അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കൊച്ചിയിൽ ലഹരിവേട്ട തുടരുന്നു. കളമശ്ശേരി വട്ടേക്കുന്നത്തെ ലോഡ്ജിൽ പൊലീസ് നടത്തിയ റെയ്ഡിൽ മാരക ലഹരിമരുന്നുകളുമായി രണ്ടുപേർ പിടിയിലായി.
ഇടപ്പള്ളി സ്വദേശി സിയാദ് (42), കൊല്ലം ചിതറ സ്വദേശി ആദിൽ അൻസാർ (24) എന്നിവരെയാണ് കൊച്ചി സിറ്റി പോലീസ് പിടികൂടിയത്.
ഇവരിൽ നിന്ന് 6.79 ഗ്രാം എം ഡി എം എയും 56.98 ഗ്രാം കഞ്ചാവും പിടിച്ചെടുത്തു. കൊച്ചി സിറ്റി പോലീസ് കമ്മീഷണർക്ക് ലഭിച്ച രഹസ്യവിവരത്തെത്തുടർന്ന് നാർക്കോട്ടിക് സെൽ അസിസ്റ്റന്റ് കമ്മീഷണറുടെ നേതൃത്വത്തിലുള്ള ഡാൻസാഫ് ടീമാണ് പരിശോധന നടത്തിയത്.
കഴിഞ്ഞ ദിവസം തൃക്കാക്കരയിൽ ലഹരിമരുന്നുമായി പിടിയിലായ കെവിൻ ബി. മാത്യുവിൽ നിന്നാണ് ഇവർക്ക് മയക്കുമരുന്ന് ലഭിച്ചതെന്ന് പ്രാഥമിക അന്വേഷണത്തിൽ വ്യക്തമായി.
കൊച്ചിയിലെ പ്രധാന ലഹരി വിതരണ ശൃംഖലയിലെ കണ്ണികളാണ് പിടിയിലായവരെന്നാണ് പോലീസ് നൽകുന്ന സൂചന. ഇവരുടെ ഇടപാടുകാരെക്കുറിച്ചും ലഹരിമരുന്നിന്റെ കൂടുതൽ ഉറവിടങ്ങളെക്കുറിച്ചും പൊലീസ് വിശദമായ അന്വേഷണം ആരംഭിച്ചിട്ടുണ്ട്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.
