“ഇനി ഞാനില്ല പക്ഷെ, എന്നിലൂടെ അവര്‍ ആ അഞ്ചുപേര്‍ ഉണ്ടാകും ഈ ഭൂമിയില്‍”: എന്ന് അയോന മോന്‍സണ്‍

മനോഹരമായ ഈ ഭൂമിയിലെ ജീവിതം അവസാനിപ്പിച്ചു പോകാന്‍ അത്രമേല്‍ വിഷമമാണ് ഓരോ മനുഷ്യര്‍ക്കും. പക്ഷെ, അപ്രതീക്ഷിത അപകടങ്ങള്‍ കാലന്റെ രൂപത്തിലെത്തുമ്പോള്‍ മരണത്തിനൊപ്പം പോകാതെ വയ്യെന്ന് വിധിയും. പെട്ടെന്നൊരു സുപ്രഭാതത്തില്‍ ഭൂമി ഉപേക്ഷിച്ചു പോകുമ്പോള്‍ അവര്‍ പറയുന്നുണ്ടാകും, ജീവിക്കാന്‍ മോഹിക്കുന്ന ആരെങ്കിലുമുണ്ടെങ്കില്‍ അവര്‍ക്ക് പകര്‍ന്നു നല്‍കാന്‍ എന്നിലെന്തെങ്കിലും ഉണ്ടെങ്കില്‍ തരാമെന്ന്. അങ്ങനെയൊരു അതിമനോഹരിയായ ഒരു പെണ്‍കുട്ടി അപകടത്തില്‍ മരണപ്പെട്ടിരിക്കുന്നു. കെട്ടിടത്തില്‍ നിന്ന് വീണ് മസ്തിഷ്‌ക മരണം സംഭവിച്ച കണ്ണൂര്‍ പയ്യാവൂര്‍ സേക്രഡ് ഹാര്‍ട്ട് ഹയര്‍ സെക്കന്‍ഡറി സ്‌കൂളിലെ വിദ്യാര്‍ത്ഥി അയോന മോന്‍സണ്‍ (17 വയസ്). ചിറകു വിരിച്ചു പറന്നു തുടങ്ങു മുമ്പേ മടങ്ങേണ്ടി വന്നള്‍.

പക്ഷെ, അവളുടെ ആത്മാവ് പറയുന്നതു പോലെ തോന്നുന്നുണ്ട് ഈ വാക്കുകള്‍ ‘ ഇനി ഞാനില്ല പക്ഷെ, എന്നിലൂടെ ആ അഞ്ചുപേരുണ്ടാകും ഈ ഭൂമിയില്‍’ എന്ന്. ശരിയാണ്, അവള്‍ ദാനം നല്‍കിയ അവലുടെ അവയവങ്ങള്‍ കൊണ്ട് അഞ്ചുപേര്‍ക്ക് ജീവനും ജീവിതവും നല്‍കിയാണ് ആ പതിനേഴുകാരിയുടെ യാത്ര. നിശ്ചയമായും ദൈവത്തിന്റെ വലതു വശത്തു തന്നെയാകും അവള്‍ എത്തുക. നിനക്ക് നിത്യശാന്തി ലഭിക്കട്ടെ. അയോന മോന്‍സണ്‍, നിന്നെ മറക്കാനാവില്ല. ഈ ഭൂമിയില്‍ തന്റെ ശരീരം കൊണ്ട് ജീവന്‍ നല്‍കി അടയാളപ്പെടുത്തി പോയിട്ടുള്ള എത്രയോ മനുഷ്യരുണ്ട്. അവര്‍ക്കൊപ്പം എന്നും നമ്മുടെ മനസ്സില്‍ നീ ഉണ്ടാകുമെന്നു തീര്‍ച്ച. ഈ അഞ്ചുപേരിലൂടെയും ലോകം നിന്നെ കാണും. ഈ അഞ്ചു പേരിലൂടെയും നിനക്ക് മരണമില്ലാതെ ജീവിക്കാം.

