അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തിരുവനന്തപുരം: വാക്സിനേഷന്റെ കാര്യത്തില് കേരളം ദേശീയ ശരാശരിയെക്കാള് മുന്നിലാണെന്ന് മുഖ്യമന്ത്രി പിണറായി വിജയന്. സംസ്ഥാനത്തെ കുറച്ചു കാണിക്കാനുള്ള ശ്രമം ദേശീയ തലത്തില് ഉണ്ടായതിനാലാണ് ഇക്കാര്യം വ്യക്തമാക്കുന്നതെന്ന് അദ്ദേഹം കോവിഡ് അവലോകന യോഗത്തിനുശേഷം നടത്തിയ വാര്ത്താ സമ്മേളനത്തില് അവകാശപ്പെട്ടു.
ഇതുവരെയുള്ള കണക്കനുസരിച്ച് 1,77,09,529 പേര്ക്ക് വാക്സിന് നല്കിക്കഴിഞ്ഞു. ഇതില് 1,24,64,589 പേര്ക്ക് ഒരു ഡോസ് വാക്സിനും 52,44,940 പേര്ക്ക് രണ്ട് ഡോസ് വാക്സിനും ലഭിച്ചു. കേന്ദ്രസര്ക്കാരില് നിന്നും വാക്സിന് കൃത്യമായി ലഭിക്കുകയാണെങ്കില് ഇപ്പോള് കേരളം വാക്സിന് വിതരണം ചെയ്യുന്ന വേഗതയില് രണ്ടോ മൂന്നോ മാസങ്ങള്ക്കുള്ളില് 60 ശതമാനം പേര്ക്കെങ്കിലും വാക്സിന് നല്കാന് സാധിക്കുമെന്നും അദ്ദേഹം വാര്ത്താ സമ്മേളനത്തില് പറഞ്ഞു.
ഇന്ത്യയിലെ 130 കോടി ജനങ്ങളില് 33,17,76,050 പേര്ക്ക് ഒന്നാം ഡോസും 8,88,16,031 പേര്ക്ക് രണ്ടാം ഡോസും ഉള്പ്പെടെ 42,05,92,081 പേര്ക്കാണ് വാക്സിന് നല്കിയത്. അതായത് ജനസംഖ്യാടിസ്ഥാനത്തില് 25.52 ശതമാനം പേര്ക്ക് ഒന്നാം ഡോസും 6.83 ശതമാനം പേര്ക്ക് രണ്ടാം ഡോസും നല്കിയിട്ടുണ്ട്. എന്നാല് കേരളത്തില് 2021- ലെ ജനസംഖ്യയുടെ അടിസ്ഥാനത്തില് 35.51 ശതമാനം പേര്ക്ക് ഒന്നാം ഡോസും 14.94 ശതമാനം പേര്ക്ക് രണ്ടാം ഡോസും നല്കിയിട്ടുണ്ട്. ഇത് ദേശീയ ശരാശരിയേക്കാളും കൂടുതലാണെന്ന് അദ്ദേഹം പറഞ്ഞു.
സംസ്ഥാനത്തെ ആരോഗ്യ പ്രവര്ത്തകരില് ഏകദേശം 100 ശതമാനം പേരും (5,46,656) ഒന്നാം ഡോസ് വാക്സിന് എടുത്തിട്ടുണ്ട്. 82 ശതമാനം പേര് (4,45,815) രണ്ടാം ഡോസ് എടുത്തിട്ടുണ്ട്. രണ്ടാം ഡോസ് എടുക്കുന്നതിന് 12 ആഴ്ചയുടെ കാലാവധി ഉള്ളതിനാലാണ് രണ്ടാം ഡോസ് 100 ശതമാനം പേര്ക്കും എടുക്കാന് സാധിക്കാത്തത്.
