അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.വിഴിഞ്ഞത്ത് കടലില് കാണാതായ മത്സ്യത്തൊഴിലാളി ജോണിന്റെ വീട് ആഭ്യന്തരമന്ത്രി രമേശ് ചെന്നിത്തലയും ഫിഷറീസ് വകുപ്പ് മന്ത്രി വി.ഇ അബ്ദുള് ഗഫൂറും സന്ദര്ശിച്ചു. കുടുംബത്തിന്റെ ദുഃഖത്തില് പൂര്ണമായും പങ്കുചേരുന്നതായും, സര്ക്കാരിന്റെ ഭാഗത്ത് നിന്നുള്ള എല്ലാ പിന്തുണയും ഉണ്ടാകുമെന്നും മന്ത്രിമാര് ഉറപ്പുനല്കി. ജോണിന്റെ കുടുംബാംഗങ്ങളെ ആശ്വസിപ്പിച്ച ശേഷം ഇരുവരും നിരന്തരം അപകടങ്ങള് നടക്കുന്ന മുതലപ്പൊഴിയിലും സന്ദര്ശനം നടത്തി സ്ഥിതിഗതികള് വിലയിരുത്തി. കാണാതായവര്ക്കായുള്ള തിരച്ചില് നാവികസേന, തീരദേശ പൊലീസ്, കോസ്റ്റ് ഗാര്ഡ് എന്നിവരുടെ നേതൃത്വത്തില് സജീവമായി നടക്കുകയാണെന്നും ഇതില് യാതൊരു വീഴ്ചയും ഉണ്ടാകില്ലെന്നും രമേശ് ചെന്നിത്തല വ്യക്തമാക്കി.
മുതലപ്പൊഴി ഹാര്ബറിലെ അശാസ്ത്രീയമായ നിര്മ്മാണമാണ് നിരന്തരമുള്ള അപകടങ്ങള്ക്ക് കാരണമെന്ന പരാതി പ്രദേശത്തെ മത്സ്യത്തൊഴിലാളികള് മന്ത്രിമാരുടെ ശ്രദ്ധയില്പ്പെടുത്തി. ഈ വിഷയത്തില് ശാസ്ത്രീയമായ പഠനം നടത്തി ഒരു ശാശ്വത പരിഹാരം കാണുക എന്നതാണ് സര്ക്കാരിന്റെ പ്രധാന ലക്ഷ്യമെന്ന് ആഭ്യന്തരമന്ത്രി രമേശ് ചെന്നിത്തല പറഞ്ഞു. ‘ഇനിയൊരു ജീവന് പോലും ഇവിടെ പൊലിയാന് പാടില്ല, ഒരു വള്ളവും തകരാന് പാടില്ല. അതിനനുസരിച്ചുള്ള ശക്തമായ നടപടികളും ശാശ്വത പരിഹാരവും സര്ക്കാരിന്റെ ഭാഗത്ത് നിന്നുണ്ടാകും,’ അദ്ദേഹം കൂട്ടിച്ചേര്ത്തു.
കഴിഞ്ഞ ജൂലൈയില് സിഡബ്ല്യുപിആര്എസ് സംഘം മുതലപ്പൊഴി സന്ദര്ശിച്ചിരുന്നു. ഇവരുടെ റിപ്പോര്ട്ടും പ്രദേശത്തെ മത്സ്യത്തൊഴിലാളികളുടെ അഭിപ്രായങ്ങളും പരിഗണിച്ചാകും തുടര്നടപടികള് സ്വീകരിക്കുക. ഇതിനുള്ള സാങ്കേതിക അനുമതി ലഭിച്ചാലുടന് ബാക്കി നിര്മാണ പ്രവര്ത്തനങ്ങള് തുടങ്ങും. ഇതിന് മുന്നോടിയായി മുതലപ്പൊഴിയില് അടിഞ്ഞുകൂടിയ മണല് നീക്കം ചെയ്യുന്നതിനായുള്ള ഉത്തരവ് സര്ക്കാര് പുറത്തിറക്കിയിട്ടുണ്ടെന്നും, ഡ്രെഡ്ജിങ് ഉടന് തന്നെ ആരംഭിക്കുമെന്നും ഫിഷറീസ് മന്ത്രി വ്യക്തമാക്കി.
