അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തിരുവനന്തപുരം: ഉഷ്ണതരംഗസാധ്യതയെത്തുടർന്ന് ഏർപ്പെടുത്തിയ തൊഴിൽ സമയക്രമീകരണം ഹൈറേഞ്ച് മേഖലയ്ക്കും ബാധകം. തൊഴിൽ സമയ ക്രമീകരണങ്ങളിൽ നിന്നും സമുദ്രനിരപ്പിൽ നിന്ന് 3000 അടി ഉയരമുള്ള പ്രദേശങ്ങളെ ഒഴിവാക്കിയിരുന്നു. ഉഷ്ണ തരംഗത്തിന്റെ വ്യാപ്തി കണക്കിലെടുത്താണ് തോട്ടം തൊഴിലാളികൾ അടക്കമുള്ള എല്ലാ തൊഴിലാളികൾക്കും ഉത്തരവ് ബാധകമാക്കിയത്.
ഈ മേഖലകളില് ഉച്ചക്ക് 12 മുതല് വൈകിട്ട് മൂന്ന് വരെ തൊഴിലാളികള് വെയിലത്ത് ജോലി ചെയ്യുന്നത് കണ്ടെത്തിയാല് തൊഴിലുടമക്കെതിരെ കര്ശന നടപടി സ്വീകരിക്കും. സംസ്ഥാനത്ത് മുഴുവന് തൊഴിലിടങ്ങളിലും ഉത്തരവിന്റെ അടിസ്ഥാനത്തില് ജില്ലാ ലേബര് ഓഫീസര്, ഡെപ്യൂട്ടി ലേബര് ഓഫീസര്, അസി. ലേബര് ഓഫീസര് എന്നിവരുടെ മേല് നോട്ടത്തില് പ്രത്യേക ടീമുകള് രൂപീകരിച്ച് കര്ശന പരിശോധനകള് നടത്തിവരികയാണെന്നും ലേബര് കമ്മീഷണര് പറഞ്ഞു.
മെയ് 15 വരെ രാവിലെ 7 മുതല് വൈകുന്നേരം 7 മണി വരെയുള്ള സമയത്തില് എട്ട് മണിക്കൂറായി ജോലി സമയം നിജപ്പെടുത്തി ഉത്തരവായിട്ടുണ്ട്. പകല് സമയം ജോലി ചെയ്യുന്ന എല്ലാ തൊഴിലാളികള്ക്കും ഉച്ചയ്ക്ക് 12 മുതല് വൈകുന്നേരം മൂന്ന് മണിവരെ വിശ്രമവേളയായിരിക്കും. ഷിഫ്റ്റ് വ്യവസ്ഥയില് ജോലി ചെയ്യുന്ന തൊഴിലാളികള്ക്ക് ഷിഫ്റ്റുകള് ഉച്ചയ്ക്ക് 12 മണിക്ക് അവസാനിക്കുന്ന തരത്തിലും വൈകുന്നേരം 3 മണിക്ക് ആരംഭിക്കുന്ന തരത്തിലുമാണ് പുനക്രമീകരണം. കണ്സ്ട്രക്ഷന്, റോഡ് നിര്മാണം, തോട്ടം മേഖലകളില് വരും ദിവസങ്ങളില് കര്ശന പരിശോധന ഉറപ്പാക്കുമെന്നും കമ്മീഷണര് അറിയിച്ചു.
