അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഹോര്മുസില് പഴയ നിയമങ്ങളില്ല, എല്ലാം ഇറാന് നിശ്ചയിക്കുന്ന നിയമങ്ങള് മാത്രം പാലിക്കപ്പെട്ടതോടെ ലോകം ആശങ്കയിലായിരിക്കുകയാണ്. ഒരുതുള്ളി എ്ണപോലും കയറ്റി ഹോര്മുസ് കടലിടുക്ക് താണ്ടാന് ലോകത്തിലെ ഒരു രാജ്യത്തിന്റെയും കപ്പലുകള്ക്കാവില്ല. ലോകം ഇറാന്റെ കരുണയ്ക്ക് കാത്തുനില്ക്കേണ്ടി വരുന്ന കാഴ്ച. പശ്ചിമേഷ്യയിലെ സംഘര്ഷം ഇറാനെ അജയ്യമായ ശക്തിയായി മാറ്റിയിരിക്കുന്നു. എല്ലാവിധ ഉപരോധങ്ങളും അമേരിക്ക നടത്തുമ്പോഴും ഇറാന് നടത്തുന്ന പ്രതിരോധത്തില് ലോകം തന്നെ നിശ്ചലമാകുമെന്ന സ്ഥിതിയാണിപ്പോള്. അതാണ് ഹോര്മുസ് കടലിടുക്കിലെ ഇറാന്റെ നിയന്ത്രണം. ആര് വരണം ആര് പോകണമെന്ന് ഇറാന് നിശ്ചയിക്കുന്നു. കപ്പലുകള് നങ്കൂരമിട്ടിരിക്കുന്നത് എണ്ണയ്ക്കു വേണ്ടിയാണ്. പക്ഷെ, ഇറാന് തീരുമാനിക്കുന്ന രാജ്യങ്ങളുടെ കപ്പലുകള്ക്കു മാത്രമേ ഉപരോധമില്ലാതെ ഹോര്മുസ് കടലിടുക്ക് കടക്കാനാകൂ. പശ്ചിമേഷ്യന് യുദ്ധത്തില് ഇറാന്റെ തുറുപ്പു ചീട്ടും ഈ കടലിടുക്കാണ്.
കഴിഞ്ഞ മാസം 28ന് ഇറാന് തങ്ങളുടെ നിലപാട് വ്യക്തമാക്കിയതോടെ ഹോര്മുസ് കടലിടുക്ക് ഒരു നിശബ്ദ താഴ്വരയായി മാറി. പ്രതിദിനം നൂറിലധികം ഭീമന് കപ്പലുകള് രാജകീയമായി ഒഴുകിയിരുന്ന ഈ ജലപാതയിലൂടെ ഇപ്പോള് കപ്പലുകള് വരുന്നത് നിയന്ത്രിതവും ഇറാന്റെ നിരീക്ഷണത്തിലുമാണ്. യുദ്ധം തുടങ്ങിയ ശേഷം വെറും 21 ടാങ്കര് കപ്പലുകള്ക്കു മാത്രമാണ് ഈ കടലിടുക്കു കടക്കാന് അനുമതി നല്കിയത്. ആരെ കടത്തിവിടണം, ആരെ തടയണം എന്ന് തീരുമാനിക്കുന്നത് ഇറാന് മാത്രം. കടലിടുക്കിന് മുകളില് അവര് തീര്ത്ത അദൃശ്യമായ ഒരു അരിപ്പ് ആഗോള കപ്പല് ഗതാഗതത്തെ പൂര്ണ്ണമായും നിയന്ത്രിക്കുകയാണ്.
അതുകൊണ്ടു തന്നെ ലോകത്തിന്റെ ഊര്ജ്ജ മേഖലയിലെ സംഹഭാഗവും നിയന്ത്രിക്കുന്ന ഹോര്മുസ് കടലിടുക്കില് ഇപ്പോള് നടക്കുന്നത് വെറുമൊരു യുദ്ധമല്ല, മറിച്ച് ഇറാന്റെ അധികാര പ്രകടനം കൂടിയാണ്. ലോകരാജ്യങ്ങളുടെ സാമ്പത്തിക ഭദ്രത നിശ്ചയിക്കുന്ന ലിവര് ഇപ്പോള് ഇറാന്റെ കൈപ്പിടിയിലാണ്. അതുകൊണ്ട് ലോകം മുഴുവന് ഇറാന്റെ അടുത്ത നീക്കത്തിനായി ശ്വാസമടക്കി നോക്കുകയാണ്. അമേരിക്കയുടെ ഉപരോധങ്ങളെയും ഭീഷണികളെയും പുല്ലുപോലെ തള്ളിക്കളഞ്ഞുകൊണ്ടാണ് ഇറാന് ഹോര്മുസില് തങ്ങളുടെ ആധിപത്യം ഉറപ്പിച്ചിരിക്കുന്നത്. ഇറാന്റെ അനുവാദമില്ലാതെ ഈ വഴി ഒരു തുള്ളി എണ്ണ പോലും പുറത്തുപോവില്ലെന്ന വാശിയിലാണ് അവര്. ലോകത്തെ വമ്പന് ഷിപ്പിംഗ് കമ്പനിയായ കോസ്കോ പോലും ഇറാന്റെ കരുത്തിന് മുന്നില് മുട്ടുമടക്കി ബുക്കിംഗുകള് നിര്ത്തിവച്ചിരിക്കുകയാണ്.
