അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ന്യൂഡൽഹി: ഇന്ത്യ, പാകിസ്താൻ എന്നിവിടങ്ങളിൽനിന്നുള്ള 16 യു ട്യൂബ് വാർത്താ ചാനലുകൾക്ക് വിലക്കേർപ്പെടുത്തി കേന്ദ്ര വാർത്താവിതരണ മന്ത്രാലയം. 10 ഇന്ത്യൻ ചാനലുകൾക്കും ആറ് പാകിസ്താൻ ചാനലുകൾക്കുമാണ് വിലക്ക്. രാജ്യസുരക്ഷയെ ബാധിക്കുന്ന തരത്തിൽ വ്യാജപ്രചാരണങ്ങൾ നടത്തിയതിനാണ് നടപടി. ഈ ചാനലുകൾക്ക് ഏതാണ്ട് 68 കോടിയിലധികം കാഴ്ചക്കാരുണ്ടെന്നും മന്ത്രാലയം അറിയിച്ചു.
‘രാജ്യ സുരക്ഷ, ഇന്ത്യയുടെ വിദേശബന്ധങ്ങൾ, സാമുദായിക സൗഹാർദം, പൊതു ഉത്തരവ് എന്നിവ സംബന്ധിച്ച് വ്യാജവാർത്തകൾ സമൂഹമാധ്യമങ്ങളിലൂടെ ഇവ പ്രചരിപ്പിക്കുന്നതായി കണ്ടെത്തി. 2021ലെ ഐ.ടി ചട്ടങ്ങളിലെ റൂൾ 18 പ്രകാരം ഈ ഡിജിറ്റൽ വാർത്താ പ്രസാധകരാരും മന്ത്രാലയത്തിന് വിവരങ്ങൾ നൽകിയിരുന്നില്ല.
ചില ഇന്ത്യൻ ചാനലുകൾ പ്രസിദ്ധീകരിച്ച ഉള്ളടക്കത്തിൽ ഒരു സമുദായത്തെ ഭീകരസ്വഭാവമുള്ളതായി ചിത്രീകരിക്കുകയും അത് വിവിധ മതവിഭാഗങ്ങൾക്കിടയിൽ വിദ്വേഷം വളർത്തുകയും ചെയ്തു’– മന്ത്രാലയം വാർത്താകുറിപ്പിൽ പറയുന്നു. ഈ മാസം അഞ്ചിന് ഇതേ കാരണത്താൽ നാല് പാക് ചാനലുകൾ അടക്കം 22 യുട്യൂബ് ചാനലുകൾ സർക്കാർ വിലക്കിയിരുന്നു. കഴിഞ്ഞ ഡിസംബർ, ജനുവരി മാസങ്ങളിലായി 55 യു ട്യൂബ് ചാനലുകൾക്കും വിലക്ക് ഏർപ്പെടുത്തിയിരുന്നു.
