അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.സര്ക്കാര് പരിപാടികളില് സംസ്ഥാന ഗീതമായ ‘തമിഴ് തായ് വാഴ്ത്ത്’ ആദ്യം ആലപിക്കുന്നതിനായുള്ള പ്രമേയം പാസാക്കി തമിഴ്നാട് നിയമസഭ. മുഖ്യമന്ത്രി സി. ജോസഫ് വിജയ് അവതരിപ്പിച്ച പ്രമേയം ഐകകണ്ഠ്യേനയാണ് പാസായത്. എഐഡിഎംകെ, ഡിഎംകെ ഉള്പ്പെടെയുള്ള എല്ലാ രാഷ്ട്രീയപാര്ട്ടികളും പ്രമേയത്തെ പിന്തുണച്ചു. സംസ്ഥാനത്തെ വിദ്യാഭ്യാസ സ്ഥാപനങ്ങളിലും സര്വകലാശാലകളിലും സര്ക്കാര് ഓഫീസുകളിലും പൊതുമേഖലാ സ്ഥാപനങ്ങളിലും തമിഴ് തായ് വാഴ്ത്ത് ആദ്യം ആലപിക്കണമെന്നാണ് പ്രമേയത്തിലെ പ്രധാന വ്യവസ്ഥ.
എന്നാല് സംസ്ഥാനത്തെ ഔദ്യോഗിക പരിപാടികളില് ദേശീയഗാനത്തിന് മുമ്പ് വന്ദേ മാതരം ആലപിക്കണമെന്നാണ് കേന്ദ്ര ആഭ്യന്തര മന്ത്രാലയത്തിന്റെ കര്ശനമായ ഉത്തരവ്. ഇതിനെ മറികടന്നുകൊണ്ടാണ് തമിഴ്നാട് നിയമസഭ ‘തമിഴ് തായ് വാഴ്ത്ത്’ ആദ്യം ആലപിക്കാന് തീരുമാനിച്ചിരിക്കുന്നത്. കേന്ദ്രത്തിന്റെ ഉത്തരവ് പ്രകാരം തമിഴ് തായ് വാഴ്ത്ത് മൂന്നാം സ്ഥാനത്തേക്ക് പിന്തള്ളപ്പെട്ടിരുന്നു. തുടര്ന്ന് കേന്ദ്ര നിര്ദേശത്തിനെതിരെ രൂക്ഷമായ വിമര്ശനമാണ് തമിഴ്നാട്ടില് ഉയര്ന്നത്. മനോന്മണിയം സുന്ദരനാറാണ് തമിഴ് തായ് വാഴ്ത്തിന്റെ രചയിതാവ്. 1891ല് അദ്ദേഹം രചിച്ച മനോന്മണിയത്തിന്റെ ആമുഖത്തില് നിന്നാണ് ഈ ഭാഗമെടുത്തത്.
1970 നവംബര് 23 മുതലാണ് തമിഴ്നാട്ടിലെ ഔദ്യോഗിക ചടങ്ങുകളില് തായ് വാഴ്ത്ത് ആലപിക്കാന് തുടങ്ങിയത്. 2021 ഡിസംബര് 12ന് തായ് വാഴ്ത്ത് സംസ്ഥാനത്തിന്റെ ഔദ്യോഗിക ഗാനമായി അംഗീകരിക്കുകയും ചെയ്തു. അതേസമയം കേരളത്തില് വന്ദേമാതരം ആദ്യം ആലപിക്കുന്നതുമായി ബന്ധപ്പെട്ട ചര്ച്ചകള് ചൂടുപിടിച്ചിരിക്കുകയാണ്. കേന്ദ്രസര്ക്കാരിന്റെ നിര്ദേശമനുസരിച്ച് വന്ദേമാതരം ആദ്യം ആലപിക്കണമെന്നാണ് ചീഫ് സെക്രട്ടറി പുറത്തിറക്കിയ ഉത്തരവില് പറയുന്നത്. എന്നാല് ഈ ഉത്തരവ് പിന്വലിക്കണമെന്ന് ആവശ്യപ്പെട്ട് പ്രതിപക്ഷ നേതാവ് പിണറായി വിജയന് ഉള്പ്പെടെ രംഗത്തെത്തിയിരുന്നു.