മരണത്തിലും ജീവന്റെ തണലായി മാറിയ അയോനയുടെ വൃക്ക വിമാനമാര്‍ഗം തിരുവനന്തപുരം മെഡിക്കല്‍ കോളേജില്‍ എത്തിച്ചു. ചരിത്രത്തിലാദ്യമായി അവയവം ഒരു ജില്ലയില്‍ നിന്ന് മറ്റൊരിടത്തേക്ക് കൊമേഴ്‌സ്യല്‍ വിമാനത്തില്‍ എത്തിച്ചു എന്ന പ്രത്യേകതയും ഈ അവയവ ദാനത്തിനുണ്ട്. കണ്ണൂരില്‍ നിന്ന് തിരുവനന്തപുരത്തേക്കുള്ള ദൂരക്കൂടുതല്‍ പരിഗണിച്ച് കൃത്യ സമയത്തിനുള്ളില്‍ വൃക്ക എത്തിക്കാനാണ് വിമാനമാര്‍ഗം എത്തിക്കാന്‍ തീരുമാനിച്ചത്. ഇന്‍ഡിഗോയുടെ വിമാനത്തിലാണ് വൃക്ക എത്തിച്ചത്. രാവിലെ 10.42ന് വൃക്ക തിരുവനന്തപുരം എയര്‍പോര്‍ട്ടിലും 11ന് സര്‍ക്കാര്‍ മെഡിക്കല്‍ കോളേജിലും എത്തിച്ചു.

കണ്ണൂര്‍, കൊശവന്‍വയല്‍, കട്ടിയാങ്കല്‍ വീട്ടില്‍ അയോനയുടെ രണ്ട് വൃക്കകള്‍, കരള്‍, രണ്ട് നേത്രപടലങ്ങള്‍ എന്നിവയാണ് ദാനം ചെയ്തത്. ഒരു വൃക്ക കോഴിക്കോട് ആസ്റ്റര്‍ മിംസ് ആശുപത്രിയിലെ രോഗിയ്ക്കും കരള്‍ കോഴിക്കോട് മേയ്ത്ര ആശുപത്രിയിലെ രോഗിയ്ക്കും രണ്ട് നേത്രപടലങ്ങള്‍ തലശ്ശേരി ജില്ലാ ആശുപത്രിയിലെ രോഗികള്‍ക്കുമാണ് നല്‍കിയത്. വേര്‍പാടിന്റെ വേദനയിലും മറ്റുള്ളവരുടെ ജീവിതത്തിന് വെളിച്ചമേകാന്‍ അയോനയുടെ കുടുംബം എടുത്ത തീരുമാനത്തിന് ആരോഗ്യ വകുപ്പ് മന്ത്രി വീണാ ജോര്‍ജ് നന്ദി പറഞ്ഞു. കുടുംബത്തിന്റെ ദു:ഖത്തില്‍ പങ്കുചേരുന്നുവെന്നും മന്ത്രി പറഞ്ഞു.
കണ്ണൂര്‍ പയ്യാവൂര്‍ സേക്രഡ് ഹാര്‍ട്ട് ഹയര്‍ സെക്കന്‍ഡറി സ്‌കൂളിലെ പ്ലസ് ടു വിദ്യാര്‍ത്ഥി ആയിരുന്ന അയോണ മോണ്‍സണ്‍ ജനുവരി 12ന് രാവിലെ 8.15ന്‌സ്‌കൂളിന്റെ കെട്ടിടത്തിന്റെ മുകള്‍ നിലയില്‍ നിന്ന് താഴേക്ക് വീഴുകയായിരുന്നു.

ഗുരുതരമായി പരിക്കേറ്റ അയോനയെ പയ്യാവൂര്‍ ആശുപത്രിയിലും തുടര്‍ന്ന് കണ്ണൂര്‍ ആസ്റ്റര്‍ മിംസ് ആശുപത്രിയിലും പ്രവേശിപ്പിക്കുകയായിരുന്നു. ജനുവരി 14ന് മസ്തിഷ്‌കമരണം സംഭവിച്ചതിനെ തുടര്‍ന്ന് കുടുംബാംഗങ്ങള്‍ അവയവം ദാനം ചെയ്യാന്‍ സമ്മതം നല്‍കുകയായിരുന്നു. അച്ഛന്‍ കെ.എം മോന്‍സണ്‍, അമ്മ: അനിത മോന്‍സണ്‍. മാര്‍ട്ടിന്‍ മോന്‍സണ്‍, എയ്ഞ്ചല്‍ മോന്‍സണ്‍ എന്നിവരാണ് സഹോദരങ്ങള്‍. പോലീസിന്റെ സഹായത്തോടെ ഗ്രീന്‍ കോറിഡോര്‍ ഒരുക്കിയാണ് അവയവം റോഡ് മാര്‍ഗം വേഗത്തിലെത്തിച്ചത്. കെ സോട്ടോയാണ് പ്രവര്‍ത്തനങ്ങള്‍ ഏകോപിപ്പിച്ചത്.

CONTENT HIGH LIGHTS; ‘I’m no longer here, but through me, those five people will be here on earth’: Iona Monson