അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.സിനിമാക്കാര് താരപരിവേഷം അണിഞ്ഞാല്പ്പിന്നെ മണ്ണില് തൊടില്ലെന്നൊരു കിംവതന്തിയുണ്ട് നാട്ടില്. അത് ഏറെക്കുറേ ശരിയാണെങ്കിലും ചിലര്മാത്രം ഇതിന് കടക വിരുദ്ധമായി സഞ്ചരിക്കുന്നുണ്ട്. അവര് സമൂഹത്തിന് മാതൃക കൂടിയാകാന് ശ്രമിക്കുന്നവരാണ്. പ്രകൃതിയും മനുഷ്യനും തമ്മിലുള്ള ബന്ധം നല്ലപോലെ തിരിച്ചറിയുന്നവരാണ് ഇത്തരം നടീനടന്മാര്. അതില് ന്പന്തിയില് നില്ക്കുന്ന നടനാണ് തെന്നിന്ത്യന് സ്റ്റാര് ആര്. മാധവന്. തന്റെ സിനിമകളെപ്പോലെ പ്രണയവും ആത്മബന്ധവും ഇഴപിരിച്ചാണ് മാധവന് കൃഷിയെയും പച്ചക്കറികളെയും നട്ടുനനച്ച് പരിപാലിച്ച് വിളവെടുക്കുന്നത്. ഏക്കറുകണക്കിന് പാടശേഖരത്തിലെ വ്യാവസായിക കൃഷിയല്ല കേട്ടോ. സ്വന്തം വീടിനു മുകളിലെ മട്ടുപ്പാവ് കൃഷിയാണിത്.
പക്ഷെ, തന്റെ വീട്ടില് പാചകം ചെയ്യാന് പോന്ന പച്ചക്കറികള് ഈ ടെറസ്സില് കിട്ടുന്നുണ്ടെന്ന് വളരെ അഭിമാനത്തോടെയാണ് മാധവന് തന്റെ ഇന്സ്റ്റഗ്രാം പോസ്റ്റില് ഷെയര് ചെയ്ത വീഡിയോയിലൂടെ സമൂഹത്തിന് കാണിച്ചു കൊടുക്കുന്നത്. എന്തുണ്ട് മട്ടുപ്പാവില്, എന്നു ചോദിക്കുന്നതിനേക്കാള് നല്ലത്, എന്തില്ല എന്നു ചോദിക്കുന്നതാണ്. പച്ചക്കറികളില് പ്രധാനപ്പെട്ടതെല്ലാം മാധവന് നട്ടുനനച്ച് വളര്ത്തുന്നുണ്ട്. അതിന്റെ വിളവെടുപ്പും അദ്ദേഹം നടത്തിക്കഴിഞ്ഞു. സിനിമാ താരങ്ങളുടെ ജീവിതരീതികളും ആരോഗ്യ പരിപാലനവും വലിയ രീതിയില് സമൂഹ മാധ്യമങ്ങളില് ശ്രദ്ധിക്കപ്പെടുന്ന കണ്ടന്റുകളാണ്. അങ്ങനെ സ്വന്തം ടെറസ്സില് നിറഞ്ഞുനില്ക്കുന്ന ജൈവകൃഷിയിലൂടെയാണ് തെന്നിന്ത്യന് സ്റ്റാര് ആര്. മാധവന് വൈറലായിരിക്കുന്നത്.
മുംബൈയിലെ തന്റെ വീടിന്റെ ടെറസില് പച്ചക്കറികള് വിജയകരമായി വളര്ത്തി മാതൃകയാവുകയാണ് താരം. മറ്റു താരങ്ങള്ക്കും ഷൂട്ടും സിനിമയും ഒന്നുമില്ലാത്തപ്പോള് മട്ടുപ്പാവിലേക്ക് കയറാന് ഒരു പ്രചോദനം കൂടിയായി ഇതിനെ കാണണം. ടെറസില് മാത്രമല്ല, തമിഴ്നാട് പഴനിക്കടുത്ത് സ്വന്തമായി ഒരു തെങ്ങിന്തോപ്പ് തന്നെ താരം പരിപാലിച്ചു പോരുന്നുണ്ട്. ഒട്ടും ഫലഭൂയിഷ്ഠമല്ലാത്ത ഏക്കറുകണക്കിന് വരണ്ട ഭൂമി അദ്ദേഹവും സഹോദരനും വാങ്ങുകയും കഠിനപ്രയത്നത്തിനൊടുവില് സമൃദ്ധമായ തെങ്ങിന്തോട്ടമാക്കി മാറ്റുകയുമായിരുന്നു.
