അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ദിവസങ്ങൾ മുന്നോട്ട് പോകുംതോറും ബിഗ്‌ബോസ് വീട്ടിലെ കാര്യങ്ങൾ കൂടുതൽ സംഭവബഹുലമായിക്കൊണ്ടിരിക്കുകയാണ്. മത്സരാർഥികൾ തമ്മിൽ എന്നും ഓരോ പ്രശ്നങ്ങളാണ്. ഇപ്പോഴിതാ സഹ മത്സരാർത്ഥിയായ സിജോയെ കയ്യേറ്റം ചെയ്തതിന്റ പേരിൽ റോക്കി ബിഗ് ബോസിന് പുറത്തേക്ക് എന്ന വാർത്തയാണ് ഏറ്റവും ഒടുവിലായി പുറത്തു വരുന്നത്.
ഏറെ നേരം നീണ്ടുനിന്ന ചർച്ചകൾക്ക് പിന്നാലെയാണ് റോക്കിയെ പുറത്താക്കിയതായി ബിഗ് ബോസ് അറിയിച്ചത്. കൺഫെഷൻ റൂമിൽ വച്ചാണ് ബിഗ് ബോസ് റോക്കിയോട് ഇനി ഷോയിൽ തുടരാൻ സാധിക്കില്ലെന്ന് അറിയിച്ചത്.
‘ഈ ബിഗ് ബോസ് വീട്ടിലെ നിയമങ്ങളുടെ ഗുരുതരമായ ലംഘനമാണ് നിങ്ങൾ നടത്തിയത്. അതുകൊണ്ട് തന്നെ ഇനി നിങ്ങൾക്ക് ഇവിടെ തുടരാനാകില്ല. ഇപ്പോൾ തന്നെ യാതൊരു മുന്നറിയിപ്പും ഇല്ലാതെ നിങ്ങളെ ഇവിടെ നിന്നും പുറത്താക്കുകയാണ്. കൂടുതൽ കാര്യങ്ങൾ ഇവിടുത്തെ അധികൃതർ നിങ്ങളെ അറിയിക്കും’, എന്നായിരുന്നു ബിഗ് ബോസ് റോക്കിയോട് പറഞ്ഞത്. ശേഷം റോക്കിയെ പുറത്തേക്ക് കൊണ്ടുപോകുകയും ചെയ്തു.
റോക്കിയെ പുറത്താക്കിയ ശേഷം ആണ് ബിഗ് ബോസ് മറ്റ് മത്സരാർത്ഥികളോട് ഇക്കാര്യം പറയുന്നത്. “റോക്കി ഇവിടെ ചെയ്തത് ബിഗ് ബോസ് നിയമങ്ങളുടെ ഗുരുതര ലംഘനമാണ്. അതുകൊണ്ട് ഇതിനോടകം ഈ ബിഗ് ബോസ് വീട്ടിൽ നിന്നും എന്നെന്നേക്കുമായി റോക്കി പുറത്തായിരിക്കുന്നു”, എന്നാണ് മറ്റ് മത്സരാർത്ഥികളോടായി ബിഗ് ബോസ് പറഞ്ഞത്. ഇതിനോട് വളരെ ഇമോഷണലായാണ് മത്സരാര്‍ത്ഥികള്‍ പ്രതികരിച്ചത്. ഋഷിയും അന്‍സിബയും പൊട്ടിക്കരയുന്നുണ്ടായിരുന്നു. ഇരുവരും ആയിരുന്നു ബിഗ് ബോസ് വീട്ടിലെ റോക്കിയുടെ അടുത്ത സുഹൃത്തുക്കള്‍. പ്രത്യേകിച്ച് ഋഷി.
