അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.കൊച്ചി: മഹാരാജാസ് കോളേജിൽ ഇന്ന് നടന്ന ബിരുദദാന (Convocation) ചടങ്ങ് എസ്.എഫ്.ഐയുടെ നേതൃത്വത്തിൽ തടസ്സപ്പെടുത്തിയ സംഭവത്തിൽ അടിയന്തര അന്വേഷണം നടത്തി കുറ്റക്കാർക്കെതിരെ കർശന നടപടി സ്വീകരിക്കണമെന്ന് ടി.ജെ. വിനോദ് എം.എൽ.എ ആവശ്യപ്പെട്ടു.
ഉന്നതവിദ്യാഭ്യാസ മന്ത്രി റോജി എം. ജോൺ ചടങ്ങ് ഉദ്ഘാടനം ചെയ്തതിന് പിന്നാലെ ഗവേണിങ് ബോഡി ചെയർമാൻ ജസ്റ്റിസ് പി.എസ്. ഗോപിനാഥൻ സംസാരിക്കാൻ ആരംഭിച്ചപ്പോഴാണ് എസ്.എഫ്.ഐ പ്രവർത്തകർ പ്രതിഷേധവുമായി രംഗത്തെത്തിയത്. തങ്ങളുടെ ചോദ്യങ്ങൾക്ക് മറുപടി നൽകണമെന്ന പ്രതിഷേധക്കാരുടെ ആവശ്യം ചടങ്ങ് പൂർത്തിയായ ശേഷം പരിഗണിക്കാമെന്ന് മന്ത്രി അറിയിച്ചിട്ടും പ്രതിഷേധം തുടരുകയായിരുന്നു.
വിദ്യാർത്ഥി സംഘടനകൾ പ്രതിഷേധത്തിന്റെ പേരിൽ മര്യാദയുടെ സീമകൾ ലംഘിക്കരുത്. സംഘടനാ പ്രവർത്തനം അക്രമാസക്തമായ പ്രവണതകളിലേക്ക് വഴിമാറുന്നത് വിദ്യാഭ്യാസ സ്ഥാപനങ്ങളുടെ സമാധാനാന്തരീക്ഷത്തിനും അക്കാദമിക പ്രവർത്തനങ്ങൾക്കും ദോഷകരമാണ്. മറ്റുള്ളവരുടെ സുരക്ഷയ്ക്ക് ഭീഷണിയാകുന്ന തരത്തിലുള്ള പെരുമാറ്റം ഒരു കാരണവശാലും അംഗീകരിക്കാനാവില്ലെന്നും എം.എൽ.എ പറഞ്ഞു.
ഏകദേശം 500 വിദ്യാർത്ഥികളുടെ ബിരുദം, ബിരുദാനന്തര ബിരുദം, പി.എച്ച്.ഡി. ഡോക്ടറൽ ബിരുദദാനങ്ങൾ ഉൾപ്പെട്ട സുപ്രധാന ചടങ്ങാണ് പ്രതിഷേധത്തെ തുടർന്ന് തടസ്സപ്പെട്ടത്. വിദ്യാർത്ഥികളുടെയും രക്ഷിതാക്കളുടെയും ദീർഘകാലത്തെ കാത്തിരിപ്പിനും അഭിമാനത്തിനും സാക്ഷിയാകേണ്ടിയിരുന്ന ചടങ്ങ് അലങ്കോലപ്പെടുത്തിയത് അങ്ങേയറ്റം നിർഭാഗ്യകരമാണ്.
മഹാരാജാസ് കോളേജിന്റെ അക്കാദമിക പാരമ്പര്യത്തിനും സൽപ്പേരിനും കളങ്കമുണ്ടാക്കുന്ന ഇത്തരം സംഭവങ്ങൾ ആവർത്തിക്കാതിരിക്കാൻ ആവശ്യമായ നടപടികൾ സ്വീകരിക്കണം. സംഭവത്തിന് പിന്നിലെ സാഹചര്യങ്ങളും പ്രതിഷേധത്തിന് വിദ്യാർത്ഥികളെ പ്രേരിപ്പിച്ചവരുണ്ടോയെന്നതും ഉൾപ്പെടെ സമഗ്രമായി അന്വേഷിക്കണം. കുറ്റക്കാരെന്ന് കണ്ടെത്തുന്നവർക്കെതിരെ കർശന നടപടി സ്വീകരിക്കണമെന്നും ടി.ജെ. വിനോദ് എം.എൽ.എ ആവശ്യപ്പെട്ടു.