2014ല് വീടിന്റെ ബാല്ക്കണിയില് ഒരു കൗതുകത്തിന് തുടങ്ങിയ കൃഷി തന്റെ ജീവിതത്തിലെ ഒരു ശീലമായി മാറിയെന്ന് താരം പറയുന്നു. ഒരു സിനിമയുടെ തിരക്കഥ രചനയുമായി ബന്ധപ്പെട്ട് വീട്ടില് കൂടുതല് സമയം ചിലവഴിക്കേണ്ടി വന്നതോടെയാണ് കൃഷിയിലും ഒരു കൈ നോക്കാമെന്ന താല്പര്യം ഉടലെടുത്തത്. തുടര്ന്ന്, ജൈവകൃഷിയെക്കുറിച്ചുള്ള പുസ്തകങ്ങളും ലേഖനങ്ങളും വായിച്ച് അദ്ദേഹം ഗവേഷണം നടത്തുകയും അതിനായി ശ്രമിക്കുകയും ചെയ്തതോടെ നടന് എന്നതിലുപരി ഒരു കര്ഷകനും ജന്മമെടുക്കുകയായിരുന്നു. വീട്ടിലേക്കാവശ്യമായ സീസണല് പച്ചക്കറികളുടെ 70 ശതമാനവും ഇന്ന് വീട്ടില് തന്നെ ഉത്പാദിപ്പിക്കാന് തനിക്ക് കഴിയുന്നുണ്ടെന്ന് അദ്ദേഹം ഒരു അഭിമുഖത്തില് വ്യക്തമാക്കുന്നുണ്ട്.
വര്ഷങ്ങളായി വിവിധതരം പഴങ്ങളും പച്ചക്കറികളുമാണ് മാധവന് തന്റെ വീട്ടില് നിന്നും വിളവെടുക്കുന്നത്. വെണ്ടക്ക, വഴുതന, ബ്രൊക്കോളി, തക്കാളി, വെള്ളരി തുടങ്ങി നിരവധി വിളകള് അദ്ദേഹത്തിന്റെ ടെറസ് ഗാര്ഡനില് ഇപ്പോഴും വിളഞ്ഞുനില്ക്കുന്നുണ്ട്. മണ്ണൊരുക്കുന്നത് മുതല് വിത്തുപാകി, നനച്ച്, വിളവെടുക്കുന്നത് വരെയുള്ള പ്രക്രിയകളെല്ലാം ചെയ്യുന്നത് നടന് തന്നെയാണ്. പുതിയ പരീക്ഷണങ്ങളോടൊപ്പം എല്ലാം തന്റെ ടെറസ്സില് നിന്ന് വിളവെടുക്കുന്നതിനാല് വിഷം ചേര്ത്ത ഫലങ്ങളെയും പച്ചക്കറികളെയും പേടിക്കാറില്ല. പാടത്ത് നമുക്കായി ഉഴുതുമറിക്കുന്ന കര്ഷകര് എത്രമാത്രം കഷ്ടപ്പെടുന്നുണ്ടെന്ന് ഓരോ വ്യക്തിയും മനസ്സിലാക്കാന് സ്വന്തമായി ഒരു പച്ചക്കറിയെങ്കിലും കൃഷി ചെയ്തു നോക്കണമെന്നാണ് നടന്റെ അഭിപ്രായം.
