അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തിരുവനന്തപുരം: കിറ്റക്സിലെ പരിശോധനയുമായി ബന്ധപ്പെട്ടുണ്ടായ വിവാദങ്ങളില് വിശദീകരണവുമായി വ്യവസായ വകുപ്പ് മന്ത്രി പി. രാജീവ്. പരിശോധന നടത്തിയത് കോണ്ഗ്രസ് നേതാക്കളുടെ പരാതിയിലാണെന്ന് മന്ത്രി തിരുവനന്തപുരത്ത് വാര്ത്താസമ്മേളനത്തില് വ്യക്തമാക്കി. സംസ്ഥാന സര്ക്കാരോ ഏതെങ്കിലും വകുപ്പോ മുന്കൈയെടുത്ത് ഒരു പരിശോധനയും കിറ്റക്സില് നടത്തിയിട്ടില്ലെന്ന് മന്ത്രി പറഞ്ഞു.
ബെന്നി ബെഹനാന്റെ പരാതിയിലാണ് ആദ്യം പരിശോധന നടത്തിയത്. പിന്നീട് പി,ടി. തോമസ് എം.എല്.എ വിഷയം നിയമസഭയില് ഇന്നയിച്ചു. സീറോ ലിക്വിഡ് സിസ്റ്റം സ്ഥാപിച്ചിട്ടില്ലെന്ന് പി.ടി. തോമസ് സഭയില് അറിയിച്ചുവെന്നും രാജീവ് പറഞ്ഞു. വനിത ജീവനക്കാരിയുടെ ശബ്ദ സന്ദേശത്തെ തുടര്ന്നും പരിശോധന ഉണ്ടായെന്നും മന്ത്രി അറിയിച്ചു.
പരിശോധനകളെ സംബന്ധിച്ച് ഔദ്യോഗിക പരാതി നല്കാതെ കിറ്റക്സ് മേധാവി സാബു എം ജേക്കബ് സംസ്ഥാന സര്ക്കാരിനെതിരെ അതീവ ഗുരുതരമായ ആരോപണങ്ങള് ഉന്നയിച്ചത് ഗൗരവകരമാണെന്നും അദ്ദേഹം പറഞ്ഞു.
ബെന്നി ബെഹനാന് എം. പി ദേശീയ മനുഷ്യാവകാശ കമ്മീഷന് കിറ്റക്സുമായി ബന്ധപ്പെട്ട് പരാതി നല്കിയിരുന്നു. ഈ പരാതിയില് അന്വേഷണം നടത്തി റിപ്പോര്ട്ട് നല്കാന് എറണാകുളം ജില്ലാ കളക്ടര്ക്ക് കൈമാറി. പരാതിയെ കുറിച്ച് അന്വേഷണം നടത്തി റിപ്പോര്ട്ട് നല്കാന് 2021 ഫെബ്രൂവരി 20 ന് ജില്ലാ കളക്ടര് കുന്നത്തുനാട് തഹസീല്ദാര്, എറണാകുളം റീജിയണല് ലേബര് കമ്മീഷണര് എന്നിവര്ക്ക് നിര്ദ്ദേശം നല്കി. ഇതിന്റെ അടിസ്ഥാനത്തില് കുന്നത്തുനാട് തഹസീല്ദാരും അസിസ്റ്റന്റ് ലേബര് ഓഫീസറും സ്ഥാപനത്തില് പരിശോധന നടത്തുകയായിരുന്നു.
കിറ്റക്സിനെതിരെ തൃക്കാക്കര എം.എല്.എ പി. ടി. തോമസ് നിയമസഭയില് 2021 ജൂണ് 1 ന് ആരോപണം ഉന്നയിച്ചിരുന്നു. ദേശീയ ഹരിത ട്രിബ്യൂണലിന്റെ നിര്ദ്ദേശ പ്രകാരം മലിനീകരണ നിയന്ത്രണത്തിനുള്ള ലിക്വിഡ് ഡിസ്ചാര്ജ് സിസ്റ്റം കിറ്റക്സില് സ്ഥാപിച്ചിട്ടില്ലെന്നായിരുന്നു ആരോപണം. കമ്ബനി പുറം തള്ളുന്ന രാസമാലിന്യം കടമ്ബ്രയാറിലേക്ക് ഒഴുക്കി കിറ്റക്സ് ജലമലിനീകരണം നടത്തുന്നതായും തൃക്കാക്കര, കുന്നത്തുനാട്, ആലുവ, കളമശ്ശേരി, തൃപ്പൂണിത്തുറ മണ്ഡലങ്ങളിലെ 10 ലക്ഷത്തോളം ജനങ്ങളുടെ കുടിവെള്ളസ്രോതസ്സിനെ ഇതു ബാധിക്കുന്നതായും അദ്ദേഹം ആരോപണം ഉന്നയിച്ചു. ഇതു സംബന്ധിച്ച അന്വേഷണവും നടന്നു.
