അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.വർഷങ്ങളായി തുടരുന്ന ആണവ തർക്കങ്ങളിൽ നിർണ്ണായകമായ വിട്ടുവീഴ്ചകൾക്ക് തയ്യാറാണെന്ന് ഇറാൻ വ്യക്തമാക്കി. രാജ്യാന്തര തലത്തിൽ തങ്ങൾക്കെതിരെ ഏർപ്പെടുത്തിയിരിക്കുന്ന സാമ്പത്തിക ഉപരോധങ്ങൾ അമേരിക്ക പിൻവലിക്കാൻ തയ്യാറാകുകയാണെങ്കിൽ ആണവ പദ്ധതികളിൽ നിയന്ത്രണം കൊണ്ടുവരാമെന്നാണ് ഇറാന്റെ പുതിയ നിലപാട്. മേഖലയിൽ സൈനിക സംഘർഷ സാധ്യതകൾ നിലനിൽക്കുന്ന പശ്ചാത്തലത്തിലാണ് ഇറാന്റെ ഈ നീക്കം ശ്രദ്ധേയമാകുന്നത്.
ബിബിസിക്ക് നൽകിയ പ്രത്യേക അഭിമുഖത്തിലാണ് ഇറാന്റെ ഉപവിദേശകാര്യ മന്ത്രി മജീദ് തക്ത് റവാഞ്ചി രാജ്യത്തിന്റെ നിലപാട് വ്യക്തമാക്കിയത്. “അമേരിക്ക ചർച്ചകളിൽ ആത്മാർത്ഥത കാണിക്കുകയാണെങ്കിൽ ഒരു ഉടമ്പടിയിൽ എത്താൻ ഞങ്ങൾക്ക് തടസ്സമില്ല,” അദ്ദേഹം പറഞ്ഞു. യുറേനിയം സമ്പുഷ്ടീകരണത്തിന്റെ തോത് കുറയ്ക്കുന്നത് ഉൾപ്പെടെയുള്ള കാര്യങ്ങളിൽ ചർച്ചയാകാമെന്നും എന്നാൽ ഇതിന് പകരമായി ഇറാനുമേലുള്ള കടുത്ത സാമ്പത്തിക ഉപരോധങ്ങൾ നീക്കണമെന്നും അദ്ദേഹം ആവശ്യപ്പെട്ടു.
ഒമാനിൽ നടന്ന പ്രാഥമിക ചർച്ചകൾക്ക് പിന്നാലെ ജനീവയിൽ രണ്ടാം വട്ട ചർച്ചകൾക്ക് ഇറാൻ തയ്യാറെടുക്കുകയാണ്. എന്നാൽ, ആണവ വിഷയത്തിന് പുറമെ ഇറാന്റെ ബാലിസ്റ്റിക് മിസൈൽ പദ്ധതികളും ചർച്ചാവിഷയമാക്കണമെന്ന അമേരിക്കയുടെയും ഇസ്രായേലിന്റെയും ആവശ്യം ഇറാൻ തള്ളിക്കളഞ്ഞു. മിസൈൽ പദ്ധതികൾ രാജ്യത്തിന്റെ പ്രതിരോധത്തിന് അത്യാവശ്യമാണെന്നും അതിൽ വിട്ടുവീഴ്ചയില്ലെന്നുമാണ് തെഹ്റാന്റെ നിലപാട്.
