അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.വട്ടിയൂർക്കാവ് നിയമസഭാ മണ്ഡലത്തിലെ എൻഡിഎ സ്ഥാനാർത്ഥി ആർ. ശ്രീലേഖ തിരഞ്ഞെടുപ്പ് പ്രചാരണ പരിപാടിക്കിടെ വേദി വിട്ടിറങ്ങിയത്. കേന്ദ്രമന്ത്രി എസ്. ജയശങ്കർ ഓൺലൈനായി പങ്കെടുത്ത പരിപാടിയിൽ, തന്റെ പേര് പരാമർശിക്കാത്തതിൽ പ്രതിഷേധിച്ചാണ് ശ്രീലേഖ ചടങ്ങ് ബഹിഷ്‌കരിച്ചത്. വട്ടിയൂർക്കാവ് മണ്ഡലത്തിലെ പ്രമുഖ വ്യക്തികളുമായി സംവദിക്കാൻ മസ്‌കറ്റ് ഹോട്ടലിൽ സംഘടിപ്പിച്ച പരിപാടിയിലാണ് നാടകീയമായ ഈ സംഭവങ്ങൾ അരങ്ങേറിയത്. കേന്ദ്രമന്ത്രി പ്രസംഗം തുടങ്ങിയതിന് പിന്നാലെ അതൃപ്തി പ്രകടിപ്പിച്ച് ശ്രീലേഖ വേദിയിൽ നിന്ന് പുറത്തേക്ക് പോകുകയായിരുന്നു.
തനിക്ക് വേണ്ടി വോട്ട് അഭ്യർത്ഥിക്കാൻ സംഘടിപ്പിച്ച പ്രത്യേക യോഗത്തിൽ, കേന്ദ്രമന്ത്രി എസ്. ജയശങ്കർ സ്ഥാനാർത്ഥിയായ തന്റെ പേരോ മണ്ഡലത്തിന്റെ പേരോ പരാമർശിച്ചില്ലെന്നതാണ് ശ്രീലേഖയെ ചൊടിപ്പിച്ചത്. ഉദ്ഘാടന പ്രസംഗത്തിലുടനീളം തിരുവനന്തപുരം ലോക്‌സഭാ സ്ഥാനാർത്ഥി രാജീവ് ചന്ദ്രശേഖറിനെ കുറിച്ച് സംസാരിക്കുകയും അദ്ദേഹത്തിന് വോട്ട് അഭ്യർത്ഥിക്കുകയും ചെയ്ത കേന്ദ്രമന്ത്രി, വട്ടിയൂർക്കാവിനെ പറ്റി ഒന്നും സംസാരിച്ചില്ല. സ്വന്തം മണ്ഡലത്തിൽ തനിക്കായി ഒരുക്കിയ വേദിയായിട്ടും അർഹമായ പരിഗണന ലഭിച്ചില്ലെന്ന നിലപാടിൽ ഉറച്ചുനിന്ന ശ്രീലേഖ ഉടൻ തന്നെ വേദി വിടുകയായിരുന്നു.
സംഭവം വൻ വിവാദമായതോടെ ബിജെപി സംസ്ഥാന നേതാക്കളായ എസ്. ഓമന, വി.വി. രാജേഷ് എന്നിവരും ആർഎസ്എസ് ഭാരവാഹികളും ചേർന്ന് ശ്രീലേഖയെ അനുനയിപ്പിക്കാൻ ശ്രമം നടത്തി. സ്ഥാനാർത്ഥി പരിപാടിയിൽ നിന്ന് വിട്ടുനിൽക്കുന്നത് പ്രചാരണത്തിന്റെ അവസാന ഘട്ടത്തിൽ വലിയ രാഷ്ട്രീയ തിരിച്ചടിയാകുമെന്ന് കണ്ടാണ് നേതാക്കൾ അടിയന്തരമായി ഇടപെട്ടത്. ഒടുവിൽ നേതാക്കളുടെ നിരന്തരമായ അഭ്യർത്ഥനയെത്തുടർന്ന് ശ്രീലേഖ തിരികെ വേദിയിലെത്തി പരിപാടിയിൽ പങ്കെടുത്തു.