കോവിഡ് പരിശോധനാ സൗകര്യങ്ങളോ നിയമാനുസൃത അവധിയോ നല്കാതെ കമ്ബനി മാനേജ്മെന്റ് ജീവനക്കാരോട് മോശമായി പെരുമാറുന്നു എന്ന് പരാതിപ്പെടുന്ന വനിതാ ജീവനക്കാരിയുടേതെന്ന് കരുതുന്ന ഒരു ശബ്ദ സന്ദേശം വാട്ട്സാപ്പ് ഗ്രൂപ്പുകള് വഴിയും ചില മാദ്ധ്യമങ്ങള് വഴിയും പ്രചരിച്ചിരുന്നു. എറണാകുളം ഡെപ്യൂട്ടി കളക്ടറുടെ നിര്ദ്ദേശ പ്രകാരം ഇതേ കുറിച്ച് പരിശോധന നടത്തി
ഇതിന് സമാനമായ പരാതി ബഹു. കേരള ഹൈക്കോടതിക്കും ലഭിക്കുകയുണ്ടായി. ഹൈക്കോടതി നിര്ദ്ദേശ പ്രകാരം കേരള ലീഗല് സര്വ്വീസസ് അതോറിറ്റി സെക്രട്ടറിയായ ജില്ലാ ജഡ്ജി നിസാറിന്റെ നിര്ദ്ദേശ പ്രകാരം ജില്ലാ ലീഗല് സര്വീസസ് അതോറിറ്റി സെക്രട്ടറിയായ സബ്ജഡ്ജി ശ്രീ. സുരേഷ് 2021 മെയ് 29 ന് അസിസ്റ്റന്റ് ലേബര് ഓഫീസര്, ദേശീയ ആരോഗ്യമിഷന് പ്രതിനിധി എന്നിവര്ക്കൊപ്പം കമ്ബനിയില് പരിശോധന നടത്തി. വനിതാ ജീവനക്കാരിയുടെ ശബ്ദസന്ദേശത്തിന്റെ അടിസ്ഥാനത്തില് മലയിടംതുരുത്ത് പ്രാധമികാരോഗ്യ കേന്ദ്രത്തിലെ വനിതാ ഹെല്ത്ത് ഇന്സ്പെക്ടര് 2021 മെയ് 10 ന് കമ്ബനിയില് പരിശോധന നടത്തി. വേതനം ലഭിക്കുന്നില്ല എന്ന പരാതിയുടെ അടിസ്ഥാനത്തില് ലേബര് കമ്മീഷണറുടെ നിര്ദ്ദേശ പ്രകാരം ജില്ലാ കളക്ടറുടെ അറിവോടെ ജില്ലാ ലേബര് ഓഫീസറും ആരോഗ്യപ്രവര്ത്തകരും ചേര്ന്ന് 2021 ജൂണ് 8 ന് കമ്ബനിയില് പരിശോധന നടത്തി. കണ്ടെത്തിയ ക്രമക്കേടുകള് പരിശോധിക്കാന് സ്ഥാപനത്തിന് നോട്ടീസ് നല്കി.
കിറ്റക്സ് കമ്ബനിയുടെ ഷെഡ്ഡുകളില് സൗകര്യമൊരുക്കാതെ തൊഴിലാളികളെ പാര്പ്പിച്ചതായ പത്രവാര്ത്തയുടെ അടിസ്ഥാനത്തില് അന്വേഷണം നടത്താന് ലേബര് കമ്മീഷണറേറ്റില് നിന്ന് ഫാക്ടറീസ് ആന്റ് ബോയിലേഴ്സ് വകുപ്പിനെ ചുമതലപ്പെടുത്തുകയും വകുപ്പിന്റെ ആലുവ ഓഫീസ് ഇതേക്കുറിച്ച് അന്വേഷിക്കുകയും ചെയ്തു. കടമ്ബ്രയാറില് മാലിന്യം തള്ളുന്നുവെന്ന് ചൂണ്ടിക്കാട്ടി പി. ടി. തോമസ് എം.എല്.എ, ജോണ് ഡാനിയേല് എന്നിവര് നല്കിയ പരാതിയില് മലിനീകരണ നിയന്ത്രണ ബോര്ഡ് പരിശോധന നടത്തി. ഈ മാസം 3 ന് നടന്ന ജില്ലാ വികസന സമിതിയോഗത്തില് പി. ടി. തോമസ് എം. എല്.എ ഇതേ പരാതി വീണ്ടും ഉന്നയിച്ചിരുന്നുവെന്നും രാജീവ് വാര്ത്താസമ്മേളനത്തില് വ്യക്തമാക്കി.
