അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.തിരുവനന്തപുരം: സംസ്ഥാനത്ത് ദേശീയപാത നിർമാണം പുരോഗമിക്കുന്നതിനിടെ നഷ്ടപരിഹാരം നൽകിത്തുടങ്ങി. മുൻപ് നൽകിയ നഷ്ടപരിഹാര തുകയ്ക്ക് പുറമെ ആലപ്പുഴ ജില്ലയിലെ കുടുംബങ്ങൾക്ക് 2.86 ലക്ഷം രൂപ കൂടി അനുവദിച്ചു. 38 കുടുംബങ്ങൾക്കാണ് നഷ്ടപരിഹാരം അനുവദിച്ചത്. തുറവൂർ മുതൽ കൃഷ്ണപുരം വരെയുള്ള 159 വാടകക്കാർക്കാണ് നഷ്ടപരിഹാരം വിതരണം ചെയ്യുന്നത്.
ദേശീയപാത വികസന പ്രവർത്തനങ്ങളുടെ ഭാഗമായി ഭൂമിയും കെട്ടിടങ്ങളും നഷ്ടമായവർക്ക് നഷ്ടപരിഹാരത്തുക നൽകിയിരുന്നു. ഇതിന്ന് പുറമേയാണ് തുക അനുവദിച്ചത്. രണ്ട് പ്രാവശ്യമായി ഇരുന്നൂറോളം കുടുംബങ്ങൾക്ക് ഈ ആനുകൂല്യം ലഭിച്ചിരുന്നു. അവശേഷിക്കുന്നവർക്ക് നഷ്ടപരിഹാരം വിതരണം ചെയ്തുതുടങ്ങി. ഇതിനായി 4.95 കോടി രൂപയാണ് അനുവദിച്ചിരിക്കുന്നത്. ദേശീയപാത കടന്നുപോകുന്ന പ്രദേശത്തെ ഭൂമി നഷ്ടമായവർക്കും കടകൾ ഉൾപ്പെടെയുള്ള മറ്റ് സ്ഥാപനങ്ങൾ ഒഴിയുകയും ചെയ്യേണ്ടിവന്ന 159 വാടകക്കാർക്കായി 1.18 കോടി രൂപ കൈമാറും.
ജില്ലയിലെ വാടകക്കാർക്കുള്ള നഷ്ടപരിഹാരം ഈ മാസം ആദ്യം വിതരണം ചെയ്യാനുള്ള അനുമതി ദേശീയപാത അതോറിറ്റി നൽകിയിരുന്നുവെങ്കിലും കഴിഞ്ഞ ദിവസമാണ് വിതരണം പുനരാരംഭിച്ചത്. വാടകക്കാർക്ക് സ്ഥാപനത്തിൻ്റെ ഇനമനുസരിച്ച് 50,000 മുതൽ 75,000 രൂപവരെയാണ് ലഭിക്കുക. വാടകക്കാർക്ക് രണ്ട് ഘട്ടമായി നഷ്ടപരിഹാരം നൽകിയിരുന്നു. ഈ പട്ടികയിൽ ഉൾപ്പെടാതിരുന്നവരുടെ പട്ടികയ്ക്ക് കഴിഞ്ഞ ഏപ്രിലിൽ അംഗീകാരം നൽകിയിരുന്നു. ജില്ലാ കളക്ടർ അധ്യക്ഷനായുള്ള ഉന്നതതലസമിതിയാണ് അംഗീകാരം നൽകിയത്.
തുറവൂർ മുതൽ കൃഷ്ണപുരം വരെയുള്ള വാടകക്കാരെയാണ് പരിഗണിച്ചിരിക്കുന്നത്. തുറവൂർ – പറവൂർ ഭാഗത്തെ 53 വാടകക്കാർക്കായി 39.75 ലക്ഷം രൂപ വിതരണം ചെയ്യുമ്പോൾ പറവൂർ – കൊറ്റുകുളങ്ങര റീച്ചിൽ 102 പേർക്ക് 76 ലക്ഷം രൂപ വിതരണം ചെയ്യും. കൊറ്റകുളങ്ങര മുതൽ കൃഷ്ണപുരം വരെയുള്ള നാല് വാടകക്കാർക്ക് മൂന്ന് ലക്ഷം രൂപ നൽകും.
കച്ചവടക്കാർക്ക് അവരുടെ വസ്തുക്കൾ നീക്കുന്നതിനായി 50,000 രൂപയും ജീവനോപാധി നഷ്ടമാകുന്ന ഇനത്തിൽ 25,000 രൂപയും ചേർത്ത് 75,000 രൂപയാണ് നഷ്ടപരിഹാരമായി ലഭിക്കുക. ചെറിയ കടകൾക്ക് രണ്ടിനവും ചേർത്ത് പരമാവധി 50,000 രൂപയാണ് കൈമാറുന്നത്. ബാങ്കുകൾ, ഇൻഷുറൻസ് സ്ഥാപനം തുടങ്ങിയ വലിയ സ്ഥാപനങ്ങൾക്ക് സാധനങ്ങൾ മാറ്റുന്നതിന് 50,000 രൂപ ലഭിക്കും. തുറവൂർ – പറവൂർ ഭാഗത്തെ രണ്ട് കുടുംബങ്ങൾക്കാണ് കുടിയൊഴിപ്പിക്കലുമായി ബന്ധപ്പെട്ട ആനുകൂല്യം ലഭിക്കുന്നത്. പറവൂർ – കൊറ്റകുളങ്ങര റീച്ചിൽ 35 കുടുംബങ്ങൾക്കും കൊറ്റകുളങ്ങര – കൃഷ്ണപുരം ഭാഗത്ത് ഒരു കുടുംബത്തിനും നഷ്ടപരിഹാരത്തുക ലഭിക്കും.
അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു
