടെ ആകർഷണീയത വർദ്ധിപ്പിച്ചു. നായിക റിയാ ഷിബുവിന്റെ പ്രകടനത്തെയും അനുരാജ് മനോഹർ അഭിനന്ദിച്ചു.
സംവിധായകൻ ആനന്ദ് ഏകർഷിയുടെ അഭിപ്രായത്തിൽ, “ലളിതവും സത്യസന്ധവുമായ ആലിംഗനമാണ് ‘സർവം മായ’,” ഇത് മലയാള സിനിമയ്ക്ക് കുറച്ചുകാലമായി നഷ്ടപ്പെട്ട ഒരു ഘടകമാണെന്ന് അദ്ദേഹം ചൂണ്ടിക്കാട്ടി.
ലളിതമായും സന്തോഷകരമായും രസകരമായും ഒരേസമയം നിലകൊള്ളുക എന്നത് എളുപ്പമല്ലെന്നും, അഖിൽ സത്യൻ അത് ഇളംകാറ്റുപോലെ നേടിയെടുത്തെന്നും അദ്ദേഹം അഭിപ്രായപ്പെട്ടു. നിവിന്റെ സ്ക്രീനിലെ ആകർഷണീയത അവിശ്വസനീയമാണെന്നും, എന്നാൽ യഥാർത്ഥ അദ്ഭുതം റിയ ഷിബുവിന്റെതായിരുന്നുവെന്നും അദ്ദേഹം കൂട്ടിച്ചേർത്തു.
’സർവം മായ’ കണ്ടിറങ്ങിയ ശേഷം ബേസിൽ ജോസഫ് വലിയ പുഞ്ചിരിയോടെയാണ് പ്രതികരിച്ചത്. “നിവിൻ തന്റെ കഴിവിന്റെ പരമാവധി അനായാസമായി ചെയ്യുന്നത് കാണുമ്പോൾ സന്തോഷം തോന്നുന്നു,” എന്ന് അദ്ദേഹം പറഞ്ഞു. അജു വർഗ്ഗീസിന്റെ കഥാപാത്ര അവതരണവും റിയയുടെ പ്രകടനവും കുറ്റമറ്റതായിരുന്നു.
ഈ ക്രിസ്മസിനെ ഊഷ്മളമാക്കിയതിന് ടീമിന് നന്ദി പറഞ്ഞ ബേസിൽ, സംഗീത സംവിധായകൻ ജസ്റ്റിൻ പ്രഭാകരന്റെ സംഭാവനകളെ പ്രത്യേകം അഭിനന്ദിക്കുകയും ചെയ്തു. ഇത്തരം ലളിതവും ആനന്ദകരവുമായ സിനിമകളാണ് നമുക്ക് കൂടുതൽ ആവശ്യമെന്നും അദ്ദേഹം വ്യക്തമാക്കി.
സംവിധായകനും തിരക്കഥാകൃത്തുമായ ദേവദത്ത് ഷാജി ചിത്രത്തെ “ക്രൗഡ് പുള്ളർ, എന്റർടെയ്നർ ഗെയിമിലേക്കുള്ള തിരിച്ചുവരവ്” എന്ന് വിശേഷിപ്പിച്ചു. “അടിച്ചു അണ്ണാ ബ്ലോക്ക്ബസ്റ്റർ” എന്നായിരുന്നു അദ്ദേഹത്തിന്റെ പ്രതികരണം. മികച്ച ടീമുകൾ സൗഹൃദത്തിൽനിന്നാണ് ഉണ്ടാകുന്നതെന്നതിന്റെ തെളിവാണ് ഈ ചിത്രമെന്ന് അൽത്താഫ് സലിം അഭിപ്രായപ്പെട്ടു.
നിവിൻ പോളിക്കും റിയാ ഷിബുവിനും ഒപ്പം ജനാർദ്ദനൻ, രഘുനാഥ് പലേരി, മധു വാര്യർ, അൽത്താഫ് സലിം, പ്രീതി മുകുന്ദൻ തുടങ്ങിയ വലിയൊരു താരനിരയും ചിത്രത്തിൽ അണിനിരക്കുന്നുണ്ട്.
നിർമ്മാണം ഫയർഫ്ളൈ ഫിലിംസിന്റെ ബാനറിൽ അജയ്യ കുമാർ, രാജീവ് മേനോൻ എന്നിവരാണ് ചിത്രം നിർമ്മിച്ചിരിക്കുന്നത്. ഇതിന്റെ
എഡിറ്റിംഗ് അഖിൽ സത്യൻ, രതിൻ രാധാകൃഷ്ണൻ, സിനിമറ്റോഗ്രാഫി ശരൺ വേലായുധൻ എന്നിവരാണ്.
