അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.കൊച്ചി: അഴിമതി രഹിത ബിസിനസ് പ്രവർത്തനങ്ങൾ ഉത്തരവാദിത്തത്തോടെയും സുതാര്യതയോടെയും നടത്തുകയെന്ന ലക്ഷ്യത്തോടെ രാജ്യത്തെ മുൻനിര പൊതുമേഖലാ എണ്ണക്കമ്പനിയായ ഭാരത് പെട്രോളിയം കോർപറേഷൻ ലിമിറ്റഡിൽ (ബിപിസിഎൽ) വിജിലൻസ് ബോധവൽക്കരണ വാരാചരണത്തിന് തുടക്കമായി. മുംബൈയിലെ കോർപ്പറേറ്റ് ഓഫീസിൽ സംഘടിപ്പിച്ച ചടങ്ങിൽ കമ്പനിയുടെ ചീഫ് വിജിലൻസ് ഓഫീസറായി ഡോ. ശാലിനി വർമ ചുമതലയേറ്റു. ബിപിസിഎൽ എച്ച്ആർ വിഭാഗം ഡയറക്ടർ പുഷ്പ് കുമാർ നയർ, വിജിലൻസ് വിഭാഗം സിജിഎം വെങ്കട്ടരാമൻ അയ്യർ, ബിസിനസ് യൂണിറ്റുകളുടെ മേധാവികൾ, ഉന്നത ഉദ്യോഗസ്ഥർ എന്നിവർ പങ്കെടുത്തു. ‘സമൃദ്ധിക്ക് നേർവഴി’ എന്ന പ്രമേയത്തെ അടിസ്ഥാനമാക്കിയുള്ള ഇത്തവണത്തെ വിജിലൻസ് വാരാഘോഷം നവംബർ 1വരെ ബിപിസിഎല്ലിന്റെ മുഴുവൻ റിഫൈനറികളിലും ബിസിനസ് അനുബന്ധ സ്ഥാപനങ്ങളിലും സംഘടിപ്പിക്കും. അഴിമതി, ക്രമക്കേട്, സ്ഥാപനത്തിന്റെ സൽപേരിന് കളങ്കമുണ്ടാക്കുന്ന പ്രവൃത്തികൾ എന്നിവ തടയുന്നതിനും ഇത്തരത്തിലുള്ള വിവരങ്ങൾ ബന്ധപ്പെട്ട അധികാരികളുടെ ശ്രദ്ധയിൽപ്പെടുത്തുന്നതിനും ജീവനക്കാർക്ക് പ്രത്യേക പരിശീലനം നൽകും.
ബിസിനസ്, ഭരണനിർവഹണ പ്രവർത്തനങ്ങൾ സുതാര്യതയോടെ നടപ്പാക്കുന്നതിന്റെ ഭാഗമായാണ് വിജിലൻസ് ബോധവൽക്കരണ പരിപാടി സംഘടിപ്പിക്കുന്നതെന്ന് നിയുക്ത ചീഫ് വിജിലൻസ് ഓഫീസർ ഡോ. ശാലിനി വർമ പറഞ്ഞു. ധാർമിക ബിസിനസ് പ്രവർത്തനങ്ങളിലൂടെ സുസ്ഥിര വളർച്ച കൈവരിക്കുകയാണ് കമ്പനിയുടെ ലക്ഷ്യമെന്നും ഇതിനായി മുഴുവൻ ജീവനക്കാരുടെ സഹകരണം അനിവാര്യമാണെന്നും ഡോ. ശാലിനി വർമ കൂട്ടിച്ചേർത്തു. സ്വന്തം ഉത്തരവാദിത്തങ്ങൾ തിരിച്ചറിഞ്ഞ് കമ്പനിയുടെ വളർച്ചയ്ക്കായി പ്രവർത്തിക്കാൻ ഓരോ ജീവനക്കാരനെയും പര്യാപ്തമാക്കുകയെന്നതാണ് വിജിലൻസ് ബോധവൽക്കരണത്തിലൂടെ ലക്ഷ്യമിടുന്നതെന്ന് ബിപിസിഎൽ എച്ച്ആർ വിഭാഗം ഡയറക്ടർ പുഷ്പ് കുമാർ നയർ പറഞ്ഞു. ബിപിസിഎൽ വിജിലൻസ് മാന്വലിന്റെ ഈവർഷത്തെ പതിപ്പും കേന്ദ്ര വിജിലൻസ് കമ്മിഷന്റെ സർക്കുലറുകളും ചടങ്ങിൽ പ്രകാശനം ചെയ്തു.
