കേരളത്തിൽ വേനലായി കഴിഞ്ഞാൽ സുഹൃത്തുക്കളുടെ ഇടയിൽ നിന്നും കൊടയിൽ പോയാലോ? എന്നൊരു ചോദ്യം വരും. മനസ്സൊന്നു തണുപ്പിക്കാൻ ഒരു ബാഗും പാക്ക് ചെയ്തു ഇറങ്ങുന്നവരാണ് നമ്മളിൽ പലരും. വീണ്ടും വീണ്ടും കൊടൈയിലേക്ക് ആകര്ഷിപ്പിക്കുന്ന ഒരുപാട് ഘടകങ്ങൾ അവിടെയുണ്ട്. മഞ്ഞും, മല നിരകളും, ചെറിയ പൂക്കളും.കൊടൈലെ ഓരോ കാഴ്ചയും നമ്മളെ സന്തോഷിപ്പിക്കുന്നതാണ്.
എന്നാൽ എല്ലാ പ്രാവശ്യവും കൊടൈക്കനാൽ തെരഞ്ഞെടുത്തു, ഫോട്ടോയും എടുത്തു വരുന്നത് നിങ്ങൾക്ക് സ്വല്പമെങ്കിലും ബോറടി നൽകില്ലേ? ഈ വട്ടം കൊടൈക്കനാലിനോട് ചേർന്ന് കിടക്കുന്ന ചില സ്ഥലങ്ങളിലേക്ക് പോയാലോ?
പൂമ്പാറ ഗ്രാമം
കൊടൈക്കനാലില്‍ നിന്ന് 20 കിലോമീറ്റര്‍ സഞ്ചരിച്ചാല്‍ ഈ ഗ്രാമത്തിലെത്താം. വെളുത്തുള്ളി കൃഷിക്ക് പേരുകേട്ട ഗ്രാമമാണിത്. സമുദ്രനിരപ്പില്‍ നിന്ന് 1920 മീറ്റര്‍ ഉയരത്തിലാണ് ഈ കുഞ്ഞന്‍ ഗ്രാമം സ്ഥിതി ചെയ്യുന്നത്. പച്ചപ്പുകള്‍ക്കിടയില്‍ സ്ഥിതി ചെയ്യുന്ന ചെറിയ കുടിലുകള്‍ കര്‍ഷകരുടേതാണ്.
ആറായിരം മാത്രമാണ് ഈ ഗ്രാത്തന്റെ ജനസംഖ്യ. ഇവിടത്തെ കുഴന്തൈ വേലപ്പര്‍ ക്ഷേത്രം പ്രശസ്തമാണ്. മൂവായിരം വര്‍ഷങ്ങള്‍ക്കു മുമ്പ് പ്രതിഷ്ഠ നടന്ന ക്ഷേത്രമാണിതെന്നാണ് വിശ്വസിക്കപ്പെടുന്നത്. കൊടൈക്കനാലില്‍ നിന്ന് അരമണിക്കൂര്‍ കൊണ്ട് പൂമ്പാറ ഗ്രാമത്തിലെത്താം. കാറോ ബൈക്കോ വാടകയ്‌ക്കെടുത്ത് കൊടൈക്കനാലില്‍ നിന്ന് ഇവിടേക്ക് യാത്ര തിരിക്കാം.
ചെട്ടിയാര്‍ പാര്‍ക്ക്
കൊടൈക്കനാലില്‍ നിന്ന് നാലു കിലോമീറ്റര്‍ അകലെയായി സ്ഥിതി ചെയ്യുന്ന ഒരു ഉദ്യനമാണ് ചെട്ടിയാര്‍ പാര്‍ക്ക്. പച്ചപ്പ് നിറഞ്ഞ ഈ പാര്‍ക്കില്‍ നിന്ന് മലനിരകളുടെ മനോഹരമായ കാഴ്ച്ചകള്‍ കാണാം. തിരക്കില്‍ നിന്നൊക്കെ മാറി പ്രിയപ്പെട്ടവരോടൊപ്പം ശാന്തമായി സമയം ചെലവഴിക്കാന്‍ പറ്റിയ സ്ഥലം കൂടിയാണിത്. വിവിധയിനം പൂക്കളാല്‍ സമ്പുഷ്ടമാണ് ഈ പാര്‍ക്ക്. പന്ത്രണ്ട് വര്‍ഷത്തിലൊരിക്കല്‍ പൂക്കുന്ന കുറിഞ്ഞിയും പാര്‍ക്കില്‍ കാണാം.
പെരുമാള്‍ കൊടുമുടി
കൊടൈക്കനാലില്‍ നിന്ന് 20 കിലോമീറ്റര്‍ അകലത്തായി സ്ഥിതി ചെയ്യുന്ന ഹില്‍സ്‌റ്റേഷനാണ് പെരുമാള്‍ കൊടുമുടി. സമുദ്രനിരപ്പില്‍ നിന്ന് 2440 മീറ്റര്‍ ഉയരമുണ്ട് ഈ പ്രദേശത്തിന്. കൊടൈക്കനാലിലേക്ക് പോകുന്ന വഴിക്കോ തിരികെ പോകുമ്പോഴോ പെരുമാള്‍ കൊടുമുടി സന്ദര്‍ശിക്കാം.
