അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
അഞ്ജലി മേനോന്‍ രചനയും സംവിധാനവും നിര്‍വഹിക്കുന്ന ‘വണ്ടര്‍ വുമണ്‍’ എന്ന ചിത്രത്തിന്റെ ട്രെയ്‌ലർ പുറത്തുവിട്ട് സോണി ലിവ്. നവംബര്‍ 18 മുതല്‍ സോണി ലിവില്‍ചിത്രം പ്രദർശനം തുടങ്ങും.
ഗര്‍ഭിണികളായ ആറ് സ്ത്രീകള്‍ ഒരു ഗര്‍ഭകാല ക്ലാസില്‍ പങ്കെടുക്കാനെത്തുന്നതാണ് ചിത്രത്തിന്റെ പ്രമേയം.ആര്‍.എസ്.വി.പി ഫ്‌ലയിങ് യൂണികോണ്‍ എന്റര്‍ടൈന്‍മെന്റും ലിറ്റില്‍ ഫിലിം പ്രൊഡക്ഷന്‍സും ചേര്‍ന്നാണ് ചിത്രം നിര്‍മിച്ചിരിക്കുന്നത്. പ്രധാന റോളുകളില്‍ നിത്യ മേനോന്‍, പാര്‍വതി തിരുവോത്ത്, അമൃത സുബാഷ്, നാദിയ മൊയ്തു, പദ്മപ്രിയ ജാനകിരാമന്‍, സയനോര ഫിലിപ്പ്, അര്‍ച്ചന പദ്മിനി എന്നിവര്‍ അണിനിരക്കുന്നു. ഇംഗ്ലീഷില്‍ അവതരിപ്പിച്ചിട്ടുള്ള ചിത്രത്തില്‍ മലയാളം, ഹിന്ദി, മറാത്തി, തമിഴ്, തെലുങ്ക്, കന്നഡ, എന്നീഭാഷകളും ഉണ്ട്.
‘കുറെ സ്ത്രീകള്‍ ഒരുമിച്ച് നില്‍ക്കുകയും അവര്‍ക്കിടയില്‍ സാഹോദര്യം ഉണ്ടാവുകയും ചെയ്യുമ്പോള്‍, ആ കൂട്ടമാകെ ശക്തിപ്പെടുന്നത് പോലെ തന്നെ അതിലെ ഓരോ വ്യക്തിയും ഒരുപാട് വളരുന്നുണ്ട്. അത് ഞാന്‍ എന്റെ സ്വന്തം അനുഭവത്തില്‍ നിന്ന് തിരിച്ചറിഞ്ഞതാണ്. ജീവിതത്തിന്റെ പല മേഖലകളില്‍ നിന്ന് വരുന്ന വ്യത്യസ്തരായ കുറെ സ്ത്രീകള്‍ക്കിടയില്‍ ഉണ്ടാകുന്ന ഊഷ്മളായ ഒരു ബന്ധവും അവരോരുത്തരും അവരുടെ ജീവിതത്തെ നേരിടുന്ന രസകരമായ രീതികളുമാണ് ഞാനീ സിനിമയിലൂടെ ആവിഷ്‌കരിക്കാന്‍ ശ്രമിച്ചിട്ടുള്ളത്. ഇക്കൂട്ടത്തില്‍ ഈ രാജ്യത്തെ എല്ലാ സ്ത്രീകള്‍ക്കും അവരുടെ സ്വന്തം ജീവിതത്തോട് സാമ്യം തോന്നുന്ന കഥാപാത്രങ്ങളുണ്ട്. എല്ലാ പ്രായത്തിലുമുള്ള സ്ത്രീകളുണ്ട്. ഗര്‍ഭധാരണവും പുതിയ സൗഹൃദങ്ങളും അവരെ എങ്ങനെയാണ് മാറ്റിമറിക്കുന്നതെന്ന് ഈ സിനിമയില്‍ കാണാം. നമ്മുടെ ഹൃദയത്തോട് ചേര്‍ത്ത് വെക്കാന്‍ കഴിയുന്ന ഒരു സിനിമയായിരിക്കും ഇത്. ഇതിലെ ഓരോ കഥാപാത്രങ്ങളെയും പ്രേക്ഷകര്‍ എങ്ങനെ സ്വീകരിക്കും എന്നറിയാനുള്ള ആകാംക്ഷയിലാണ് ഞാന്‍ എന്നാണ് അഞ്ജലി മേനോൻ സിനിമയെ കുറിച്ച് പറഞ്ഞത്.
