അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.മലയാള സിനിമയിലെ ആക്ഷൻ മാസ്റ്റർ ഷാജി കൈലാസ് സംവിധാനം ചെയ്യുന്ന ഏറ്റവും പുതിയ ചിത്രം ‘വരവ്’ മെയ് മാസത്തിൽ തീയേറ്ററുകളിലെത്തുന്നു. ചിത്രത്തിന്റെ ആവേശമുണർത്തുന്ന ആദ്യ ടീസർ വിഷുദിനമായ ഏപ്രിൽ 15-ന് പുറത്തിറങ്ങി. മലഞ്ചരക്കിന്റെ സുഗന്ധമുള്ള ഒരു നസ്രാണി കുടുംബത്തിന്റെ പശ്ചാത്തലത്തിൽ, ഉദ്യോഗഭരിതമായ ഒരു പ്രതികാര കഥയാണ് ചിത്രം പറയുന്നത്. ഷാജി കൈലാസിന്റെ നിരവധി ഹിറ്റ് ചിത്രങ്ങൾക്ക് തിരക്കഥയൊരുക്കിയ എ.കെ. സാജൻ തന്നെയാണ് ഈ ചിത്രത്തിന്റെയും രചന നിർവ്വഹിച്ചിരിക്കുന്നത് എന്നത് പ്രേക്ഷകരുടെ പ്രതീക്ഷ വർദ്ധിപ്പിക്കുന്നു.
എ.കെ. പോൾസൺ എന്ന കാട്ടുങ്കൽ പോളച്ചൻ എന്ന കേന്ദ്ര കഥാപാത്രത്തെ ജോജു ജോർജ് അവിസ്മരണീയമാക്കുന്നു. നാല് വർഷം മുൻപ് കാണാതായ തന്റെ അനിയൻ തിരിച്ചു വന്നതായും അവന് തന്നോട് എന്തോ പകയുള്ളതായും സൂചിപ്പിക്കുന്ന സംഭാഷണങ്ങളോടെയാണ് ടീസർ തുടങ്ങുന്നത്. കമ്പിളിപ്പാറ പോലീസ് സ്റ്റേഷനിൽ നിന്നും പത്തു ദിവസത്തെ പരോളിൽ ഇറങ്ങുന്ന പോളച്ചന്റെ ജീവിതത്തിലെ നിർണ്ണായക സംഭവങ്ങളാണ് ചിത്രം അവതരിപ്പിക്കുന്നത്. “അവൻ നമ്മളോട് ചെയ്തതിനൊക്കെ പകരം വീട്ടാൻ ഈ പത്തു ദിവസം മതിയാവുമോടാ” എന്ന ടീസറിലെ ഡയലോഗ് ഒരു കടുത്ത പ്രതികാര കഥയുടെ സൂചന നൽകുന്നു.
മധ്യതിരുവിതാംകൂറിലെ പ്രബലമായ സാമൂഹ്യ-രാഷ്ട്രീയ പശ്ചാത്തലവും അവർക്കിടയിലെ കിടമത്സരവുമാണ് ‘വരവ്’ എന്ന സിനിമയുടെ ഇതിവൃത്തം. ചിത്രത്തിലെ ഓരോ കഥാപാത്രങ്ങളും സമൂഹത്തിന്റെ പ്രതിനിധികളായാണ് അനുഭവപ്പെടുന്നത്. തുടക്കം മുതൽ ഒടുക്കം വരെ ആകാംക്ഷ നിലനിർത്തുന്ന ചിത്രത്തിൽ എട്ട് മികച്ച ആക്ഷൻ രംഗങ്ങളാണ് ഒരുക്കിയിരിക്കുന്നത്. സമീപകാല മലയാള സിനിമയിലെ ഏറ്റവും മികച്ച ആക്ഷൻ ചിത്രങ്ങളിൽ ഒന്നായിരിക്കും ‘വരവ്’ എന്നാണ് ടീസറിലെ ദൃശ്യങ്ങൾ നൽകുന്ന ഉറപ്പ്.
ഓൾഗ പ്രൊഡക്ഷൻസിന്റെ ബാനറിൽ നൈസി റെജി നിർമ്മിക്കുന്ന ഈ ബിഗ് ബജറ്റ് ചിത്രത്തിൽ വലിയൊരു താരനിര തന്നെയുണ്ട്. അർജുൻ അശോകൻ, മുരളി ഗോപി എന്നിവർ സുപ്രധാന വേഷങ്ങളിൽ എത്തുമ്പോൾ ബാബുരാജ്, ബൈജു സന്തോഷ്, ദീപക് പറമ്പോൾ, സാനിയ ഇയ്യപ്പൻ തുടങ്ങിയവർ മറ്റു പ്രധാന വേഷങ്ങൾ കൈകാര്യം ചെയ്യുന്നു. ഏറെക്കാലത്തിന് ശേഷം സുകന്യ, വാണി വിശ്വനാഥ് എന്നിവരുടെ സാന്നിധ്യവും ചിത്രത്തിന്റെ സവിശേഷതയാണ്. കൂടാതെ അഭിമന്യു, ഷമ്മി തിലകൻ, വിൻസി അലോഷ്യസ് തുടങ്ങി നിരവധി പ്രമുഖ താരങ്ങളും ചിത്രത്തിൽ അണിനിരക്കുന്നുണ്ട്.
ജോമി ജോസഫ്, രാഹുൽ റെജി എന്നിവർ എക്സിക്യൂട്ടീവ് പ്രൊഡ്യൂസർമാരായ ചിത്രത്തിന്റെ ഛായാഗ്രഹണം നിർവ്വഹിക്കുന്നത് എസ്. ശരവണനാണ്. ഷമീർ മുഹമ്മദ് എഡിറ്റിംഗും സാബു റാം കലാസംവിധാനവും നിർവ്വഹിക്കുന്നു. സജി കാട്ടാക്കട (മേക്കപ്പ്), സമീര സനീഷ് (കോസ്റ്റ്യൂം), വിനോദ് മംഗലത്ത് (പ്രൊഡക്ഷൻ കൺട്രോളർ) എന്നിവരാണ് മറ്റു സാങ്കേതിക പ്രവർത്തകർ. മൂന്നാർ, കാന്തല്ലൂർ, തേനി, വാഗമൺ, മുണ്ടക്കയം, കോട്ടയം എന്നിവിടങ്ങളിലായി ചിത്രീകരണം പൂർത്തിയാക്കിയ ‘വരവ്’ സോഷ്യൽ മീഡിയയിൽ ഇതിനോടകം തന്നെ വലിയ തരംഗമായി മാറിക്കഴിഞ്ഞു.
