അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പ്രസ്ഥാനത്തിന്റെ ആവശ്യത്തിന് വേണ്ടി മുഖ്യമന്ത്രിയെ വിളിച്ചിട്ട് മറുപടി പോലും തന്നില്ലെന്ന് ജനറല് സെക്രട്ടറി ജി. സുകുമാരന് നായര് പ്രതികരിച്ചിരിക്കുകയാണ്. കൂടിക്കാഴ്ചക്ക് അനുമതി നല്കിയെന്ന് മുഖ്യമന്ത്രി പറഞ്ഞത് പച്ചക്കള്ളമാണ്. ഇനി മുഖ്യമന്ത്രിയെ കാണാന് താനില്ലെന്നും സുകുമാരന് നായര് പറഞ്ഞതോടെ ഒരു കാര്യത്തില് സംശയം വര്ദ്ധിച്ചിരിക്കുകയാണ്. ആരാണ് കള്ളം പറയുന്നത്. മുഖ്യമന്ത്രിക്കും സുകുമാരന് നായക്#ക്കും മാത്രം അറിയാവുന്ന ഫോണ് സംഭാഷണങ്ങളും, വിവരങ്ങളുമാണ് പുറത്തേക്കു വന്നുകൊണ്ടിരിക്കുന്നത്. ഇതില് ആര് പറയുന്നതാണ് വസ്തുത. ഇന്നു രാവിലെ മന്ത്രിസഭാ യോഗത്തിനു ശേഷം മാധ്യമ പ്രവര്ത്തകരെ കണ്ട ശേഷമാണ് മുഖ്യമന്ത്രി വി.ഡി. സതീശന് എന്.എസ്.എസ്. ജനറല് സെക്രട്ടറി ജി. സുകുമാരന് നായരുമായി ഒരു പ്രശ്നവുമില്ലെന്ന് പറഞ്ഞത്.
താന് മുഖ്യമന്ത്രിയല്ലേ, തന്നെ ആര്ക്കും കാണാമെന്നാണ് അദ്ദേഹം പറഞ്ഞത്. തന്നെ കാണാണമെന്ന് ആവശ്യപ്പെട്ടപ്പോള് അനുമതി നല്കിയെന്നാണ് മുഖ്യമന്ത്രി പറഞ്ഞത്. ബജറ്റിന്റെ തിരക്കായതോടെ പിന്നെ കൂടിക്കാഴ്ച ഒഴിവായെന്നും, എപ്പോള് വേണമെങ്കിലും കാണാമെന്നുമായിരുന്നു മുഖ്യമന്ത്രി പറഞ്ഞത്. എന്നാല്, കാര്യങ്ങള് അങ്ങനെയൊന്നുമല്ല എന്നാണ് ജി. സുകുമാരന് നായര് പ്രതികരിച്ചത്. ഒപ്പം മുഖ്യമന്ത്രി വി.ഡി സതീശനെതിരെ എന്.എസ്.എസ് നിലപാട് കടുപ്പിക്കുകയും ചെയ്തു. മുന് മുഖ്യമന്ത്രി പിണറായി വിജയനെ വിളിച്ചാല് തിരിച്ചുവിളിക്കുകയോ മെസ്സേജ് അയക്കുകയോ ചെയ്യുമായിരുന്നെന്നും സുകുമാരന് നായര് പറഞ്ഞു. സുകുമാരന് നായര് തന്റെ പി.എയെ വിളിച്ചിരുന്നെന്നും പിന്നീട് താന് അദ്ദേഹത്തെ തിരിച്ചുവിളിച്ച് സംസാരിക്കുകയും കാണാമെന്ന് സമ്മതിക്കുകയും ചെയ്തിരുന്നുവെന്നുമാണ് ഇന്ന് മുഖ്യമന്ത്രി വാര്ത്തസമ്മേളനത്തില് പറഞ്ഞിരുന്നത്. ഇതിനോടാണ് സുകുമാരന് നായരുടെ പ്രതികരണം.
