അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ചേർത്തലയിൽനിന്ന് നിയമസഭയിലേക്കുള്ള കന്നിജയത്തിൽ പി പ്രസാദിന് ലഭിക്കുന്നത് പിണറായി മന്ത്രി സഭയിലെ കൃഷി വകുപ്പ് മന്ത്രി എന്ന പദവി.പരിസ്ഥിതി പ്രവർത്തകൻ കൂടിയായ പ്രസാദ് സിപിഐ സംസ്ഥാന എക്സിക്യൂട്ടീവ് അംഗവും കേരള ഹൗസിങ് ബോർഡ് ചെയർമാനുമാണ്.
ആലപ്പുഴ ജില്ലയിലെ നൂറനാട് പാലമേലിൽ ആണ് പ്രസാദിന്റെ ജന്മദേശം. എഐടിയുസി നേതാവും സിപിഐ ആലപ്പുഴ ജില്ലാ കൗൺസിൽ അംഗവുമായിരുന്നു പ്രസാദിന്റെ പിതാവ് ജി.പരമേശ്വരൻ നായർ. നൂറനാട് സിബിഎം ഹൈസ്കൂൾ, പന്തളം എൻഎസ്എസ് കോളജ് എന്നിവിടങ്ങളിൽ ഇദ്ദേഹത്തിന്റെ വിദ്യാഭ്യാസം. ഗണിതശാസ്ത്രത്തിൽ ബിരുദം. സ്കൂൾകാലത്ത് എഐഎസ്എഫിലൂടെ രാഷ്ട്രീയത്തിലെത്തി. എഐഎസ്എഫ് സംസ്ഥാന എക്സിക്യൂട്ടീവ് അംഗവും സംസ്ഥാന പ്രസിഡന്റുമായി.സിപിഐ പത്തനംതിട്ട ജില്ലാ സെക്രട്ടറി, ഓൾ ഇന്ത്യ ആദിവാസി മഹാസഭ ദേശീയ എക്സിക്യൂട്ടീവ് അംഗം, കേരള സർവകലാശാല സെനറ്റ് അംഗം തുടങ്ങിയ ചുമതലകൾ വഹിച്ചു. 2011ൽ അന്നത്തെ വനംവകുപ്പ് മന്ത്രി ബിനോയ് വിശ്വത്തിന്റെ അഡീഷനൽ പ്രൈവറ്റ് സെക്രട്ടറിയും ജനയുഗത്തിന്റെ തിരുവനന്തപുരം യൂണിറ്റ് മാനേജരുമായിരുന്നു.
ആറന്മുള വിമാനത്താവളം വിരുദ്ധ സമരം, പ്ലാച്ചിമട സമരം, കരിമണൽ ഖനന വിരുദ്ധ സമരം തുടങ്ങിയവയ്ക്കു പ്രസാദ്നേതൃത്വം നൽകി. മേധാ പട്കർക്കൊപ്പം നർമദ ബച്ചാവോ ആന്തോളൻ സമരത്തിൽ പ്രസാദ് പങ്കെടുത്തിട്ടുണ്ട്.