പരിശോധന നടക്കുന്ന സമയം ഒരു പരാതിയും കമ്പനി മാനേജ്മെന്റ് പ്രകടിപ്പിച്ചിട്ടില്ല. പരിശോധന കഴിഞ്ഞിട്ടും ഏതെങ്കിലും തരത്തിലുള്ള പരാതികള് ഉള്ളതായി ഏതെങ്കിലും വകുപ്പുകളെ കമ്പനി മാനേജ്മെന്റ് അറിയിച്ചിട്ടില്ല. പരാതികള് ഉണ്ടെങ്കില് വ്യവസായ വകുപ്പിനെ അറിയിക്കാന് ടോള് ഫ്രീ സംവിധാനമുണ്ട്. വേണമെങ്കില് മന്ത്രിയെ നേരിട്ടോ മുഖ്യമന്ത്രിയെ തന്നെയോ വിളിക്കാം. എന്നാല് കിറ്റക്സ് മുതലാളി ചെയ്തത് ഇതൊന്നും പ്രയോജനപ്പെടുത്താതെ സമൂഹമാധ്യമങ്ങളെ ആരോപണങ്ങള് ഉന്നയിക്കാനായി തിരഞ്ഞെടുത്തു.
കിറ്റക്സില് പരിശോധന നടന്നതുസംബന്ധിച്ച ആരോപണങ്ങള് ഉയര്ന്ന ഉടനെ അദ്ദേഹത്തെ വിളിച്ചു. അദ്ദേഹത്തെ ഫോണില് കിട്ടാത്തതിനാല് അദ്ദേഹത്തെ സഹോദരനെ വിളിച്ചു. വളരെ സൗഹാര്ദപരമായാണ് സംസാരിച്ചത്. പരിശോധിക്കാമെന്ന് ഉറപ്പ് നല്കി. ജില്ലാ വ്യവസായ കേന്ദ്രം മാനേജരും അവരുമായി ബന്ധപ്പെട്ടു.
ജൂണ് 29നാണ് വ്യവസായപദ്ധതിയില് നിന്ന് പിന്മാറുന്നതായി അവര് പ്രഖ്യാപിച്ചത്. അന്നും അവരുമായി താന് നേരിട്ട് ബന്ധപ്പെടാന് രണ്ട് തവണ ശ്രമിച്ചിരുന്നു. ജില്ലാ വ്യവസായ കേന്ദ്രം മാനേജര് അദ്ദേഹത്തെ നേരിട്ട് പോയി ബന്ധപ്പെട്ടു. സര്ക്കാരിനെതിരെ വലിയ ആരോപണങ്ങളും വിമര്ശനങ്ങളും ഉയരുമ്പോഴും ഞങ്ങള് സ്വയം പരിശോധന നടത്തുകയും അവരുമായി ആശയവിനിമയം നടത്തുകയും ചെയ്തിട്ടുണ്ട്. സര്ക്കാര് തന്നെ ബന്ധപ്പെട്ടിട്ടില്ലെന്ന് സാബു എം ജേക്കബ് പറഞ്ഞത് വാസ്തവവിരുദ്ധമാണ്.
ദേശീയ തലത്തില് തന്നെ മികച്ച നിക്ഷേപസൗഹാര്ദ അന്തരീക്ഷുള്ള സംസ്ഥാനമാണ് കേരളം. നീതി ആയോഗിന്റെ റിപ്പോര്ട്ടുകളിലടക്കം കേരളത്തിന്റെ റാങ്കിങ് വളരെ ഉയര്ന്ന നിലയിലാണ്. യുപി മുഖ്യമന്ത്രിയെ കേരളം മാതൃകയാക്കണമെന്ന് പറയുന്നതൊക്കെ അപമാനകരമാണെന്നും വ്യവസായ മന്ത്രി ചൂണ്ടിക്കാട്ടി.