‘വിളിച്ചപ്പോള് ആദ്യത്തെ പ്രാവശ്യം പറഞ്ഞത് എറണാകുളത്ത് വന്നാല് കാണാമെന്നാണ്. എറണാകുളത്ത് ചെന്ന് കാണേണ്ടതല്ല എന്ന് ഞാന് പ്രൈവറ്റ് സെക്രട്ടറിയോട് പറയുകയും ചെയ്തു. മുഖ്യമന്ത്രിയോട് ചോദിച്ചിട്ട് പറയാം എന്ന് അയാള് പറഞ്ഞു. അതിനുശേഷം മുഖ്യമന്ത്രിയും വിളിച്ചിട്ടില്ല, പി.എയും വിളിച്ചിട്ടില്ല’ -സുകുമാരന് നായര് പറഞ്ഞു.
തെരഞ്ഞെടുപ്പില് ഇവിടെ വന്ന് നമ്മളുടെ പിന്തുണ ആവശ്യപ്പെടുകയും ഞങ്ങള് പരസ്യമായി പിന്തുണ അവര്ക്ക് നാട്ടില് കൊടുക്കുകയും ചെയ്തു. പ്രവര്ത്തകരും കരയോഗങ്ങളുമെല്ലാം സജീവമായിട്ട് ഇദ്ദേഹത്തിന് വേണ്ടി പ്രവര്ത്തിച്ചു. ജയിക്കുകയും ചെയ്തു. അതിനുശേഷമാണ് പെട്ടെന്ന് ഇങ്ങനെ ഒരു വെളിപാട് ഉണ്ടാവുന്നത്. അതെന്തുകൊണ്ടാണെന്ന് എനിക്കറിഞ്ഞുകൂടാ. മുമ്പുള്ള മുഖ്യമന്ത്രിമാര് ആരും ഇങ്ങനെ പെരുമാറിയിട്ടില്ല. പിണറായി വിജയനെ ഞാന് അവിടെ പോയി കണ്ടിട്ടില്ല. പക്ഷേ പിണറായി വിജയനെ ഫോണില് വിളിച്ചാല് അദ്ദേഹം ഫ്രീ ആണെങ്കില് ഫോണ് ഉടനെ എടുക്കും. അല്ലെങ്കില് ഉടന് തന്നെ മെസ്സേജ് അയക്കും. തിരിച്ചു വിളിക്കുകയും ചെയ്യും. അതാണ് നമ്മുടെ അനുഭവം. മുഖ്യമന്ത്രിയെ കാണാന് ഇനി വ്യക്തിപരമായി താല്പര്യമില്ലെന്നും സുകുമാരന് നായര് പറഞ്ഞു.
കേന്ദ്ര മന്ത്രി സുരേഷ് ഗോപിയുടെ വിമര്ശനത്തോടും സുകുമാരന് നായര് പ്രതികരിച്ചു. ‘സുരേഷ് ഗോപി എന്തുചെയ്യുമെന്നാണ് പറയുന്നത്. ചൂലുകൊണ്ട് അടിച്ചുവാരുമെന്നാണോ പറയുന്നത്. ‘അമ്മ’ എന്ന് പറയുന്ന ഒരു സംഘടനയുണ്ടല്ലോ. അദ്ദേഹം അവിടെ പോയി ശുദ്ധീകരിക്കട്ടെ. എന്എസ്എസിനെ തീര്ക്കുമെന്ന് പറഞ്ഞിട്ടുള്ളവരെല്ലാം സ്വയം തീര്ന്നിട്ടേയുള്ളൂ. എന്എസ്എസിനെതിരായ പ്രസ്താവനകള്ക്ക് പിന്നില് സുരേഷ് ഗോപിയുടെ രാഷ്ട്രീയ ലക്ഷ്യങ്ങളുണ്ട്. അതിലേക്ക് ഉപരാഷ്ട്രപതിയെ കൂടി വലിച്ചിഴച്ചുവെന്നും സുകുമാരന് നായര് പറഞ്ഞു.
