അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഗ്രീൻലൻഡ് പദ്ധതിയെച്ചൊല്ലിയുള്ള തർക്കത്തിൽ നിലപാട് മയപ്പെടുത്തി അമേരിക്കൻ പ്രസിഡന്റ് ഡോണൾഡ് ട്രംപ്. 8 യൂറോപ്യൻ രാജ്യങ്ങൾക്കെതിരെ ഏർപ്പെടുത്തിയിരുന്ന അധിക തീരുവ അമേരിക്കൻ പ്രസിഡൻ്റ് ഡോണൾഡ് ട്രംപ് പിൻവലിച്ചു.
നാറ്റോ സെക്രട്ടറി ജനറൽ മാർക്ക് റൂട്ടുമായുള്ള കൂടിക്കാഴ്ചയ്ക്ക് പിന്നാലെയാണ് നടപടി. ഫെബ്രുവരി 1 മുതൽ പ്രാബല്യത്തിൽ വരുമെന്ന് പ്രഖ്യാപിച്ച 10 ശതമാനം തീരുവയാണ് പിൻവലിച്ചത്.
ഗ്രീൻലൻഡുമായും ആർട്ടിക് മേഖലയുമായും പുതിയ കരാർ രൂപീകരിച്ചെന്നും കരാർ യാഥാർഥ്യമായാൽ അമേരിക്കയ്ക്കും മറ്റു രാജ്യങ്ങൾക്കും ഗുണകരമാകുമെന്നും ട്രംപ് പറഞ്ഞു.
ഡെന്മാർക്ക്, സ്വീഡൻ, ഫ്രാൻസ്, ജർമ്മനി, നെതർലൻഡ്സ്, ഫിൻലാൻഡ്, നോർവേ, യുകെ എന്നീ രാജ്യങ്ങൾക്കെതിരെയാണ് തീരുവ ചുമത്തിയിരുന്നത്.
ഗ്രീൻലൻഡുമായി ബന്ധപ്പെട്ട ഗോൾഡൻ ഡോമുമായി ബന്ധപ്പെട്ട് കൂടുതൽ ചർച്ച നടക്കുമെന്നും ട്രംപ് വ്യക്തമാക്കി. സ്വിറ്റ്സർലണ്ടിലെ ദാവോസിൽ നടക്കുന്ന ലോക സാമ്പത്തിക ഫോറത്തിനിടെയായിരുന്നു നാറ്റോ സെക്രട്ടറിയുമായുള്ള ട്രംപിൻ്റെ കൂടിക്കാഴ്ച.
അതേസമയം, ഗ്രീൻലൻഡിൻ്റെ ഉടമസ്ഥാവകാശം സംബന്ധിച്ച ചർച്ചകൾ തുടരുമെന്നും ട്രംപ് അറിയിച്ചു. നിലവിലെ ധാരണ അമേരിക്കയ്ക്കും മറ്റ് നാറ്റോ രാജ്യങ്ങൾക്കും ഗുണകരമാകുമെന്നും ട്രംപ് വ്യക്തമാക്കി. ഗ്രീൻലൻഡ് ബലപ്രയോഗത്തിലൂടെ സ്വന്തമാക്കില്ലെന്നും മുമ്പ് ട്രംപ് പറഞ്ഞിരുന്നു.
