അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.സംസ്ഥാന ഭാഗ്യക്കുറിയുടെ ക്രിസ്തുമസ് പുതുവത്സര ബമ്പര് ടിക്കറ്റുകള്ക്ക് റെക്കോഡ് വില്പന. ഇതിനകം വില്പന 50 ലക്ഷം കടന്നു. 51,66,810 ടിക്കറ്റുകള് ഇന്ന് ഉച്ചവരെ വിറ്റുകഴിഞ്ഞു. കഴിഞ്ഞ വര്ഷത്തെ ക്രിസ്തുമസ് പുതുവത്സര ബമ്പര് ടിക്കറ്റുകളുടെ വില്പന 47,65,650 ആയിരുന്നു. ഇരുപതു കോടി രൂപ ഒന്നാം സമ്മാനം നല്കുന്ന ക്രിസ്തുമസ് പുതുവത്സര ബമ്പറിന് വന് സ്വീകാര്യതയാണ് ലഭിച്ചത്. നറുക്കെടുപ്പിന് ദിവസങ്ങള് ശേഷിക്കേ ടിക്കറ്റിന് ആവശ്യക്കാര് ഏറിവരികയാണ്. ഇത് കണക്കിലെടുത്ത് അഞ്ച് ലക്ഷം ടിക്കറ്റുകള് കൂടി വിപണിയിലെത്തിച്ചിരുന്നു. ആകെ 55 ലക്ഷം ടിക്കറ്റുകളാണ് അച്ചടിച്ചത്.
ഏറ്റവും കൂടുതല് വില്പന നടന്നത് പാലക്കാട് ജില്ലയിലാണ്. ഇതുവരെ 12,20,520 ടിക്കറ്റുകളാണ് വിറ്റത്. രണ്ടാം സ്ഥാനത്തുള്ള തൃശ്ശൂര് ജില്ലയില് 5,44,340 ടിക്കറ്റുകളാണ് വിറ്റത്. മൂന്നാം സ്ഥാനത്തുള്ള തിരുവനന്തപുരത്ത് 5,15,090 ടിക്കറ്റുകളുടെ വില്പന നടന്നു. കഴിഞ്ഞ തവണ നാലാം സ്ഥാനത്തുണ്ടായിരുന്ന എറണാകുളത്തിനെ അട്ടിമറിച്ച് 3,34,910 ടിക്കറ്റുകള് വിറ്റ കൊല്ലം ജില്ല നാലാം സ്ഥാനത്തും 3,11,780 ടിക്കറ്റുകളുടെ വില്പനയോടെ കണ്ണൂര് ജില്ല അഞ്ചാം സ്ഥാനത്തുമാണ്.
ഒരു കോടി രൂപ വീതം 20 പേര്ക്ക് രണ്ടാം സമ്മാനമായി ലഭിക്കുന്നു.
മൂന്നാം സമ്മാനമായി 10 ലക്ഷം രൂപ വീതം 20 പേര്ക്കും
നാലാം സമ്മാനമായി മൂന്ന് ലക്ഷം രൂപ വിതം 20 പേര്ക്കും
അഞ്ചാം സമ്മാനമായി രണ്ട് ലക്ഷം രൂപ വീതം 20 പേര്ക്കും ലഭിക്കും.
പത്ത് സീരീസുകളിലായുള്ള ടിക്കറ്റില് ബമ്പര് സമ്മാനം ലഭിക്കാതെ പോയ മറ്റ് ഒന്പത് സീരീസിനായി ഒരു ലക്ഷം രൂപ വീതമുള്ള ഒന്പത് സമാശ്വാസ സമ്മാനങ്ങളും ഉണ്ടാകും. കൂടാതെ 5000, 2000, 1000, 500, 400 വീതം രൂപ സമ്മാനങ്ങളും ഉള്പ്പെടെ ആകെ 6,21,990 സമ്മാനങ്ങള് ലഭിക്കുന്നു എന്നതാണ് ക്രിസ്തുമസ്-ന്യൂ ഇയര് ബമ്പറിന്റെ സവിശേഷത. BR 107 നമ്പര് ക്രിസ്തുമസ്- ന്യൂ ഇയര് ബമ്പര് ഭാഗ്യക്കുറി XA, XB, XC, XD, XE, XG, XH, XJ, XK, XL എന്നിങ്ങനെ പത്ത് പരമ്പരകളിലായാണ് ടിക്കറ്റുകള് ലഭ്യമാകുന്നത്. നാനൂറ് രൂപയാണ് ഓരോ ടിക്കറ്റിന്റെയും വില. നറുക്കെടുപ്പ് 2026 ജനുവരി 24 ശനിയാഴ്ച ഉച്ചയ്ക്ക് രണ്ടിന് തിരുവനന്തപുരത്ത് ഗോര്ഖി ഭവനിലെ കേരള സംസ്ഥാന ഭാഗ്യക്കുറിയുടെ നറുക്കെടുപ്പ് വേദിയില് നടക്കും.
CONTENT HIGH LIGHTS; Christmas and New Year bumper tickets sell for record 50 lakhs: Palakkad tops the list with 12,20,520 tickets sold; Draw on 24th
