അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.റാഞ്ചി: റേഷൻ കാർഡുള്ള ഇരുചക്ര വാഹനയുടമകൾക്ക് പെട്രോളിന് 25 രൂപ സബ്സിഡി നല്‍കുന്ന ഝാര്‍ഖണ്ഡ് സര്‍ക്കാറിൻ്റെ പദ്ധതി നാളെ മുതൽ നടപ്പാക്കും. ഇതിനായി മുഖ്യമന്ത്രി ഹേമന്ത് സോറന്‍ ആപ്പ് പുറത്തിറക്കി. ദേശീയ ഭക്ഷ്യ സുരക്ഷാ പദ്ധതിയിലോ ഝാര്‍ഖണ്ഡ് ഭക്ഷ്യ സുരക്ഷാ പദ്ധതിയിലോ ഉള്‍പ്പെട്ട റേഷന്‍ കാര്‍ഡുള്ളവര്‍ക്കാണ് സബ്സിഡി ലഭിക്കുന്നത്.
ഒരു മാസത്തില്‍ പരമാവധി 10 ലിറ്റര്‍ പെട്രോളാണ് 25 രൂപ സബ്‌സിഡിയില്‍ ലഭിക്കുക. കഴിഞ്ഞ ഡിസംബറിൽ പ്രഖ്യാപിച്ചപദ്ധതി റിപ്പബ്ലിക് ദിനമായ ബുധനാഴ്ച മുതലാണ് പ്രാബല്യത്തില്‍വരുന്നത്. സിഎംസപ്പോര്‍ട്ട്(CM-SUPPORTS) എന്ന പേരിലാണ് ഇതിനായി ആപ്പ് തയ്യാറാക്കിയിട്ടുള്ളത്. പദ്ധതി പ്രകാരം, ഇരുചക്രവാഹനങ്ങള്‍ കൈവശമുള്ള സംസ്ഥാനത്തെ പിങ്ക്, ഗ്രീന്‍ റേഷന്‍ കാര്‍ഡുടമകള്‍ക്ക് ഒരു മാസത്തില്‍ പെട്രോള്‍ സബ്‌സിഡിയില്‍ ലഭിക്കും.
അധികാരത്തിലെത്തി രണ്ടു വര്‍ഷം പൂര്‍ത്തിയാക്കിയതിൻ്റെ ഭാഗമായി ഡിസംബര്‍ 29-നാണ് ഹേമന്ത് സോറന്‍ പെട്രോള്‍ സബ്സിഡി പദ്ധതി പ്രഖ്യാപിച്ചത്. പിങ്ക്, ഗ്രീന്‍ റേഷന്‍ കാര്‍ഡ് ഉടമകള്‍ക്ക് ഈ ആപ്പ് വഴിയോ jsfss.jharkhand.gov.in എന്ന വെബ്സൈറ്റില്‍ ലോഗിന്‍ ചെയ്തോ സൗകര്യം പ്രയോജനപ്പെടുത്താം. അപേക്ഷകന്‍ തൻ്റെ റേഷന്‍ കാര്‍ഡും ആധാര്‍ നമ്പറും നല്‍കേണ്ടതുണ്ട്. അതിനുശേഷം ആധാറുമായി ലിങ്ക് ചെയ്തിരിക്കുന്ന മൊബൈല്‍ നമ്പറിലേക്ക് ഒരു ഒടിപി അയയ്ക്കും.
അപേക്ഷകൻ്റെ റേഷന്‍ കാര്‍ഡ് നമ്പര്‍ ലോഗിന്‍ ആയിരിക്കും, ഗൃഹനാഥൻ്റെ ആധാര്‍ നമ്പറിൻ്റെ അവസാന എട്ട് അക്കങ്ങള്‍ പാസ്വേഡ് ആയിരിക്കും. ഒടിപി വെരിഫിക്കേഷന് ശേഷം വാഹനത്തിൻ്റെ നമ്പറും ലൈസന്‍സ് ഐഡിയും രേഖപ്പെടുത്തേണ്ടതുണ്ട്. ജാര്‍ഖണ്ഡില്‍ രജിസ്റ്റര്‍ ചെയ്ത വാഹനങ്ങള്‍ക്ക് മാത്രമേ സബ്സിഡി ലഭിക്കുകയുള്ളൂ. ബാങ്ക് അക്കൗണ്ട് നമ്പറും രജിസ്‌ട്രേഷനില്‍ ഉള്‍പ്പെടുത്തേണ്ടതുണ്ട്.
സബ്സിഡി തുക ഗുണഭോക്താക്കളുടെ അക്കൗണ്ടിലേക്കാകും എത്തുക. ജാര്‍ഖണ്ഡ് ഭക്ഷ്യ വിതരണ വകുപ്പ് തയ്യാറാക്കിയ റിപ്പോര്‍ട്ടില്‍ 2021-22 സാമ്പത്തിക വര്‍ഷത്തില്‍ 20 ലക്ഷം കുടുംബങ്ങള്‍ക്ക് പെട്രോളിന് സബ്സിഡി നല്‍കേണ്ടി വരുമെന്ന് കണക്കാക്കിയിട്ടുണ്ട്. ഇതുപ്രകാരം ഈ സാമ്പത്തിക വര്‍ഷം 20 ലക്ഷം കുടുംബങ്ങള്‍ സബ്സിഡി നല്‍കിയാല്‍ സര്‍ക്കാര്‍ ഖജനാവില്‍ പ്രതിമാസം 50 കോടി രൂപയുടെ അധിക ബാധ്യതയുണ്ടാകുമെന്നും റിപ്പോര്‍ട്ടില്‍ പറയുന്നു.