രക്ഷാപ്രവര്ത്തനം വൈകി എന്ന തരത്തിലുള്ള ആരോപണങ്ങള് ഫിഷറീസ് മന്ത്രി വി.ഇ അബ്ദുള് ഗഫൂര് തള്ളി. രാവിലെ ഏഴ് മണിക്ക് തന്നെ എംഎല്എ ഉള്പ്പെടെയുള്ളവര് സ്ഥലത്തെത്തുകയും ഒരേസമയം മൂന്നിടങ്ങളില് തിരച്ചില് ആരംഭിക്കുകയും ചെയ്തിരുന്നു. കൂടാതെ, സംസ്ഥാന ചരിത്രത്തില് തന്നെ ആദ്യമായാണ് അപകടം നടന്ന ആദ്യ മണിക്കൂറുകളില് തന്നെ രക്ഷാപ്രവര്ത്തനത്തിനായി ഹെലികോപ്റ്റര് സേവനം ലഭ്യമാക്കിയതെന്ന് എംഎല്എ തന്നോട് ചൂണ്ടിക്കാട്ടിയതായും മന്ത്രി കൂട്ടിച്ചേര്ത്തു. കോസ്റ്റല് പൊലീസും ഉടന് തന്നെ സ്ഥലത്തെത്തിയിരുന്നു.
അപകടം സംഭവിച്ചതിന് ശേഷമുള്ള ആദ്യ മണിക്കൂറുകളില് തന്നെ ഏറ്റവും വേഗത്തില് രക്ഷാപ്രവര്ത്തനം ഏകോപിപ്പിക്കുന്നതിനായി ഫിഷറീസ് വകുപ്പ് പുതിയൊരു പ്രവര്ത്തന മാര്ഗരേഖ തയ്യാറാക്കുകയാണ്. രണ്ടാഴ്ചയ്ക്കുള്ളില് ഈ എസ്ഒപി നിലവില് വരുമെന്ന് മന്ത്രി അറിയിച്ചു. ഇതിനൊപ്പം തന്നെ നിലവില് അടിസ്ഥാന സൗകര്യങ്ങളുടെ കുറവ് നേരിടുന്ന കോസ്റ്റല് പൊലീസിനെ കൂടുതല് സജ്ജമാക്കുമെന്നും അദ്ദേഹം ഉറപ്പുനല്കി.
കടലില് അപകടങ്ങള് നടക്കുമ്പോള് രക്ഷാപ്രവര്ത്തനത്തിനായി കോസ്റ്റ് ഗാര്ഡിന്റെ സേവനം ലഭ്യമാകുന്നതിലെ കാലതാമസം വലിയ പ്രതിസന്ധിയാണ് സൃഷ്ടിക്കുന്നതെന്ന് മന്ത്രിമാര് ചൂണ്ടിക്കാട്ടി. നിലവില് ബോംബെയില് നിന്നുള്ള പ്രത്യേക അനുമതി ലഭിച്ചതിന് ശേഷം മാത്രമേ കോസ്റ്റ് ഗാര്ഡിന് രക്ഷാപ്രവര്ത്തനത്തിന് ഇറങ്ങാന് കഴിയുന്നുള്ളൂ. ഈ കാലതാമസം ഒഴിവാക്കാനും, കോസ്റ്റ് ഗാര്ഡിന്റെ സേവനം വേഗത്തില് ലഭ്യമാക്കുന്നതിനുമുള്ള നടപടികള് സ്വീകരിക്കാന് കേന്ദ്ര സര്ക്കാരിനോട് ആവശ്യപ്പെടുമെന്നും ഇരുവരും വ്യക്തമാക്കി.