ഇറാന് ആഗ്രഹിക്കുന്ന രാജ്യങ്ങളുടെ ചരക്കുകള് മാത്രം സുരക്ഷിതമായി ലക്ഷ്യസ്ഥാനത്തെത്തുന്നു. മറ്റുള്ളവര് കടലിന് പുറത്ത് ക്യൂ നില്ക്കുന്നു. ചൈനയെപ്പോലും തങ്ങളോടൊപ്പം നിര്ത്താന് ഇറാന് സാധിക്കുന്നു എന്നത് അവരുടെ നയതന്ത്ര വിജയമാണ്. ചൈനീസ് ബന്ധമുള്ള കപ്പലുകള്ക്ക് ഹോര്മുസില് ‘ഗ്രീന് ചാനല്’ ഒരുക്കി നല്കുന്നതിലൂടെ, തങ്ങളുടെ സുഹൃത്തുക്കള് ആരാണെന്ന് ഇറാന് ലോകത്തിന് കാട്ടിക്കൊടുക്കുന്നു. ചൈനയുമായി നേരിട്ട് ചര്ച്ച നടത്തിക്കൊണ്ട് ഇറാന് തങ്ങളുടെ വ്യാപാരം സുഗമമായി തുടരുന്നു. ഇന്ത്യന് വിദേശകാര്യ മന്ത്രി എസ്. ജയശങ്കര് നേരിട്ട് ഇറാനുമായി ചര്ച്ച നടത്തിയത് ഇറാന്റെ പ്രസക്തി എത്രത്തോളമാണെന്ന് വ്യക്തമാക്കുന്നു. ഇന്ത്യയെപ്പോലൊരു വലിയ വിപണിയെ തഴയാതെ, ഇന്ത്യന് കപ്പലുകള്ക്ക് നിബന്ധനകളോടെ കടന്നുപോകാന് ഇറാന് അനുമതി നല്കിയത് അവരുടെ പക്വതയാര്ന്ന നയതന്ത്രത്തിന്റെ ഭാഗമാണ്.
എപ്പോള്, എവിടെ നിന്ന് ആക്രമണം ഉണ്ടാകുമെന്ന് ആര്ക്കും പ്രവചിക്കാനാവാത്ത അവസ്ഥയാണ് ഇറാന് അവിടെ സൃഷ്ടിച്ചിരിക്കുന്നത്. ‘റാന്ഡം’ ആക്രമണങ്ങള് എന്ന് ലോകം വിശേഷിപ്പിക്കുമ്പോഴും, ഓരോ നീക്കത്തിന് പിന്നിലും കൃത്യമായ ലക്ഷ്യങ്ങളുണ്ടെന്ന് പ്രതിരോധ വിദഗ്ധര് വിലയിരുത്തുന്നു. ഒരു രാജ്യം പോലും ഇറാന്റെ റഡാറുകളില് നിന്ന് രക്ഷപ്പെടുന്നില്ല. ഹോര്മുസ് അടഞ്ഞതോടെ ലോകം ബദല് മാര്ഗ്ഗങ്ങള് തേടി അലയുകയാണ്. ഒമാന് ഉള്ക്കടലില് 400ഓളം കപ്പലുകള് നങ്കൂരമിട്ടിരിക്കുന്നത് ഇറാന്റെ ഒരു വാക്കിന് വേണ്ടിയാണ്. ഫുജൈറയിലേക്കും സൊഹാറിലേക്കും കപ്പലുകള് വഴിതിരിച്ചുവിടേണ്ടി വരുന്നത് ഇറാന്റെ തന്ത്രപരമായ നീക്കത്തിന്റെ വിജയമാണ്. എണ്ണവില കുതിച്ചുയരുമ്പോഴും ഇറാന് തങ്ങളുടെ നിലപാടില് ഉറച്ചുനില്ക്കുന്നു. ആഗോള എണ്ണ വിതരണത്തില് 20 ശതമാനം നിയന്ത്രിക്കുന്ന ഈ പാത അടച്ചിടുന്നതിലൂടെ ലോകത്തിലെ ഏത് വമ്പന് സമ്പദ്വ്യവസ്ഥയെയും തകര്ക്കാന് തങ്ങള്ക്ക് സാധിക്കുമെന്ന് ഇറാന് തെളിയിച്ചു കഴിഞ്ഞു.
