അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ബി.എഫ്.എ (ബാച്ചിലര് ഓഫ് ഫൈന് ആര്ട്ട്സ്) പരീക്ഷയില് തോറ്റ ഒരു SFI പ്രവര്ത്തകന് എം.എഫ്.എ ക്ക് പ്രവേശനം നല്കിയ കാലടി സംസ്കൃത സര്വകലാശാല സിന്ഡിക്കേറ്റും വി.സിയും ഗവര്ണറെ എതിര്ത്ത് മുന്നോട്ട്. സര്വ്വകലാശാല സിന്ഡിക്കേറ്റിന്റെ ഈ തീരുമാനംമരവിപ്പിക്കാനും അസി: പ്രൊഫസര് നിയമന നടപടികള് ആരംഭിക്കാനുള്ള സിന്ഡിക്കേറ്റ് തീരുമാനം നിര്ത്തിവയ്ക്കാനുമുള്ള ഗവര്ണറുടെ നിര്ദ്ദേശം അംഗീകരിക്കാതെ ‘സംസ്കൃത’ വി.സി തീരുമാനവുമായി മുന്നോട്ട് പോവുകയാണ്. ഇതിനെതിരേ നടപടി എടുക്കണമെന്ന് ആവശ്യപ്പെട്ട് ഗവര്ണര്ക്ക് മുമ്പില് നിവേദനം ലഭിച്ചിരിക്കുകയാണ്.
നാല് വര്ഷ ബി.എഫ്.എ (മ്യൂറല് പെയിന്റിംഗ്) പരീക്ഷയില് തോറ്റതിനെ തുടര്ന്ന് 2005ല് പഠനം ഉപേക്ഷിച്ച എ. കലേഷ് എന്ന എസ്.എഫ്.ഐ പ്രവര്ത്തകന് ബി.എഫ്.എ പരീക്ഷ പാസാകാതെ എം.എഫ്.എ യ്ക്ക് പ്രവേശനം നല്കിയിരുന്നു. പ്രസ്തുത വിദ്യാര്ത്ഥി 2023 ല് എം എഫ് എ പാസായതുകൊണ്ട് പ്രത്യേക കേസായി പരിഗണിച്ച് ബിഎഫ്എ ജയിപ്പിക്കാന് താല്ക്കാലിക വിസി ഡോ:കെ.കെ.ഗീതാ കുമാരിയുടെ അധ്യക്ഷതയില് ചേര്ന്ന സിന്ഡിക്കേറ്റ് യോഗം തീരുമാനിക്കുകയായിരുന്നു.
ബി.എഫ്.എ പരീക്ഷയുടെ മാര്ക്ക്ലിസ്റ്റുകള് പരിശോധിക്കാതെ എം.എഫ്.എ യ്ക്ക് പ്രവേശനംനല്കിയതില് ദുരൂഹത ഉള്ളതായി ആക്ഷേപമുണ്ട്. തോറ്റ ബി.എഫ്.എ വിദ്യാര്ത്ഥിയെ ജയിപ്പിച്ചതും, അഞ്ചുവര്ഷത്തിനു മുമ്പുള്ള വിജ്ഞാപന പ്രകാരം അസിസ്റ്റന്റ് പ്രൊഫസര് നിയമനങ്ങള് നടത്തുന്നതുമായി ബന്ധപ്പെട്ട ഫയലുകള് ഹാജരാക്കാനും തീരുമാനങ്ങളിന്മേല് നടപടികള് നിര്ത്തിവയ്ക്കാനും ഗവര്ണര് ആവശ്യപ്പെട്ടിട്ടും വി.സി വഴങ്ങാന് തയ്യാറാകാത്തത് ഗുരുതരമായ കൃത്യവിലോപമാണ്.
സിന്ഡിക്കേറ്റിലെ ചില അംഗങ്ങളുടെ സമ്മര്ദ്ദത്തിന് വഴങ്ങിയാണ് തോറ്റ വിദ്യാര്ത്ഥിയെ ജയിപ്പിക്കാന് വിസി കൂട്ടുന്നതെന്നും മുന് തീയതിയില് BFA പരീക്ഷ പാസ്സായതിന് അനുയോജ്യമായ പ്രത്യേക മാര്ക്കലിസ്റ്റ് പരീക്ഷാ വിഭാഗം തയ്യാറാക്കുന്നതായും അറിയുന്നു. സാമ്പത്തിക പ്രതിസന്ധി മൂലം കോണ്വെക്കേഷന് പോലും നടത്താന്സാധിക്കാതെ കനത്ത സാമ്പത്തിക പ്രതിസന്ധി നേരിടുന്ന സര്വ്വകലാശാലയില്, വിദ്യാര്ഥികളുടെ എണ്ണത്തിന്റെ ആനുപാതികതയില് അധികം അധ്യാപകരെ നിയമിച്ചിരിക്കുന്നതായി ഗവണ്മെന്റ് ഓഡിറ്ററുടെ റിപ്പോര്ട്ട് ചൂണ്ടിക്കാട്ടുന്നതായി സേവ് യൂണിവേഴ്സിറ്റി ക്യാമ്പയിന് കമ്മിറ്റി ഗവര്ണര്ക്ക് നല്കിയ പരാതിയില് പറയുന്നു.
സര്വ്വകലാശാലയുടെ ചട്ടങ്ങള് സംരക്ഷിക്കുവാന് ബാധ്യതപ്പെട്ട താല്കാലിക വിസി, ഭരണകക്ഷിയില് പെട്ട ചില സിന്ഡിക്കേറ്റങ്ങളുടെ സമ്മര്ദ്ദത്തിന് വഴങ്ങി ചട്ട വിരുദ്ധ നടപടികള് സ്വീകരിക്കുകയാണെന്ന് ഗവര്ണര്ക്ക് നല്കിയ പരാതിയില് ചൂണ്ടിക്കാട്ടിയിട്ടുണ്ട്.
