പഞ്ചാബ്​ മുഖ്യമന്ത്രി അമരീന്ദർ സിങ്​ രാജിവെച്ചു

ന്യൂഡൽഹി: അഭ്യൂഹങ്ങൾക്കൊടുവിൽ പഞ്ചാബ്​ മുഖ്യമന്ത്രി അമരീന്ദർ സിങ്​ രാജിവെച്ചു. ഗവർണറെ കണ്ട്​ അദ്ദേഹം രാജി സമർപ്പിച്ചു. പാർട്ടിയിൽ ഉടലെടുത്ത ആഭ്യന്തര കലഹത്തെ തുടർന്നാണ്​ രാജി. നിയമസഭ തെരഞ്ഞെടുപ്പിന്​​ മാസങ്ങൾ മാത്രം ശേഷിക്കെയുള്ള രാജി കൂടുതൽ പ്രതിസന്ധികൾ സൃഷ്ടിച്ചേക്കും. അമരീന്ദറിന്‍റെ മുഖ്യമന്ത്രി സ്​ഥാനവുമായി ബന്ധപ്പെട്ട്​ 40 എംഎൽഎമാർ ഹൈക്കമാൻഡിന്​ കത്ത്​ നൽകിയിരുന്നു.

പിതാവ്​ വൈകീട്ട്​ രാജിവെക്കുമെന്ന് അമരീന്ദറിന്‍റെ മകൻ ശനിയാഴ്ച​ ട്വീറ്റ്​ ചെയ്​തിരുന്നു. ശനിയാഴ്​ച വൈകീട്ട്​ ചേർന്ന നിയമസഭ കക്ഷി യോഗത്തിന്​ പിന്നാലെയാണ്​ രാജി. പഞ്ചാബ്​ നിയമസഭ തെരഞ്ഞെടുപ്പ്​ അടുത്തതോടെയാണ് ഹൈക്കമാൻഡ്​​ അമരീന്ദറിനോട്​ മാറിനിൽക്കാൻ നിർദേശിച്ചതെന്നാണ്​​ സൂചന. 

ഇത്രയും അപമാനങ്ങൾ സഹിച്ച് പാർട്ടിയിൽ തുടരാനാവില്ലെന്ന്​ അമരീന്ദർ കോൺഗ്രസ്​ അധ്യക്ഷ സോണിയ ഗാന്ധിയെ അറിയിച്ചിരുന്നു. ‘ഇത്തരത്തിലുള്ള അപമാനം സഹിച്ച്​ മതിയായി, മൂന്നാം തവണയാണ്​ ഇത്​ സംഭവിക്കുന്നത്​. ഇത്തരം അപമാനങ്ങൾ സഹിച്ച്​ ഇനിയും പാർട്ടിയിൽ തുടരാനാകില്ല’ -അമരീന്ദർ സോണിയയെ അറിയിച്ചതായി അടുത്ത വൃത്തങ്ങൾ പറയുന്നു.

നിരവധി ​എംഎൽഎമാർ അമരീന്ദറിന്‍റെ മാറ്റം ആവശ്യപ്പെട്ട്​ നേരത്തേ തന്നെ രംഗത്തെത്തിയിരുന്നു. പുതിയ നേതൃത്വം സംസ്​ഥാനത്ത്​ വേണമെന്നാണ്​ ആവശ്യം. കൂടാതെ നവ്​ജ്യോത്​ സിങ്​ സിദ്ദുവും അമരീന്ദറിനെതിരെ പടയൊരുക്കം നടത്തിയിരുന്നു. സുനിൽ ജാക്കർ, മുൻ പഞ്ചാബ്​ കോൺഗ്രസ്​ ​തലവൻ പ്രതാപ്​ സിങ്​ ബജ്​വ, രവ്​നീത്​ സിങ്​ ബിട്ടു തുടങ്ങിയ പേരുകളാണ് പഞ്ചാബിലെ പുതിയ മുഖ്യമന്ത്രി സ്​ഥാനത്തേക്ക്​ ഉയർന്നുകേൾക്കുന്നത്​.