ക്രിസ്ത്യാനികളെ ഇത്രയും കൂടുതൽ അം​ഗീകരിച്ച രാഷ്ട്രീയ പാർട്ടിവേറെയില്ല, ബിജെപിയുടെ മാന്യതകൊണ്ടാണ് ക്രിസ്ത്യാനികളെ ചുമന്നുകൊണ്ട് നടക്കുന്നതെന്ന് പി സി ജോർജ്

എഫ്‌സിആർഎ (FCRA) ഭേദഗതിയെ എതിർക്കുന്ന ബിഷപ്പുമാരെ കടന്നാക്രമിച്ച് ബിജെപി ദേശീയ നിർവാഹകസമിതി അംഗം പി.സി. ജോർജ്. കുറച്ച് പിതാക്കന്മാർ ഊളത്തരം പറഞ്ഞു നടക്കുകയാണ്. ബിജെപി എന്നു പറഞ്ഞാൽ ഹാലിളകുന്നു. അവർക്ക് തലയ്ക്ക് സ്ഥിരതയില്ലെന്നും അദ്ദേഹം പരിഹസിച്ചു.

ക്രിസ്ത്യാനികളെ ഇത്രയും കൂടുതൽ അം​ഗീകരിച്ച രാഷ്ട്രീയ പാർട്ടിവേറെയില്ലെന്നും പിസി ജോർജ് പറഞ്ഞു. കോൺ​ഗ്രസ് ഭരിച്ചപ്പോൾ പോലും ഇത്രയും ക്രിസ്ത്യൻ മുഖ്യമന്ത്രിമാർ ഉണ്ടായിട്ടില്ല. ഇതൊക്കെ മറച്ചുവെച്ച് ബിഷപ്പുമാർ ഊളത്തരം പറയാൻ പാടില്ലെന്നും ജോർജ് പറഞ്ഞു.

കുറച്ച് പിതാക്കന്മാർ കോൺ​ഗ്രസ് വരണമെന്ന അബദ്ധവിചാരവുമായി നടക്കുകയാണെന്നും അവർ ഇതിനപ്പുറത്തെ വർത്തമാനം പറയുമെന്നും പി സി ജോർജ് പറഞ്ഞു. താൻ ഇതും പരി​ഗണിക്കുന്നില്ല, ക്രിസ്ത്യാനികളും പരി​ഗണിക്കില്ല. നിയമഭേദ​ഗതിയിൽ ആർക്കും ആശങ്ക ആവശ്യമില്ലെന്നും അദ്ദേഹം കൂട്ടിച്ചേർത്തു.

രാജ്യത്ത് രണ്ടേകാൽ ശതമാനം മാത്രമാണ് ക്രിസ്ത്യാനികളെന്നും ബിജെപിയുടെ മാന്യതകൊണ്ടാണ് ക്രിസ്ത്യാനികളെ ചുമന്നുകൊണ്ട് നടക്കുന്നതെന്നും അദ്ദേഹം അവകാശപ്പെട്ടു.