മുന്നണി പോരാളികളില് ഏകദേശം 100 ശതമാനം പേരും (5,59,826) ഒന്നാം ഡോസ് വാക്സിന് എടുത്തിട്ടുണ്ട്. 81 ശതമാനം പേര് (4,55,862) രണ്ടാം ഡോസ് എടുത്തിട്ടുണ്ട്. രണ്ടാം ഡോസ് എടുക്കുന്നതിന് 12 ആഴ്ചയുടെ കാലാവധി ഉള്ളതിനാലാണ് ഈ വിഭാഗത്തിലും രണ്ടാം ഡോസ് 100 ശതമാനം പേര്ക്കും എടുക്കാന് സാധിക്കാത്തത്.
18 വയസിനും 44 വയസിനും ഇടയില് പ്രായമുള്ള വിഭാഗത്തില് 18 ശതമാനം പേര്ക്ക് (27,43,023) ഒന്നാം ഡോസ് ലഭിച്ചിട്ടുണ്ട്. ഒന്നാം ഡോസ് ലഭിച്ചിട്ട് 12 ആഴ്ചയ്ക്ക് ശേഷമാണ് ഇവര്ക്ക് രണ്ടാം ലഭിക്കുന്നത്. അതിനാല് 2,25,549 പേര്ക്കാണ് രണ്ടാം ഡോസ് എടുക്കാനായത്.
18 മുതല് 45 വയസ് പ്രായമുള്ളവരില് ആദ്യഘട്ടത്തില് മുന്ഗണനാ വിഭാഗത്തിലുള്ളവര്ക്കും അനുബന്ധ രോഗങ്ങളുള്ളവര്ക്കുമാണ് നല്കിയത്. ജൂണ് 21ാം തീയതി മുതല് കേന്ദ്ര ആരോഗ്യ മന്ത്രാലയത്തിന്റെ നിര്ദേശ പ്രകാരമാണ് 18 മുതല് 45 വയസ് പ്രായമുള്ളവരെ വാക്സിനേഷന് ലഭിക്കുന്ന വിഭാഗത്തില് ഉള്പ്പെടുത്തിയത്. 45 വയസിന് ശേഷമുള്ള 75 ശതമാനം പേര്ക്ക് (84,90,866) ഒന്നാം ഡോസും 35 ശതമാനം പേര്ക്ക് (39,60,366) രണ്ടാം ഡോസും നല്കിയിട്ടുണ്ട്.
വാക്സിനേഷന് സംബന്ധിക്കുന്ന വിവരങ്ങള് ദിവസവും പ്രസിദ്ധീകരിക്കുന്ന കോവിഡ് വാക്സിനേഷന് ബുള്ളറ്റിന് ലഭ്യമാണ്. ഈ ബുള്ളറ്റിന് എല്ലാ ദിവസവും ആരോഗ്യ വകുപ്പിന്റെ ഔദ്യോഗിക ബുള്ളറ്റിനില് പ്രസിദ്ധീകരിക്കുന്നുണ്ട്. ആകെ 4,99,000 വാക്സിനാണ് നിലവില് ബാക്കിയുള്ളത്. ഏതോ ചിലര് 10 ലക്ഷം ഡോസ് വാക്സിന് ഇവിടെയുണ്ട് എന്ന് പറയുന്നത് കേട്ടു. ശരാശരി രണ്ടുമുതല് രണ്ടര ലക്ഷം ഡോസ് വാക്സിന് ഒരു ദിവസം കൊടുക്കുന്നുണ്ട്. ആ നിലയ്ക്ക് നോക്കിയാല് കയ്യിലുള്ള വാക്സിന് ഇന്നും നാളെയും കൊണ്ട് തീരുമെന്നും മുഖ്യമന്ത്രി വ്യക്തമാക്കി.
