അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പൊലീസുകാരൻ മദ്യപിച്ച് വാഹനമോടിച്ചുണ്ടാക്കിയ അപകടത്തിൽ മൂന്നുപേർക്ക് പരുക്ക്. കണ്ണോത്തുംചാലിലെ റസ്റ്ററന്റിൽ ജോലിചെയ്യുന്ന യുവതിക്കും അതിഥി തൊഴിലാളികൾക്കുമാണ് ഗുരുതരമായി പരുക്കേറ്റത്. അപകടമുണ്ടാക്കിയ അഴീക്കൽ കോസ്റ്റൽ സ്റ്റേഷനിലെ എഎസ്ഐ രജിത്തിനെ സസ്പെൻഡ് ചെയ്തു. കഴിഞ്ഞ 21ന് അർധരാത്രിയിലാണ് സംഭവം.
റസ്റ്ററന്റിൽ ജോലിചെയ്യുന്ന പന്ന്യന്നൂർ സ്വദേശി സ്വാതി, അതിഥി തൊഴിലാളികളായ ഹവാസ് അലി, റോക്കിബുൾ എന്നിവരെ എഎസ്ഐ രജിത്ത് ഓടിച്ച കാർ അമിത വേഗത്തിൽ എത്തി ഇടിച്ചിടുകയായിരുന്നു. സ്വാതിയും രണ്ടു അതിഥി തൊഴിലാളികളും കാലിന് ഉൾപ്പെടെ ഗുരുതരമായി പരുക്കേറ്റ് ചികിത്സയിലാണ്. മദ്യപിച്ച് ലക്കു കെട്ട നിലയിലായിരുന്നു എഎസ്ഐ രജിത്ത് കാർ ഓടിച്ചിരുന്നത്. നാട്ടുകാർ പിടികൂടി പൊലീസിൽ ഏൽപിക്കുകയായിരുന്നു. രജിത്തിനെതിരെ ടൗൺ പൊലീസ് കേസെടുത്തു. പിന്നാലെ സസ്പെൻഡ് ചെയ്തു.
