അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തിരുവനന്തപുരം : സ്വന്തം ചികിത്സക്ക് വേണ്ടി ഡോക്ടറെ വീട്ടിലേക്ക് വിളിച്ചു വരുത്തുകയും മണിക്കൂറുകള് കാത്ത് നിര്ത്തുകയും ചെയ്ത തിരുവനന്തപുരം ജില്ലാ കളക്ടറുടെ നടപടിയെ ഒരു ചാനല് ചര്ച്ചയില് വിമര്ശിച്ച ജോയിന്റ് കൗണ്സില് ജനറല് സെക്രട്ടറിക്ക് കാരണം കാണിക്കല് നോട്ടീസ് നല്കിയ റവന്യൂ പ്രിന്സിപ്പല് സെക്രട്ടറിയുടെ നടപടി സംഘടനാ സ്വാതന്ത്ര്യത്തിലുള്ള കടന്നുകയറ്റം ആണെന്ന് ജോയിന്റ് കൗണ്സില് സംസ്ഥാന സെക്രട്ടറിയേറ്റ് പ്രസ്താവനയില് പറഞ്ഞു.
തിരുവനന്തപുരം ജനറല് ആശുപത്രിയില് ഒ.പി വിഭാഗത്തില് രോഗികളെ പരിശോധിച്ചു കൊണ്ടിരുന്ന ഡോക്ടറെയാണ് വസതിയിലേക്ക് വിളിച്ചു വരുത്തിയത്. സാധാരണ രോഗികള്ക്ക് ലഭിക്കേണ്ട ചികിത്സ നിഷേധിച്ച കളക്ടറുടെ നടപടി അധികാര ദുര്വിനിയോഗവും ഉദ്യോഗസ്ഥ ദുഷ് പ്രഭുത്വവുമാണ്.
സര്ക്കാരിനും റവന്യൂ വകുപ്പിനും പൊതുജനമധ്യത്തില് അവമതിപ്പുണ്ടാക്കുന്നതായിരുന്നു കളക്ടര് ജെറോമിക് ജോര്ജിന്റെ നടപടി . ഇതിനുമുന്പ് സിവില് സ്റ്റേഷനിലെ ലിഫ്റ്റ് പൊതുജനങ്ങള്ക്ക് ഉപയോഗിക്കാന് കഴിയാത്ത വിധം തന്റെ മാത്രം ഉപയോഗത്തിനായി പിടിച്ചിട്ടത് മാധ്യമ വാര്ത്തയായിരുന്നു. ഇത്തരത്തില് നിരന്തരം സര്ക്കാരിന് അവമതിപ്പുണ്ടാക്കുന്ന കളക്ടറോട് വിശദീകരണം ചോദിക്കേണ്ടതിനു പകരം സര്വ്വീസ് സംഘടനാ ഭാരവാഹികള്ക്കെതിരെ ചട്ടങ്ങളെ വളച്ചൊടിച്ച് അച്ചടക്ക ഭീഷണി മുഴക്കുന്നത് അംഗീകരിക്കാന് ആവില്ല.
ജനാധിപത്യ കേരളം ലോകത്തിന് മാതൃകയായി മാറിയത് സിവില് സര്വ്വീസിലെ ജീവനക്കാരുടെ കഠിനാദ്ധ്വാനത്തിന്റെയും ജനാധിപത്യ ബോധമുള്ള ഭരണകൂടങ്ങളുടെ ഇച്ഛാശക്തിയുടെയും ഫലമായാണ്. രാജവാഴ്ചയിലേക്ക് തിരികെ കൊണ്ടുപോകാന് ഏതെങ്കിലും ബ്യൂറോക്രാറ്റ് ശ്രമിച്ചാല് എന്ത് വില കൊടുത്തും അതിനെ ചെറുക്കും.
അഴിമതിരഹിതവും കാര്യക്ഷമവും ജനോപകാരപ്രദവുമായ സിവില് സര്വ്വീസിനു വേണ്ടി പ്രവര്ത്തിക്കുന്ന ജോയിന്റ് കൗണ്സിലിനെ നിശബ്ദമാക്കാന് ഇത്തരം ഭീഷണികള് കൊണ്ട് കഴിയില്ല . സിവില് സര്വ്വീസിലെ അഴിമതിക്കാര്ക്കെതിരെ ജോയിന്റ് കൗണ്സില് നടത്തിയിട്ടുള്ള ക്യാമ്പയിനുകള് ചരിത്രത്തിന്റെ ഭാഗമാണ്. ഉദ്യോഗസ്ഥ ദുഷ്പ്രഭുത്വത്തെ തുറന്നുകാട്ടുകയും അത്തരക്കാരെ ഒറ്റപ്പെടുത്തുകയും ചെയ്യുകയെന്നത് ജോയിന്റ് കൗണ്സിലിന്റെ പ്രഖ്യാപിത ലക്ഷ്യമാണ്.
സര്വ്വീസ് സംഘടനാ ഭാരവാഹികള് പ്രതികരിക്കുമ്പോള് മേല് ഉദ്യോഗസ്ഥനെ വിമര്ശിച്ചു എന്ന് പറഞ്ഞ് വിശദീകരണം ചോദിക്കുന്നത് ജനാധിപത്യത്തിന്റെ അന്ത:സത്തയ്ക്ക് നിരക്കുന്നതല്ല. സംഘടനാ സ്വാതന്ത്ര്യത്തിലേക്ക് കടന്നു കയറുന്ന റവന്യൂ പ്രിന്സിപ്പല് സെക്രട്ടറിയുടെ നടപടിയില് ശക്തമായ പ്രതിഷേധം രേഖപ്പെടുത്തുന്നു.
ഈ നടപടിയില് പ്രതിഷേധിച്ചുകൊണ്ട് മേയ് പതിമൂന്നാം തീയതി തിങ്കളാഴ്ച എല്ലാ കളക്ട്രേറ്റുകളിലും പ്രതിഷേധ പ്രകടനങ്ങള് നടത്തുവാന് ജീവനക്കാരോട് അഭ്യര്ത്ഥിക്കുന്നു. ജനറല് സെക്രട്ടറി
Mob. No. 98957 55693.