മുഴുവന് ഗര്ഭിണികള്ക്കും കോവിഡ് വാക്സിന് നല്കാന് ‘മാതൃകവചം’ എന്ന പേരില് ആരോഗ്യ വകുപ്പ് കാമ്പയിന് ആരംഭിച്ചിട്ടുണ്ട്. സ്വന്തമായി രജിസ്റ്റര് ചെയ്യാന് കഴിയുന്നവരെ അതിനായി പ്രോത്സാഹിപ്പിക്കും. സ്മാര്ട്ട് ഫോണ്, കമ്പ്യൂട്ടര് തുടങ്ങിയ സൗകര്യങ്ങളില്ലാത്തവരെ ആശാ പ്രവര്ത്തകരുടെ സഹായത്തോടെ രജിസ്റ്റര് ചെയ്യിപ്പിച്ചാണ് വാക്സിന് എടുപ്പിക്കുന്നത്. സംസ്ഥാനത്ത് ഇതുവരെ നാല്പതിനായിരത്തോളം ഗര്ഭിണികളാണ് വാക്സിന് എടുത്തത്. എന്നാല് ചിലര് വാക്സിനെടുക്കാന് വിമുഖത കാണിക്കുന്നുണ്ട്.
ഗര്ഭിണികള് സ്വന്തം സുരക്ഷയും കുഞ്ഞിന്റെ സുരക്ഷയും കണക്കിലെടുത്ത് വാക്സിന് എടുക്കേണ്ടതാണ്. കോവിഡ് ബാധിച്ചാല് ഏറ്റവുമധികം ഗുരുതരമാകാന് സാധ്യതയുള്ളവരാണ് ഗര്ഭിണികള്. സംസ്ഥാനത്ത് തന്നെ കോവിഡ് ബാധിച്ച് നിരവധി ഗര്ഭിണികള് ഗുരുതരാവസ്ഥയിലാകുകയും അപൂര്വം പേര് മരണമടയുകയും ചെയ്തിട്ടുണ്ട്. പലതരം പരീക്ഷണ നിരീക്ഷണങ്ങള്ക്കൊടുവിലാണ് കേന്ദ്ര ആരോഗ്യ മന്ത്രാലയം ഗര്ഭിണികള്ക്ക് വാക്സിന് നല്കാന് തീരുമാനിച്ചത്. അതുകൊണ്ട് വാക്സിന്റെ സുരക്ഷിതത്വത്തിന്റെ കാര്യത്തില് ആശങ്ക കൂടാതെ വാക്സിന് സ്വീകരിക്കാന് തയ്യാറാകണം.
മുലയൂട്ടുന്ന അമ്മമാര്ക്ക് ഏത് കാലയളവിലും വാക്സിന് നല്കാന് കേന്ദ്രം നേരത്തെ തന്നെ അനുമതി നല്കിയിരുന്നു. അതിനാല് ഗര്ഭാവസ്ഥയിലെ അവസാന മാസങ്ങളില് ഒന്നാം ഡോസ് വാക്സിന് എടുത്താലും രണ്ടാം ഡോസ് എടുക്കേണ്ട സമയമാകുമ്പോള്, മുലയൂട്ടുന്ന സമയമായാല് പോലും വാക്സിന് എടുക്കുന്നതിന് തടസമില്ല. ഇതിനകം 18 വയസ്സിന് മുകളിലുള്ള 50 ശതമാനത്തിന് ഒരു ഡോസ് വാക്സിന് നല്കി കഴിഞ്ഞിട്ടുണ്ട്. മറ്റുള്ളവര്ക്ക് കൂടി അതിവേഗം വാക്സിനേഷന് നടത്താന് കഴിഞ്ഞാല് അധികം വൈകാതെ 70 ശതമാനംപേര്ക്ക് രോഗപ്രതിരോധം ലഭ്യമാക്കി സാമൂഹ്യപ്രതിരോധശേഷി കൈവരിച്ച് നമുക്ക് കോവിഡിനെ നിയന്ത്രണ വിധേയമാക്കാന് കഴിയുമെന്നും മുഖ്യമന്ത്രി പറഞ്ഞു.
