അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തമിഴ് സൂപ്പർ താരം അജിത് കുമാറിന് മഹീന്ദ്രയുടെ ‘BE 6 ഫോർമുല ഇ എഡിഷൻ’ ഇലക്ട്രിക് എസ്യുവി സമ്മാനമായി നൽകി മഹീന്ദ്ര. അജിത്തിന്റെ കാറോട്ടത്തോടുള്ള ദീർഘകാലമായുള്ള താല്പര്യത്തിനുള്ള ആദരമാണ് ഈ വാഹനം. ചെന്നൈയിൽ നടന്ന ചടങ്ങിൽ മഹീന്ദ്ര ഓട്ടോമോട്ടീവ് ടെക്നോളജി പ്രസിഡന്റ് ആർ. വേലുസ്വാമി നേരിട്ടെത്തിയാണ് വാഹനത്തിന്റെ കീ അജിത്തിന് കൈമാറിയത്.
സിനിമയ്ക്ക് പുറമെ പ്രൊഫഷണൽ റേസിങ്ങിൽ സജീവമായ അജിത്തിന് സ്വന്തമായി ഒരു റേസിങ് ടീമും ഉണ്ട്. മോട്ടോർസ്പോർട്സുമായി ഇത്രയേറെ ആഴത്തിൽ ബന്ധമുള്ള ചുരുക്കം ചില ഇന്ത്യൻ അഭിനേതാക്കളിൽ ഒരാളാണ് അദ്ദേഹം. സിനിമയും വേഗവും റേസിങ് കമ്പവും ഒരുപോലെ കൊണ്ടുപോകുന്ന താരത്തിന് ലഭിച്ച അർഹമായ അംഗീകാരമാണിത്.
ഇന്ത്യൻ ഇലക്ട്രിക് വാഹന വിപണി ഇളക്കി മറിച്ച ഒരു മോഡലാണ് മഹീന്ദ്ര BE 6 എന്ന് നമുക്ക് എല്ലാവർക്കും അറിയാം. വിപണിയിൽ എത്തി ഒരു വർഷത്തിനുള്ളിൽ മഹീന്ദ്ര BE 6 ന്റെ 30,000 യൂണിറ്റുകളോളമാണ് ഇന്ന് നിരത്തിലുള്ളത് എന്നത് തന്നെ ഇതിന്റെ തെളിവാണ്. ഈ സന്തോഷവും മഹീന്ദ്രയുടെ ഫോർമുല E ആവേശവും കൂടെ പങ്കുവെയ്ക്കുന്നതിനായി BE 6 ഫോർമുല E എഡിഷനുകൾ മഹീന്ദ്ര അവതരിപ്പിച്ചിരിക്കുകയാണ്.
23.69 ലക്ഷം രൂപ എക്സ്-ഷോറൂം വിലയ്ക്കാണ് ഇത് എത്തുന്നത്. FE2, FE3 എന്നീ രണ്ട് വേരിയന്റുകളിൽ BE 6 ഫോർമുല E എഡിഷനുകൾ ലഭ്യമാണ്. BE 6 ബാറ്റ്മാൻ എഡിഷനു പിന്നാലെ ഈ ഇലക്ട്രിക് വാഹനത്തിനു ലഭിക്കുന്ന അടുത്ത സ്പെഷ്യൽ എഡിഷൻ മോഡലാണ് ഫോർമുല E എഡിഷൻ എന്നതും ശ്രദ്ധേയമാണ്. ഓൾ ബ്ലാക്ക് ഷെയ്ഡിൽ വരുന്ന ബാറ്റ്മാൻ എഡിഷനുമായി താരതമ്യപ്പെടുത്തുമ്പോൾ BE 6 ഫോർമുല E -ക്ക് ടാംഗോ റെഡ്, ഫയർസ്റ്റോം ഓറഞ്ച്, എവറസ്റ്റ് വൈറ്റ്, സ്റ്റെൽത്ത് ബ്ലാക്ക് എന്നിങ്ങനെ നാല് കളർ ഓപ്ഷനുകളുണ്ട്.
ബാഹ്യ രൂപകൽപ്പനയുടെ കാര്യത്തിൽ, പുതിയ BE 6 ഫോർമുല E എഡിഷനിൽ പുതുക്കിയ ഫ്രണ്ട്, റിയർ ബമ്പറുകൾ, ബ്രഷ്ഡ് അലുമിനിയത്തിൽ പൂർത്തിയാക്കിയ പുതിയ റിയർ ഫോക്സ് സ്കിഡ് പ്ലേറ്റ്, ബൂട്ട് ലിഡിൽ സംയോജിപ്പിച്ച പുതിയ സ്പോയിലർ, പുതിയ ഹെഡ്ലാമ്പുകൾ, പുതിയ പെയിന്റ് ഓപ്ഷൻ, സ്റ്റിക്കറുകൾ, ഹുഡ് സ്ട്രൈപ്പുകൾ, വീൽ സ്ട്രൈപ്പുകൾ, ഓറഞ്ച് ടോ ഹുക്ക്, ഫോർമുല E റിയർ ബാഡ്ജ്, ചുവന്ന ബ്രേക്ക് ക്യാലിപ്പറുകൾ, റണ്ണിംഗ് ബോർഡിൽ ഓറഞ്ച് ഇൻസേർട്ടുകൾ എന്നിവ ഉൾപ്പെടുന്നു.
അടുത്തതായി അകത്തേക്ക് നീങ്ങുമ്പോൾ, 2025 മഹീന്ദ്ര BE 6 ഫോർമുല E എഡിഷന്റെ ക്യാബിനിൽ ഒരു ട്രാൻസ്പരന്റ് ഡോർ പാനൽ, ഫോർമുല E ലോഗോ, ഡോറുകളിൽ കാർബൺ ഫൈബർ ആക്സന്റുകൾ, സീറ്റ് ബാക്കിൽ ഫോർമുല E മോട്ടിഫ്, സ്റ്റിയറിംഗ് വീലിൽ ഓറഞ്ച് ഇൻസേർട്ടുകൾ, ഓറഞ്ച് സെന്റർ കൺസോൾ ബട്ടണുകൾ, ഓറഞ്ച് ഡോർ ഹാൻഡിലുകൾ എന്നിവയാണ് പ്രധാന ആകർഷണങ്ങൾ. കൂടാതെ BE 6 ഫോർമുല E സ്പെഷ്യൽ എഡിഷന് 79 kWh ബാറ്ററി പായ്ക്ക്, സിംഗിൾ ഇലക്ട്രിക് മോട്ടോർ (RWD) എന്നിവയുണ്ട്. ഇത് 282 bhp മാക്സ് പവറും 380 Nm പീക്ക് ടോർക്കും ഉത്പാദിപ്പിക്കുന്നു. ഒറ്റ ചാർജിൽ 683 കിലോമീറ്റർ ഡ്രൈവിംഗ് റേഞ്ചാണ് നിർമ്മാതാക്കൾ അവകാശപ്പെടുന്നത്. FE2, FE3 എന്നീ രണ്ട് വേരിയന്റുകൾക്കും യഥാക്രമം 23.69 ലക്ഷം രൂപയും 24.49 ലക്ഷം രൂപയുമാണ് എക്സ്-ഷോറൂം വില. BE 6 ഫോർമുല E യുടെ ബുക്കിംഗ് 2026 ജനുവരി 14 നും ഡെലിവറികൾ 2026 ഫെബ്രുവരി 14 നും ആരംഭിക്കും.
