അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ബി.ജെ.പിയുമായി ഏറ്റുമുട്ടാന് ഇല്ലെന്ന് എന്.എസ്.എസ് ജനറല് സെക്രട്ടറി ജി.സുകുമാരന് നായര്. എന്.എസ്.എസിനെ വിമര്ശിച്ച ഉപരാഷ്ട്രപതിയെയും സുരേഷ് ഗോപിയെയും ബി.ജെ.പി സംസ്ഥാന അധ്യക്ഷന് രാജീവ് ചന്ദ്രശേഖര് തന്നെ തിരുത്തിയിട്ടുണ്ടെന്നും സുകുമാരന് നായര് പറഞ്ഞു. ഉപരാഷ്ട്രപതി സി.പി രാധാകൃഷ്ണന്റെയും കേന്ദ്രമന്ത്രി സുരേഷ് ഗോപിയുടെയും വിമര്ശനത്തിന് പിന്നാലെ സുകുമാരന് നായരെ പിന്തുണച്ച് രാജീവ് ചന്ദ്രശേഖര് രംഗത്തെത്തിയിരുന്നു. ”സുകുമാരന് നായര്ക്കെതിരെ ബി.ജെ.പി’ എന്ന തരത്തില് ചിലര് പ്രചരിപ്പിക്കുന്ന വാര്ത്തകള് സത്യവിരുദ്ധവും വസ്തുതാവിരുദ്ധവുമാണ്.
എന്.എസ്.എസിന്റെ ആഭ്യന്തര കാര്യങ്ങളില് ഒരുകാലത്തും ബി.ജെ.പി ഇടപെട്ടിട്ടില്ല, ഇടപെടുകയുമില്ല” എന്നാണ് അദ്ദേഹം വ്യക്തമാക്കിയത്. സുകുമാരന് നായര്ക്കൊപ്പമുള്ള ഫോട്ടോയും സമൂഹമാധ്യമങ്ങളില് പങ്കുവച്ചിരുന്നു. കേരള സന്ദര്ശനത്തിനിടെ മന്നം സമാധിയില് പുഷ്പാര്ച്ചന നടത്താന് അനുവദിച്ചില്ലെന്ന ആരോപണത്തിലായിരുന്നു ഉപരാഷ്ട്രപതി സി.പി രാധാകൃഷ്ണന് ഇന്നലെ സുകുമാരന് നായര്ക്കെതിരെ പരോക്ഷമായി രംഗത്ത് വന്നത്. നിങ്ങളാണ് എല്ലാമെന്ന് കരുതരുതെന്നായിരുന്നു ഡല്ഹിയിലെ മന്നം സ്മൃതി മണ്ഡപത്തിന്റെ അനാച്ഛാദന പരിപാടിക്കിടയിലെ അദ്ദേഹത്തിന്റെ വിമര്ശനം. എല്ലാം മന്നത്ത് പത്മനാഭന്റെ സംഭാവനയാണ്.
താനാണ് ജനറല് സെക്രട്ടറി, ഇന്നയാള് വരരുത് എന്ന് പറയരുതെന്നും അദ്ദേഹം മുന്നറിയിപ്പ് നല്കിയിരുന്നു. എല്ലാവര്ക്കും വരാനാകണം എന്ന നയമാണ് സ്വീകരിക്കേണ്ടതെന്നും സി.പി രാധാകൃഷ്ണന് ചൂണ്ടിക്കാട്ടിയിരുന്നു. പെരുന്ന സ്വയം ശുദ്ധീകരിക്കപ്പെടുമെന്നായിരുന്നു കേന്ദ്ര സഹമന്ത്രി സുരേഷ് ഗോപി വിഷയത്തില് പ്രതികരിച്ചിരുന്നത്. ഒന്നുകില് ഇരിക്കുന്നവര് ശുദ്ധീകരിക്കും അല്ലെങ്കില് സ്വയം ശുദ്ധീകരിക്കപ്പെടും എന്നായിരുന്നു അദ്ദേഹത്തിന്റെ പ്രതികരണം. തെരഞ്ഞെടുപ്പിന് ശേഷം വലിയ മാറ്റങ്ങള് കണ്ട് തുടങ്ങിയിട്ടുണ്ടെന്നും ബദല് മാര്ഗങ്ങളും ഉയര്ന്ന് വരട്ടെ എന്നും സുരേഷ് ഗോപി പറഞ്ഞിരുന്നു.
