അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ദേശീയപാത 66 രാജ്യത്തെ ആദ്യ വൈദ്യുതട്രക്ക് ഇടനാഴിയാക്കുന്നതിന് 12.5 മെഗാവാട്ട് ശേഷിയുള്ള ചാര്ജിംഗ് ശൃംഖല സൃഷ്ടിക്കേണ്ടതുണ്ടെന്ന് പഠനം. ഈ ലക്ഷ്യം നേടാന് 19 കോടി രൂപയുടെ നിക്ഷേപം ആവശ്യമാണെന്ന് കെ.എസ്.ഇ.ബി.എല്, ഇന്റര്നാഷണല് കൗണ്സില് ഓണ് ക്ലീന് ട്രാന്സ്പോര്ട്ടേഷനുമായി (ഐ.സി.സി.റ്റി) സഹകരിച്ച് നടത്തിയ പഠനത്തില് കണ്ടെത്തിയിട്ടുണ്ട്. ദില്ലിയില് നടന്ന ഇന്ത്യ ക്ലീന് ട്രാന്സ്പോര്ട്ട് സമിറ്റ് 2026ല് പഠന റിപ്പോര്ട്ട് പ്രകാശനം ചെയ്തു. കാസര്ഗോഡ് മുതല് തിരുവനന്തപുരം വരെയുള്ള 622 കിലോമീറ്റര് ഇടനാഴി ഇന്ത്യയിലെ ആദ്യത്തെ വൈദ്യുതട്രക്ക് ഇടനാഴിയായി വികസിപ്പിച്ചുകൊണ്ടിരിക്കുകയാണ്.
ഇതിന്റെ ധനപരമായ ആവശ്യകതകള്, പി.എം.ഇ-ഡ്രൈവ് പദ്ധതിക്കുകീഴില് പൊതു ചാര്ജിംഗിനായി കേന്ദ്ര ഘനവ്യവസായ മന്ത്രാലയം വകയിരുത്തിയ 2,000 കോടിയുടെ പരിധിയില് നില്ക്കുന്നതാണ്. കൂടാതെ, കേരളത്തില് ചാര്ജിംഗ് ശൃംഖല സ്ഥാപിക്കുന്നതിനായി ഇതിനകം അനുവദിച്ച 63.12 കോടിയും ഈ ആവശ്യത്തിന് വിനിയോഗിക്കാവുന്നതാണ്. ഇലക്ട്രിക് ട്രക്കുകള്ക്കായി എത്ര ചാര്ജറുകള് വേണം, ഏത് തരം വേണം, എവിടെയൊക്കെ വേണം എന്ന് നിര്ണ്ണയിക്കുന്നതിനായി ഒരു ഇന്ത്യന് ചരക്ക് ഗതാഗത പാതയില് നടത്തുന്ന ആദ്യത്തെ പഠനമാണിത്. ദേശീയപാത 66 ലെ നാല് ടോള് പ്ലാസകളില് നിന്നുള്ള ഫാസ്റ്റാഗ് ഡേറ്റ, ദേശീയതലത്തിലുള്ള ട്രക്കുകളുടെ വിന്യാസം, 13,355 ട്രക്കുകളില് നിന്നുള്ള ജിപിഎസ് വിവരങ്ങള്, 3,39,692 പാര്ക്കിംഗ് വിവരങ്ങള് എന്നിവ അടിസ്ഥാനമാക്കിയാണ് ഈ പഠനം തയ്യാറാക്കിയിട്ടുള്ളത്.
2030ന് ശേഷം ഈ മേഖലയിലെ ആവശ്യകത കുത്തനെ ഉയരും. 2050-ഓടെ ഈ ഇടനാഴിയില് 204.5 MW ശേഷി വരുന്ന 1,939 ചാര്ജറുകളും ആകെ 338 കോടിയുടെ നിക്ഷേപവും ആവശ്യമായി വരുമെന്ന് പ്രവചിക്കപ്പെടുന്നു. ഇടനാഴിയിലെ പ്രതിദിന ഗ്രിഡ് ഊര്ജ്ജ ആവശ്യകത 2030-ലെ 32 MWh-ല് നിന്ന് 2050-ഓടെ 833 MWh ആയി ഉയരും. അതായത് 26 മടങ്ങ് വര്ദ്ധനവുണ്ടാകും. എന്നിരുന്നാലും ഇത് കേരളത്തിന്റെ പ്രവചിക്കപ്പെട്ട വാര്ഷിക വൈദ്യുതി ഉപഭോഗത്തിന്റെ 0.2 ശതമാനത്തില് താഴെ മാത്രമായിരിക്കും. കൊച്ചി, കോഴിക്കോട്, കൊല്ലം എന്നിവയായിരിക്കും പ്രധാന കേന്ദ്രങ്ങളായി ഉയര്ന്നുവരിക. തിരുവങ്ങാട്-കുമ്പളം ഭാഗത്ത് മാത്രം 2050-ഓടെ 76.4 MW ശേഷി ആവശ്യമായി വരും.
ദേശീയപാത 66-ല് ഇന്ത്യയിലെ ആദ്യത്തെ ഇലക്ട്രിക് ട്രക്ക് ഇടനാഴി നിര്മ്മിക്കുന്നതിലൂടെ, ചരക്ക് ഗതാഗതത്തിന്റെ വൈദ്യുതീകരണം എങ്ങനെ പ്രായോഗികവും ഗ്രിഡ് സജ്ജവുമാക്കാമെന്ന് ഒരു സംസ്ഥാന വൈദ്യുതി സ്ഥാപനം മാതൃക കാണിക്കുകയാണെന്ന് കെ എസ് ഇ ബി ജനറേഷന് & റീസ് വിഭാഗം ഡയറക്ടര് രാജന് എം പി പഠന റിപ്പോര്ട്ടിന്റെ പ്രകാശനവേളയില് പറഞ്ഞു. ബാറ്ററി അധിഷ്ഠിത ഇലക്ട്രിക് ട്രക്കുകള് ഈ ഇടനാഴിയിലുടനീളം വ്യാപകമാകുമ്പോള്, മികച്ചതും വിശ്വസനീയവുമായ ചാര്ജിംഗ് ശൃംഖല സജ്ജമാക്കുന്നതിനായി ആവശ്യാനുസരണം വിതരണ സംവിധാനങ്ങള് മെച്ചപ്പെടുത്താന് കെ.എസ്.ഇ.ബി. പ്രതിജ്ഞാബദ്ധമാണെന്നും അദ്ദേഹം അറിയിച്ചു.
ചാര്ജിംഗ് പശ്ചാത്തലസൗകര്യങ്ങള് ആസൂത്രണം ചെയ്യുന്നതിനും നിര്മ്മിക്കുന്നതിനും വര്ഷങ്ങളെടുക്കുമെന്നതിനാല് വൈദ്യുത ട്രക്കുകള് വ്യാപകമാകുന്നതുവരെ കേരളം കാത്തിരുന്നാല് അത് വളരെ വൈകിപ്പോകുമെന്നും ഇടനാഴി അടിസ്ഥാനമാക്കിയുള്ള ഈ പഠനം വളരെ പ്രയോജനപ്രദമാണെന്നും ഇന്റര്നാഷണല് കൗണ്സില് ഓണ് ക്ലീന് ട്രാന്സ്പോര്ട്ടേഷനിലെ ഗവേഷകയായ ഹര്സിമ്രന് കൗര് അഭിപ്രായപ്പെട്ടു.