പെരുമലയ് മലനിരകളിലെ ഏറ്റവും ഉയരം കൂടിയ കൊടുമുടികൂടിയാണ് പെരുമാള്‍. പശ്ചിമഘട്ടത്തിന്റെയും നീലഗിരി കുന്നുകളുടെയും മനോഹര ദൃശ്യങ്ങള്‍ ഇതിന് മുകളില്‍ നിന്നാല്‍ കാണാം. ഇതിന്റെ താഴെ പെരുമാള്‍മലൈ ഗ്രാമത്തില്‍ നിന്ന് മുകളിലേക്ക് ട്രെക്ക് ചെയ്ത് പോകാം. എഴു കിലോമീറ്റര്‍ ദൂരം കയറാന്‍ നാലു മണിക്കൂറോളം എടുക്കും. ട്രെക്ക് ചെയ്യാന്‍ താല്‍പ്പര്യമില്ലാത്തവര്‍ക്ക് കാറില്‍ മുകളിലെത്താം. കൊടൈക്കനാലില്‍ നിന്ന് ഇവിടേക്ക് ബസ് ലഭിക്കും.
സോളാര്‍ ഒബ്‌സര്‍വേറ്ററി
1899 ല്‍ സ്ഥാപിച്ച സോളാര്‍ ഒബ്‌സര്‍വേറ്ററിയാണിത്. ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് ആസ്‌ട്രോഫിസിക്‌സിന്റെ കീഴില്‍ പ്രവര്‍ത്തിക്കുന്ന ആ ഒബ്‌സര്‍വേറ്ററി കൊടൈക്കനാലില്‍ വരുന്നവര്‍ക്ക് സന്ദര്‍ശിക്കാം. കൊടൈക്കനാലില്‍ നിന്ന് ഏകദേശം 4 കിലോമീറ്റര്‍ സഞ്ചരിച്ചാല്‍ ഇവിടെയെത്താം. കൊടൈക്കനാലില്‍ വരുന്ന പലരും ഈ ഒബ്‌സര്‍വേറ്ററി സന്ദര്‍ശിക്കാറില്ല. ഇങ്ങനെ ഒരു സ്ഥാപനം ഇവിടെ പ്രവര്‍ത്തിക്കുന്നതു പോലും പലര്‍ക്കും അറിയാന്‍ വഴിയില്ല. വിദ്യാര്‍ത്ഥികള്‍ക്ക് ഏറെ വിജ്ഞാനപ്രദമായിരിക്കും ഈ ഒബ്‌സര്‍വേറ്ററി.
കുറിഞ്ഞി ക്ഷേത്രം
കൊടൈ തടാകത്തില്‍ നിന്ന് മൂന്ന് കിലോമീറ്റര്‍ മാറിയാണ് കുറിഞ്ഞി ക്ഷേത്രം സ്ഥിതി ചെയ്യുന്നത്. മുരുകനാണ് ഇവിടത്തെ പ്രതിഷ്ഠ. ക്ഷേത്രത്തില്‍ നിന്നാല്‍ പഴനി കുന്നുകളും കൃഷിത്തോട്ടങ്ങളും ചെറു ഗ്രാമങ്ങളുമൊക്കെ കാണാനാകും. പേരു സൂചിപ്പിക്കുന്നതു പോലെ കുറഞ്ഞി പൂക്കുമ്പോള്‍ ഈ ക്ഷേത്രത്തിന്റെ പരിസരമാകെ പര്‍പ്പിള്‍ മയമായിരിക്കും. കുറിഞ്ഞി ആണ്ടവന്‍ എന്നാണ് ഈ ക്ഷേത്രത്തിലെ മുരുകന്‍ അറിയപ്പെടുന്നത്.
ക്രൈസ്റ്റ് ദി കിംഗ് ചര്‍ച്ച്
കൊടൈക്കനാലിലെ കോക്കേഴ്‌സ് വാക്കിന് സമീപം സ്ഥിതി ചെയ്യുന്ന ക്രിസ്ത്യന്‍ പള്ളിയാണ് ക്രൈസ്റ്റ് ദി കിംഗ് ചര്‍ച്ച്. 1895ല്‍ അമേരിക്കന്‍ മധുരൈ മിഷന്‍ ആണ് ഈ പള്ളി പണികഴിപ്പിച്ചത്. യൂണിയന്‍ ചര്‍ച്ച് എന്നായിരുന്നു മുമ്പ് അറിയപ്പെട്ടിരുന്നത്. പള്ളിയുടെ വാസ്തുശൈലിയാണ് ശ്രദ്ധേയം. ഗോത്തിക് ശൈലിയിലാണ് നിര്‍മ്മാണം.
പാമ്പാര്‍ വെള്ളച്ചാട്ടം
കൊടൈക്കനാല്‍ ബസ് സ്റ്റാന്റില്‍ നിന്ന് 4 കിലോമീറ്റര്‍ സഞ്ചരിച്ചാല്‍ പാമ്പാര്‍ വെള്ളച്ചാട്ടം കാണാം. വെള്ളച്ചാട്ടം വന്നു പതിക്കുന്ന ഭാഗത്ത് സ്വിമ്മിംഗ് പൂളിനെ അനുസ്മരിപ്പിക്കുന്ന ചെറിയ തടാകമുണ്ട്. വെള്ളച്ചാട്ടം സന്ദര്‍ശിക്കുന്നവര്‍ക്ക് ഇവിടെ കുളിക്കാം. പ്രകൃതി സ്‌നേഹികള്‍ക്ക് തീര്‍ച്ചയായും ഈ വെള്ളച്ചാട്ടവും ഇതിന്റെ പരിസര പ്രദേശങ്ങളും ഇഷ്ടപ്പെടും. കൊടൈക്കനാല്‍ സ്റ്റാന്റില്‍ നിന്ന് ബസില്‍ ഇവിടേക്കെത്താം. അതല്ലെങ്കില്‍ ടാക്‌സി കാറുകളെ ആശ്രയിക്കാം.