എത്ര ചുമച്ചാലും കഫം പുറത്തു വരില്ല, തൊണ്ടകുത്തിയുള്ള ചുമയും: കോവിഡിന് ശേഷമുള്ള ചുമയെ സൂക്ഷിക്കണം

ഉള്ളിൽ നിന്നും കഫം, പുക, പൊടി, തുടങ്ങിയവയെല്ലാം പുറന്തള്ളാൻ സഹായിക്കുന്ന ശരീരത്തിൻ്റെ പ്രതിരോധ പ്രവർത്തനമാണ് ചുമ. ചുമ ശരിക്കും രണ്ടു തരമുണ്ട്. കഫ ചുമയും വരണ്ട ചുമയും. തൊണ്ടയിൽ എന്തോ കുടുങ്ങിയിരിക്കുന്ന തോന്നൽ ആകും കഫച്ചുമയ്ക്ക്. കഫത്തോട് കൂടിയുള്ള ചുമയാണ് ഉള്ളതെങ്കിൽ നിങ്ങൾ ചുമയ്ക്കുമ്പോൾ ഇത് മൂക്ക്, തൊണ്ട ഭാഗത്ത് അടിഞ്ഞുകൂടി കിടക്കുന്ന കഫത്തെ പുറന്തള്ളുകയും ചെയ്യും. എന്നാൽ ഇതിനു വിപരീതമായി നിങ്ങൾക്ക് വരണ്ട ചുമയാണ് ഉള്ളതെങ്കിൽ ഇത് കഫത്തെ പുറന്തള്ളുകയില്ല.

ശ്വാസകോശ നാളി, തൊണ്ട, തുടങ്ങിയ ഭാഗങ്ങളിൽ അടിഞ്ഞുകൂടിയിരിക്കുന്ന കഫം വരണ്ടതായി മാറുമ്പോഴാണ് സാധാരണഗതിയിൽ നിങ്ങൾക്ക് വരണ്ട ചുമയുടെ ലക്ഷണങ്ങൾ ഉണ്ടാവുന്നത്. സ്വാഭാവികമായി തൊണ്ടയുടെ ഭാഗങ്ങളിൽ ഉണ്ടാവുന്ന ഇക്കിളിപ്പെടുത്തലുകളും കരകരപ്പും ഒക്കെയാണ് ഇത്തരത്തിൽ ഒരാളെ ചുമക്കാൻ പ്രേരിപ്പിക്കുന്നത്. എങ്കിലും ചുമക്കുമ്പോൾ ഒട്ടുംതന്നെ കഫം പുറത്തേക്ക് വരികയും ഇല്ല. വരണ്ട ചുമ ഉണ്ടാവുന്നതിന് പിന്നിൽ പല കാരണങ്ങളും ഉണ്ട്. അവയിൽ ചിലത് ഏതൊക്കെയാണെന്ന് അറിയാം.

