അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ലാൻഡ് ക്രൂസറിന്റെ ഓഫ്-റോഡ് മികവുകൾ നിലനിർത്തി കൊണ്ട് കുറഞ്ഞ വലുപ്പത്തിൽ അവതരിപ്പിക്കുന്ന വാഹനമാണ് ‘എഫ്‌ജെ ക്രൂസർ’. കഴിഞ്ഞ വർഷം നടന്ന ടൊയോട്ടയുടെ വാർഷിക ചടങ്ങിലാണ് ഈ ‘ബേബി ലാൻഡ് ക്രൂസറി’ന്റെ വരവിനെക്കുറിച്ചുള്ള വിവരങ്ങൾ പുറത്തുവന്നത്.
ഇന്ത്യയിൽ നിലവിൽ വിപണിയിലുള്ള ടൊയോട്ട ഫോർച്യൂണറിനോട് (34.16 ലക്ഷം മുതൽ 49.59 ലക്ഷം വരെ) സമാനമായ വിലയിലായിരിക്കും ഈ വാഹനം അവതരിപ്പിക്കുകയെന്നാണ് പ്രതീക്ഷിക്കുന്നത്. അടുത്തിടെ തായ്‌ലൻഡിൽ ലോഞ്ച് ചെയ്ത ഈ മോഡലിന് ഇന്ത്യൻ രൂപ ഏകദേശം 36.37 ലക്ഷത്തോളമാണ് വില നിശ്ചയിച്ചിരിക്കുന്നത്.
ബോക്സി രൂപവും റെട്രോ ശൈലിയും ചേർന്ന വേറിട്ട ഡിസൈനാണ് എഫ്‌ജെ ക്രൂസറിന്റെ പ്രധാന ആകർഷണം. 4,575 എംഎം നീളവും 215 എംഎം ഗ്രൗണ്ട് ക്ലിയറൻസുമുള്ള ഈ വാഹനം കടുപ്പമേറിയ ഓഫ്-റോഡ് യാത്രകൾക്ക് ഏറെ അനുയോജ്യമാണ്. സി-ഷേപ്പ് എൽഇഡി ഡിആർഎല്ലുകൾ, ടൊയോട്ട എന്നെഴുതിയ വലിയ ഗ്രിൽ, റൗണ്ട് അല്ലെങ്കിൽ സ്ക്വയർ ഹെഡ്‌ലൈറ്റുകൾ എന്നിവ വാഹനത്തിന് ഗാംഭീര്യം നൽകുന്നു. ഉൾവശത്ത് 12.5 ഇഞ്ച് വലിയ ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, സൺറൂഫ്, ലെവൽ-2 അഡാസ് സുരക്ഷാ ഫീച്ചറുകൾ, ഏഴ് എയർബാഗുകൾ തുടങ്ങി അത്യാധുനിക സൗകര്യങ്ങളെല്ലാം ടൊയോട്ട ഒരുക്കിയിട്ടുണ്ട്.
ഫോർച്യൂണറിലും ഹൈലക്സിലും പരീക്ഷിച്ച് വിജയിച്ച ടൊയോട്ടയുടെ ഐഎംവി പ്ലാറ്റ്‌ഫോമിലാണ് എഫ്‌ജെ ക്രൂസറും നിർമ്മിക്കുന്നത്. ലാഡർ ഫ്രെയിം ആർക്കിടെക്ചർ ആയതിനാൽ ഏത് കഠിനമായ പാതകളും താണ്ടാൻ ഈ വാഹനത്തിന് സാധിക്കും. രാജ്യാന്തര വിപണിയിൽ 2.7 ലിറ്റർ പെട്രോൾ എൻജിനിലും 2.8 ലിറ്റർ ടർബോ ഡീസൽ എൻജിനിലും വാഹനം ലഭ്യമാണ്. ഇതിൽ ഡീസൽ പതിപ്പിനൊപ്പം 48 വോൾട്ട് മൈൽഡ് ഹൈബ്രിഡ് സാങ്കേതികവിദ്യയും 6-സ്പീഡ് ഓട്ടമാറ്റിക് ഗിയർബോക്സും പാർട്ട് ടൈം 4-വീൽ ഡ്രൈവ് സൗകര്യവുമുണ്ടാകും. ഇന്ത്യൻ വിപണിയിൽ ആദ്യം പെട്രോൾ പതിപ്പും പിന്നീട് ഹൈബ്രിഡ് പതിപ്പും എത്താനാണ് സാധ്യത.
