അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.മലയാള സിനിമയിൽ വീണ്ടുമൊരു മാസ് ആക്ഷൻ തരംഗത്തിന് കളമൊരുക്കി ദുൽഖർ സൽമാൻ ചിത്രം ‘ഐ ആം ഗെയിം’ അണിയറയിൽ ഒരുങ്ങുന്നു. തന്റെ കരിയറിൽ ഏറ്റവും കൂടുതൽ സംതൃപ്തി നൽകിയ പ്രൊജക്റ്റുകളിൽ ഒന്നാണ് ഇതെന്ന് ചിത്രത്തിന്റെ ഛായാഗ്രാഹകൻ ജിംഷി ഖാലിദ് വെളിപ്പെടുത്തി. ‘മൂൺ ഇൻ റെഡ്’ എന്ന ഓൺലൈൻ മാധ്യമത്തിന് നൽകിയ അഭിമുഖത്തിലാണ് അദ്ദേഹം ചിത്രത്തെക്കുറിച്ചുള്ള പ്രതീക്ഷകൾ പങ്കുവെച്ചത്.
’തല്ലുമാല’, ‘ആലപ്പുഴ ജിംഖാന’ തുടങ്ങിയ ചിത്രങ്ങളിലൂടെ ക്യാമറയ്ക്ക് പിന്നിൽ വിസ്മയങ്ങൾ തീർത്ത ജിംഷി ഖാലിദ്, ‘ഐ ആം ഗെയിം’ അമ്പരപ്പിക്കുന്ന രീതിയിലാണ് ഒരുങ്ങുന്നതെന്ന് വ്യക്തമാക്കി. മുൻപ് ചെയ്ത സ്പോർട്സ് പശ്ചാത്തലമുള്ള ചിത്രങ്ങളെക്കാൾ വളരെ വലിയ സ്കെയിലിലാണ് ഈ ആക്ഷൻ ത്രില്ലർ ഒരുങ്ങുന്നത്. ഹൃദയത്തോട് ചേർന്നുനിൽക്കുന്ന ഒരു സിനിമയായിരിക്കും ഇതെന്നും അദ്ദേഹം കൂട്ടിച്ചേർത്തു.
’ആർഡിഎക്സ്’ (RDX) എന്ന സൂപ്പർ ഹിറ്റിന് ശേഷം നഹാസ് ഹിദായത്ത് സംവിധാനം ചെയ്യുന്ന ഈ ചിത്രം ദുൽഖർ സൽമാന്റെ 40-ാം ചിത്രമെന്ന പ്രത്യേകതയുമുണ്ട്. വേഫെറർ ഫിലിംസിന്റെ ബാനറിൽ ദുൽഖറും ജോം വർഗീസും ചേർന്നാണ് നിർമാണം. ‘കെജിഎഫ്’, ‘വിക്രം’, ‘ലിയോ’ തുടങ്ങിയ പാൻ ഇന്ത്യൻ ഹിറ്റുകൾക്ക് സംഘട്ടനം ഒരുക്കിയ പ്രശസ്ത ആക്ഷൻ കൊറിയോഗ്രാഫർമാരായ അൻപറിവ് മാസ്റ്റേഴ്സ് ആണ് ചിത്രത്തിലെ ആക്ഷൻ രംഗങ്ങൾ കൈകാര്യം ചെയ്യുന്നത്.
ദുൽഖർ സൽമാനെ കൂടാതെ ആന്റണി വർഗീസ് പെപ്പെ, തമിഴ് സംവിധായകൻ മിഷ്കിൻ, കതിർ, കയദു ലോഹർ തുടങ്ങിയ വൻ താരനിര തന്നെ ചിത്രത്തിലുണ്ട്. സജീർ ബാബ, ഇസ്മായിൽ അബൂബക്കർ, ബിലാൽ മൊയ്തു എന്നിവർ ചേർന്ന് തിരക്കഥയൊരുക്കിയ ചിത്രത്തിന്റെ സംഭാഷണം ആദർശ് സുകുമാരനും ഷഹബാസ് റഷീദുമാണ് നിർവഹിച്ചിരിക്കുന്നത്. ചിത്രം 2026 ഓഗസ്റ്റിൽ ഓണം റിലീസായി തിയേറ്ററുകളിൽ എത്തുമെന്നാണ് സൂചന.