വരണ്ട ചുമയുടെ കാരണങ്ങൾ

• ചിലർക്ക് ആസ്ത്മ, ഗ്യാസ്ട്രോ-ഓസോഫേഷ്യൽ റിഫ്ലക്സ് തുടങ്ങിയ രോഗങ്ങൾ മൂലം ഇത് ഉണ്ടാകാൻ സാധ്യതയുണ്ട്
• അമിതമായ പുകവലി പലപ്പോഴും വരണ്ട ചുമയിലേക്ക് നയിക്കും
• നിങ്ങൾക്ക് അലർജിയുണ്ടാക്കുന്ന പദാർത്ഥങ്ങൾ, പൂമ്പൊടി, പൊടിപടലങ്ങൾ അല്ലെങ്കിൽ വളർത്തുമൃഗങ്ങളുടെ രോമങ്ങൾ തുടങ്ങിയവ ശ്വസിക്കുന്നത് കാരണം അലർജി ഉണ്ടാവുകയും ഇത് വരണ്ട ചുമയിലേക്ക് നയിക്കുകയും ചെയ്യും
• അപ്പർ എയർവേ സിൻഡ്രോം എന്നറിയപ്പെടുന്ന രോഗലക്ഷണം ഉള്ളവർക്ക് വരണ്ട ചുമ സാധാരണമാണ്
• ശ്വാസനാളത്തിലെ വീക്കത്തിന് കാരണമാകുന്ന ലാറിഞ്ചൈറ്റിസ് രോഗവും ഇതിന് വഴിയൊരുക്കും. ഈ രോഗമുണ്ടെങ്കിൽ കാലക്രമേണ നിങ്ങളുടെ ശബ്ദത്തിനും മാറ്റം വന്നേക്കാം.
• കൃത്യമായ ഉറക്കം ലഭിക്കാത്ത ആളുകൾക്കും ഉറക്കത്തിൽ കൂർക്കം വലിക്കുന്ന സ്വഭാവം ഉള്ളവർക്കും വരണ്ട ചുമയുടെ ലക്ഷണങ്ങൾ ഉണ്ടാകാനിടയുണ്ട്
• ശ്വാസകോശ സംബന്ധമായ രോഗങ്ങൾ ഉള്ളവരിലും ഇത്തരം ലക്ഷണങ്ങൾ പ്രകടമാകാറുണ്ട്.
• ചില മരുന്നുകളുടെ പാർശ്വഫലമായി ഇത് ഉണ്ടാകാറുണ്ട്. ഉദാഹരണത്തിന്, ഉയർന്ന രക്തസമ്മർദ്ദത്തിന് നിർദ്ദേശിക്കപ്പെടുന്ന മിക്ക ACE ഇൻഹിബിറ്ററുകളുടെ പാർശ്വഫലമായി ഇത് പ്രകടമാകാറുണ്ട്

