അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഫഹദ് ഫാസിൽ നായകനായെത്തി വേറെ ലെവൽ പെർഫോമൻസ് കാഴ്ചവെച്ച ചിത്രമാണ് ‘ആവേശം’. മറ്റ് ഇൻഡസ്ട്രികളിലും വൻ ചർച്ചയായ ചിത്രമാണ് ജിത്തു മാധവൻ സംവിധാനം ചെയ്ത ‘ആവേശം’. ഇപ്പോഴിതാ ‘ആവേശ’ത്തിലെ വേഷം നഷ്ടപ്പെടുത്തിയതിന്റെ സങ്കടം പങ്കുവച്ച് സോഷ്യൽ മീഡിയ ഇൻഫ്ലുവൻസറും നടനുമായ അഖിൽ എൻആർഡി.
ഫഹദ് അവതരിപ്പിച്ച രംഗ എന്ന കഥാപാത്രത്തിനൊപ്പം നിൽക്കുന്ന പ്രധാന വേഷങ്ങളിലേക്ക് പുതുമുഖങ്ങളെ തേടിയ സമയത്താണ് അഖിലിനും ക്ഷണം ലഭിച്ചത്. എന്നാൽ ആ അവസരം വേണ്ടവിധം ഉപയോഗിക്കാൻ തനിക്ക് കഴിഞ്ഞില്ലെന്ന് താരം വെളിപ്പെടുത്തി. ‘ആവേശം’ എന്ന സിനിമ വലിയ വിജയമായതോടെ താൻ നഷ്ടപ്പെടുത്തിയത് എത്ര വലിയ അവസരമാണെന്ന് തിരിച്ചറിഞ്ഞതായി അഖിൽ പറയുന്നു.
‘‘ജീവിതത്തിൽ ചിലപ്പോഴൊക്കെ വലിയ ഭാഗ്യങ്ങൾ നമ്മളെ തേടി വരും, പക്ഷേ പലപ്പോഴും അത് തിരിച്ചറിയാനുള്ള പക്വത നമുക്കുണ്ടാകില്ല. ‘ആവേശം’ എന്ന സിനിമയുടെ കാര്യത്തിൽ എനിക്കുണ്ടായതും അതുതന്നെയാണ്. എന്റെ അറിവില്ലായ്മ കൊണ്ട് മാത്രമാണ് അത്രയും വലിയൊരു സിനിമ എന്റെ കയ്യിൽ നിന്നും നഷ്ടമായത്. പിന്നീട് സിനിമ തിയേറ്ററിൽ റിലീസ് ചെയ്തപ്പോൾ, ആ ആവേശം നേരിൽ കണ്ടപ്പോൾ എനിക്ക് ഭയങ്കര സങ്കടം തോന്നി. ഇത്രയും വലിയൊരു ചാൻസ് ആയിരുന്നല്ലോ ഞാൻ വേണ്ടെന്ന് വെച്ചത് എന്നോർത്ത് മനസ്സ് വിങ്ങി.
എന്നാൽ ആ തിരിച്ചറിവ് എന്നെ തളർത്തിയില്ല. സിനിമയോടുള്ള മോഹം കൊണ്ട് പിന്നീട് ഞാൻ നിരവധി സംവിധായകർക്ക് മെസ്സേജുകൾ അയച്ചു. ആ ശ്രമങ്ങൾക്കൊടുവിലാണ് ജൂഡ് ഏട്ടൻ (ജൂഡ് ആന്തണി ജോസഫ്) എന്നെ വിളിക്കുന്നത്. അങ്ങനെയാണ് ‘ആശകൾ ആയിരം’ എന്ന സിനിമയിലേക്ക് എനിക്ക് അവസരം ലഭിക്കുന്നത്. ഒരു വലിയ നഷ്ടത്തിൽ നിന്നും പുതിയൊരു തുടക്കത്തിലേക്കുള്ള വഴി എനിക്ക് തുറന്നു കിട്ടിയത് അവിടെ നിന്നാണ്.’’ അഖിൽ പറയുന്നു.
