അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പതിനാറാം കേരള നിയമസഭയില് 35 വര്ഷത്തിനു ശേഷം ചരിത്രം പിറന്നിരിക്കുകയാണ്. ഒരു വനിതാ ഡെപ്യൂട്ടി സ്പീക്കര് 99 വോട്ടു നേടി വിജയിച്ചിരിക്കുന്നു. യു.ഡി.എഫ് വനിതാ എം.എല്.എ ആയ ഷാനിമോള് ഉസ്മാനാണ് പതിനാറാം നിയമസഭയുടെ വനിതാ ഡെപ്യൂട്ടി സ്പീക്കര്. ഇന്നു രാവിലെ ആരംഭിച്ച നിയമസഭാ സമ്മേളനത്തിന്റെ തുടക്കം തന്നെ ഡെപ്യൂട്ടി സ്പീക്കര് തെരഞ്ഞെടുപ്പ് പ്രക്രിയ ആയിരുന്നു. സ്പീക്കര് തിരുവഞ്ചൂര് രാധാകൃഷ്ണന്റെ നിര്ദ്ദേശാനുസരണം വോട്ടെടുപ്പ് നടത്തി. പ്രതിപക്ഷത്തു നിന്നും സി.പി.ഐ എം.എല്.എ മുഹമ്മദ് മൊഹ്സിന് ആയിരുന്നു മത്സരിച്ചത്. 99 വോട്ടുകള് നേടിയ ഷാനിമോള് ഉസ്മാന് ഡപ്യൂട്ടി സ്പീക്കറായി തിരഞ്ഞെടുക്കപ്പെട്ടു.
മുഹമ്മദ് മൊഹ്സിന് 34 വോട്ടുമാണ് ലഭിച്ചത്. ബി.ജെ.പിയുടെ 3 എം.എല്.എമാരും വോട്ടെുപ്പില് നിന്നും വിട്ടുനിന്നു. എന്നാല്, സ്പീക്കര് തെരഞ്ഞെടുപ്പില് ബി.ജെ.പി സ്ഥാനാര്ത്ഥിയെ നിര്ത്തിയിരുന്നു. സ്പീക്കര് തിരുവഞ്ചൂര് രാധാകൃഷ്ണന് വോട്ടു ചെയ്തില്ല. സ്പീക്കറെ ഒഴിച്ചു നിര്ത്തിയാല് സ്വതന്ത്രര് അടക്കം യു.ഡി.എഫിന് 101 സീറ്റുകള് ഉള്ളതിനാല് ഷാനിമോള് ഉസ്മാന്റെ വിജയം ഉറപ്പായിരുന്നു. കേരള നിയമസഭയുടെ ചരിത്രത്തിലെ നാലാമത്തെ വനിതാ ഡപ്യൂട്ടി സ്പീക്കറാണ് ഷാനിമോള് ഉസ്മാന്. 35 വര്ഷത്തിനു ശേഷമാണ് കേരള നിയമസഭയ്ക്ക് വനിതാ ഡപ്യൂട്ടി സ്പീക്കറെ ലഭിക്കുന്നത്.
ഡെപ്യൂട്ടി സ്പീക്കര് തെരഞ്ഞെടുപ്പ് പൂര്ത്തിയായ ശേഷം പ്രതിപക്ഷ ബെഞ്ചിലെ ആദ്യ സീറ്റില് ഷാനിമോള് ഉസ്മാന് ഔദ്യോഗികമായി സ്ഥാനം ഉറപ്പിച്ചു. തുടര്ന്ന് നിയമസഭാ സമ്മേളനത്തിന്റെ ആദ്യഘട്ടമെന്ന നിലയില് ചരമോപചാര പ്രമേയം സ്പീക്കര് വായിച്ചു. അന്തരിച്ച മുന് കേന്ദ്രമന്ത്രി കെ.പി.ഉണ്ണിക്കൃഷ്ണന്, മുന് എം.പി കെ.പി.ധനപാലന്, മുന് മന്ത്രി ടി.യു.കുരുവിള എന്നിവര്ക്ക് നിയമസഭ ചരമോപചാരം അര്പ്പിച്ചു. തുടര്ന്ന് പ്രതിപക്ഷത്തിന്റെ ആദ്യ അടിയന്തരപ്രമേയം സഭയില് അവതരിപ്പിച്ചു. പെട്രോള് ഉത്പ്പന്നങ്ങളുടെ അമിത വിലവര്ദ്ധനയും അവശ്യ സാധനങ്ങളുടെ വിലക്കയറ്റവും ദുസ്സഹമാക്കുന്ന ജനജീവിതം ചൂണ്ടിക്കാട്ടിയായിരുന്നു അടിയന്തിര പ്രമേയം.
തുടര്ന്ന് സബ്മിഷനും ശ്രദ്ധക്ഷണിക്കലും കഴിഞ്ഞ് ഗവര്ണറുടെ നയപ്രഖ്യാപന പ്രസംഗത്തിനുള്ള നന്ദിപ്രമേയ ചര്ച്ച നടക്കും. നാളെയും മറ്റന്നാളും ചര്ച്ച തുടരും. ചോദ്യോത്തരവേള ഈ ദിവസങ്ങളില് ഒഴിവാക്കി. രണ്ടാഴ്ചത്തെ ഇടവേളയ്ക്കു ശേഷം 19ന് മുഖ്യമന്ത്രി വി.ഡി.സതീശന് യുഡിഎഫ് സര്ക്കാരിന്റെ ആദ്യ ബജറ്റ് അവതരിപ്പിക്കും. 22, 23, 24 തീയതികള് ബജറ്റിന്മേല് ചര്ച്ച നടക്കും. തുടര്ന്ന് ഇടവേളയ്ക്കു ശേഷം 29നാണു സഭ ചേരുക. 29നും 30നും ധനാഭ്യര്ഥനകളിന്മേലുള്ള ചര്ച്ചയാണ്. ജൂലൈ ഒന്നിന് ധനവിനിയോഗ ബില്ലിന്മേലുള്ള ചര്ച്ചകള് പൂര്ത്തിയാക്കി സഭ പിരിയും.