ചുമയ്ക്ക് വീട്ടു വൈദ്യം

• ചൂട് വെള്ളത്തിൽ ഉപ്പ് ചേർത്ത് ഇതിലേക്ക് ഒരു നുള്ള് മഞ്ഞളും ചേർത്ത് വായിൽ കൊള്ളുന്നത് തൊണ്ട വേദനയ്ക്കും വരണ്ട ചുമയ്ക്കും കാരണമാകുന്ന അസ്വസ്ഥതകൾക്ക് എതിരേ ആശ്വാസം പകരാൻ നല്ലതാണ്
• നിങ്ങളുടെ മുറിയിൽ ഒരു ഹ്യുമിഡിഫയർ ഉപയോഗിക്കുന്നത് വരണ്ട ചുമയുടെ ലക്ഷണങ്ങൾ ഒരു പരിധിവരെ കുറയ്ക്കാൻ സഹായിക്കും. നിങ്ങൾ നിൽക്കുന്ന അന്തരീക്ഷ വായുവിൽ ഈർപ്പം കൂടുതൽ ഉള്ളത് വരണ്ട ചുമയുടെ ലക്ഷണങ്ങളെ പ്രതിരോധിക്കും.
• ചുമയുള്ളപ്പോൾ ആവി പിടിക്കുന്നത് വളരെയധികം നല്ലതാണ്. തുളസി, അയമോദകം, ഇഞ്ചി തുടങ്ങിയ പ്രകൃതിദത്ത ചേരുവകൾ ചേർത്ത് ആവി കൊള്ളുന്നത് കൂടുതൽ ഗുണം ചെയ്യും.
• വരണ്ട ചുമയെ നേരിടാനും തൊണ്ടയിലെ അസ്വസ്ഥതകൾ ശമിപ്പിക്കുന്നതിനുമായി ഇടയ്ക്കിടെ കുറച്ച് തേൻ കഴിക്കുന്നത് നല്ലതാണ്. പണ്ടുമുതലേ ചുമയ്ക്കുള്ള ഒരു ഫലപ്രദമായ പരിഹാരമായി തേൻ ഉപയോഗിച്ചുവരുന്നുണ്ട്.
• നമുക്ക് ചുറ്റുമുള്ള പല ഔഷധ സസ്യങ്ങൾക്കും ആൻറി ഇൻഫ്ളമേറ്ററി ഗുണങ്ങൾ ഉണ്ട്. ഇവയുടെ ഉപയോഗവും നിങ്ങളുടെ തൊണ്ടയിലെ വീക്കവും അസ്വസ്ഥതകളും കുറയ്ക്കാൻ സഹായിക്കും.
• തുളസി കുരുമുളക് ഇരട്ടിമധുരത്തിൻ്റെ വേര് മഞ്ഞൾ വെളുത്തുള്ളി തുടങ്ങിയ ചേരുവകൾ വായിലിട്ടു ചവയ്ക്കുന്നതും ഇതിൻറെ നീര് പിഴിഞ്ഞ് കുടിക്കുന്നതും വരണ്ട ചുമയുടെ ലക്ഷണങ്ങൾ കുറയ്ക്കും.
• ധാരാളം ദ്രാവകങ്ങൾ കുടിക്കുക : വരണ്ട ചുമയുടെ ലക്ഷണങ്ങൾ നിങ്ങൾക്ക് കൂടുതലാണെങ്കിൽ ദ്രാവകങ്ങൾ കൂടുതൽ കുടിക്കുന്നത് വളരെ നല്ലതാണ്. ജലാംശം ആവശ്യത്തിന് നൽകുന്നത് നിങ്ങളുടെ തൊണ്ടയെ നനവുള്ളതായി നിലനിർത്താൻ സഹായിക്കും. അങ്ങനെയെങ്കിൽ ഇതിൻ്റെ ലക്ഷണങ്ങൾ നിങ്ങളെ അത്ര അലോസരപ്പെടുത്തുന്ന രീതിയിലുള്ളതായി മാറുകയില്ല. പ്രതിദിനം കുറഞ്ഞത് എട്ട് ഗ്ലാസ് വെള്ളമെങ്കിലും കുടിക്കാൻ ലക്ഷ്യമിടുക
• പൈനാപ്പിളിൽ കാണപ്പെടുന്ന എൻസൈമാണ് ബ്രോമെലൈൻ. വീക്കം, തൊണ്ടയിലെ അസ്വസ്ഥതകൾ എന്നിവ കുറയ്ക്കാൻ സഹായിക്കുന്ന ശക്തമായ ആൻറി ഇൻഫ്ലമേറ്ററി ഗുണങ്ങൾ ഇതിന് ഉണ്ട്.
• നിങ്ങളുടെ കുടലിൻ്റെ ആരോഗ്യത്തെ മെച്ചപ്പെടുത്താൻ കഴിയുന്ന ആരോഗ്യകരമായ ബാക്ടീരിയകളാണ് പ്രോബയോട്ടിക്സ്. ഇവയുടെ ആരോഗ്യകരമായ ബാലൻസ് നിങ്ങളുടെ കുടലിനെ ആരോഗ്യകരമായി നിലനിർത്തുക മാത്രമല്ല, രോഗപ്രതിരോധ ശേഷിയെ ശക്തിപ്പെടുത്തുകയും ചെയ്യുന്നു. അതുവഴി നിങ്ങൾക്ക് അണുബാധയുടെ ലക്ഷണങ്ങളെയും ചെറുക്കാൻ കഴിയും. പ്രോബയോട്ടിക്സ് മിക്ക മരുന്നുകടകളിലും ഒരു ഭക്ഷണ സപ്ലിമെന്റായി ലഭ്യമാണ്. അതല്ലെങ്കിൽ തൈരിൽ ഇവ കൂടുതലായി അടങ്ങിയിട്ടുണ്ട്. ഈ ഭക്ഷണപദാർത്ഥം കൂടുതൽ കഴിക്കുന്നത് വഴി നിങ്ങൾക്കിത് കണ്ടെത്താം.
• നിങ്ങളുടെ രോഗപ്രതിരോധ സംവിധാനത്തിൽ വിറ്റാമിൻ സി പോഷകങ്ങൾ ഒരു പ്രധാന പങ്ക് വഹിക്കുന്നു. അതുകൊണ്ടുതന്നെ ഇവ ലഭിക്കുന്ന ഭക്ഷണപദാർത്ഥങ്ങളും കൂടുതൽ കഴിക്കാം. 3-4 ആഴ്ചയിൽ കൂടുതൽ ചുമ നിൽക്കുന്നുണ്ടെങ്കിൽ മെഡിക്കൽ ഹെല്പ് തേടുക.