തുള്ളിനന വഴി ലഭിക്കുന്ന ജലത്തിന്റെ ഇരുപതില് ഒരുഭാഗം വെള്ളം മാത്രമാണ് അദ്ദേഹം തന്റെ കൃഷിക്കായി ഉപയോഗിക്കുന്നത്. വരള്ച്ച നേരിടുന്ന സമയങ്ങളില് സ്വയം പര്യാപ്തത നേടാനുള്ള ഏറ്റവും മികച്ച മാര്ഗമാണിതെന്നും അദ്ദേഹം അഭിപ്രായപ്പെടുന്നു. സ്വന്തമായി ഒരു പച്ചക്കറിത്തോട്ടം തുടങ്ങാന് ആഗ്രഹിക്കുന്നവര്ക്കു വേണ്ടി മാധവന് ചില ലളിതമായ വഴികളും പങ്കുവെക്കുന്നുണ്ട്. കൃഷി തുടങ്ങുന്നതിനു മുമ്പ് മണ്ണിന്റെ ഗുണനിലവാരം ഉറപ്പാക്കണം. താരതമ്യേന ശുദ്ധമായ മണ്ണും പുഴയോരത്തെ മണ്ണും കൂട്ടിക്കലര്ത്തി ഉപയോഗിക്കുന്നത് നല്ലതാണ്. മികച്ച ഗുണനിലവാരമുള്ള ജൈവ വിത്തുകള് തിരഞ്ഞെടുക്കാന് ശ്രദ്ധിക്കുക. താന് യൂറോപ്പില് നിന്നാണ് തന്റെ ആദ്യ വിത്തുകള് വാങ്ങിയതെങ്കിലും അവയില് പലതും യഥാര്ഥത്തില് ഇന്ത്യന് ഇനങ്ങളായിരുന്നുവെന്ന് അദ്ദേഹം ഓര്ക്കുന്നു.
ഗ്രാമങ്ങളിലെ കര്ഷകരുടെ പക്കല് ജൈവ വിത്തുകള് ലഭ്യമായിരിക്കാം. പ്രാദേശികമായി ലഭ്യമല്ലെങ്കില് ഓണ്ലൈന് വഴിയും വിത്തുകള് കണ്ടെത്താം. വിത്തുപാകിക്കഴിഞ്ഞാല് ചെടികള്ക്ക് ആവശ്യത്തിന് സൂര്യപ്രകാശം ലഭിക്കുന്നുണ്ടെന്ന് ഉറപ്പാക്കണം. ചെടികള്ക്ക് നല്ല രീതിയില് വളരാന് മികച്ച വായൂസഞ്ചാരം അത്യാവശ്യമാണ്. ഒതുങ്ങിനില്ക്കുന്ന അല്ലെങ്കില് വായൂസഞ്ചാരമില്ലാത്ത സ്ഥലങ്ങള് ചെടികളുടെ വളര്ച്ചയെ ബാധിക്കും കൂടുതല് വെള്ളമൊഴിച്ചാല് ചെടികള് നന്നായി വളരണമെന്നില്ല. ചെടികളുടെ യഥാര്ത്ഥ ആവശ്യകത മനസ്സിലാക്കി നനയ്ക്കുക. എലി അടക്കമുള്ള പ്രാണികളില് നിന്നും ജീവികളില് നിന്നും പുതിയ തളിര്ചെടികളെ സംരക്ഷിക്കാന് തുടക്കത്തില് അവ മൂടി വെക്കുക
അഭിനത്തിലെന്നല്ല സ്വന്തം ജീവിതത്തില് പരീക്ഷണങ്ങള് നടത്തി വിജയം കൈവരിക്കാമെന്ന പ്രചോദനമാണ് താരം സമൂഹത്തിന് നല്കുന്നത്. സിനിമയ്ക്കൊപ്പം പ്രകൃതിയോട് ഇണങ്ങിനിന്നുള്ള മാധവന്റെ കാര്ഷിക ജീവിതം വലിയ രീതിയില് പ്രശംസ പിടിച്ചുപറ്റുകയാണ്.
