അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.അനുമോദന ചടങ്ങില് വിദ്യാര്ഥികളെ പരസ്യമായി അപമാനിച്ച സംഭവത്തില് മുന് മന്ത്രി കെ.ടി ജലീലിന് തെറ്റുപറ്റിയെന്ന് അന്വേഷണ റിപ്പോര്ട്ട്. സംഭവത്തില് അന്വേഷണം നടത്തിയ ചൈല്ഡ് പ്രൊട്ടക്ഷന് ഓഫീസര്, വനിത ശിശുക്ഷേമ വകുപ്പ് മന്ത്രി ബിന്ദു കൃഷ്ണയ്ക്ക് റിപ്പോര്ട്ട് സമര്പ്പിച്ചു. റിപ്പോര്ട്ടിന്റെ അടിസ്ഥാനത്തില് നടപടികളുമായി മുന്നോട്ട് പോകുമെന്ന് വനിത ശിശുക്ഷേമ വകുപ്പ് വ്യക്തമാക്കി. കെ.ടി ജലീല് തെറ്റ് തിരിച്ചറിയണമെന്നും കുട്ടികളോട് ഇങ്ങനെയല്ല പെരുമാറേണ്ടതെന്നും ബിന്ദു കൃഷ്ണ പറഞ്ഞു.
അതേസമയം വിദ്യാര്ത്ഥികള് പങ്കെടുക്കുന്ന പരിപാടികളില് വിദ്യാര്ഥികളുമായി സംവദിക്കുന്ന ശീലം തനിക്കുണ്ട്. താനൊരു അധ്യാപകനാണെന്നും ജലീല് പറഞ്ഞു.”വിദ്യാര്ഥികളോട് പല ചോദ്യങ്ങളും ചോദിച്ചു. കുട്ടികള്ക്ക് അറിവുണ്ടെങ്കിലും പൊതുവായന കുറവാണെന്ന് തോന്നി. കുട്ടികള്ക്ക് പൊതുവായന കുറഞ്ഞു വരികയാണ്. അതൊരു പൊതുപ്രശ്നമാണ്. അപ്പോഴേ സമൂഹത്തെക്കുറിച്ച് അവര്ക്ക് അവബോധം ഉണ്ടാകൂ. കുട്ടികളുമായി അധ്യാപകന് എന്ന നിലയിലാണ് സംസാരിച്ചത്. ചെവിക്ക് സാധാരണ പിടിക്കുന്നത് പോലെ പിടിച്ചതാണ്. വേദനിപ്പിക്കാന് വേണ്ടി പിടിച്ചില്ല. അങ്ങനെ ആ കുട്ടിക്കും തോന്നിയിട്ടില്ല. അതില് ഏതെങ്കിലും കുട്ടിയോ രക്ഷിതാവോ അപമാനം തോന്നി എന്ന് പറഞ്ഞാല് ക്ഷമ ചോദിക്കും.
അക്ഷരം അറിയാം എഴുതാന് അറിയില്ലേ എന്നാണ് ചോദിച്ചത്. എഴുതാന് പറഞ്ഞ കുട്ടികളൊക്കെ ശരിയായി എഴുതി. ഒരാളാണ് തെറ്റിച്ചത്. അപ്പോള് രസകരമായി ചെവിക്ക് പിടിക്കുകയാണ് ചെയ്തത്. ആരും അക്കാര്യത്തില് ഒരു പരാതി പറഞ്ഞിട്ടില്ല. ആരും അക്കാര്യത്തില് ഒരു പരാതി പറഞ്ഞിട്ടില്ല. ഇതിനെ വലിയ രീതിയില് വിവാദമാക്കി. എംഎസ്എഫ് ഇതില് ബാലാവകാശ കമ്മീഷന് പരാതി നല്കി. ബാലാവകാശ കമ്മീഷന് കേസെടുക്കുന്നതിനെ സ്വാഗതം ചെയ്യുന്നു. താന് ജാമ്യത്തിന് പോകില്ല. ജയിലില് പോകാന് തയ്യാറാണ്. വിവാദത്തിലൂടെ പൊതുവിദ്യാഭ്യാസത്തെ താറടിക്കാനും പലരും ശ്രമിച്ചു. കുട്ടികളെ പൊതുവിദ്യാഭ്യാസത്തിന്റെ ഭാഗമാക്കണമെന്ന് ആവശ്യപ്പെടുന്നയാളാണ് താന്. കഴിഞ്ഞ 10 വര്ഷം പഠിച്ചയാളായതുകൊണ്ടാണോ ഒരാള് കേരളത്തെ കാരളം എന്ന് എഴുതിയത്. മയ,കുയി,പുയ എന്നൊക്കെ മുതിര്ന്നവര് പോലും പറയുന്നത് കഴിഞ്ഞ 10 വര്ഷം പഠിച്ചവരാണോ. ഇവര്ക്കൊന്നും ഇങ്ങനെ കറക്ട് ചെയ്ത് കൊടുക്കാന് ആളില്ലാത്തതുകൊണ്ടാണ് പ്രശ്നം” ജലീല് വിശദമാക്കി.
മണ്ണാര്ക്കാട് നഗരസഭയിലെ വിജയോത്സവം ഉദ്ഘാടന വേളയിലായിരുന്നു സംഭവം. പ്ലസ് ടു, പത്താം ക്ലാസ്സ് പരീക്ഷകളില് ഉന്നത വിജയം നേടിയ വിദ്യാര്ത്ഥികളെ ആദരിക്കുന്ന ചടങ്ങിലാണ് കുട്ടികളെ അപമാനിച്ചു വിട്ടത്. അക്ഷരത്തെറ്റ് വരുത്തിയ കുട്ടിയെ സ്റ്റേജില് വിളിച്ചു വരുത്തി ചെവിയില് നുള്ളുന്നതും ദൃശ്യങ്ങളില് കാണാം. ജലീലിന്റെ നടപടി ബാലാവകാശ ലംഘനമാണെന്നു ചൂണ്ടിക്കാട്ടി എംഎസ്എഫ് രംഗത്തെത്തിയിരുന്നു.
