ഡിവിഡന്റും ബോണസ് ഷെയറും എന്തിനാണ് നൽകുന്നത്.?

എന്തിനാണ് ഡിവിഡന്റും ബോണസ് ഷെയറും ഒക്കെ നൽകുന്നത്.കമ്പനികൾ ഇത് കൊണ്ട് എന്താണ് ഉദ്ദേശിക്കുന്നത്.?
ഓഹരി ഉടമകൾക്കുള്ള പാരിതോഷികമെന്ന നിലയിലാണ് ഡിവിഡന്റും ബോണസ് ഷെയറും ഒക്കെ കമ്പനികൾ അതാത് സമയങ്ങളിൽ പ്രഖ്യാപിക്കുന്നത്. ഇത്തരം കോർപറേറ്റ് ആനുകൂല്യ നടപടികളിലൂടെ ഓഹരി ഉടമകൾക്ക് വരുമാനം ലഭിക്കുന്നതിനാൽ നികുതി ബാധ്യതയും കാത്തിരിക്കുന്നുണ്ട്. ഓഹരി നിക്ഷേപകർക്ക് ഏറ്റവുമധികം ലഭിക്കുന്ന ആനുകൂല്യങ്ങളായ ഡിവിഡന്റ്, ബോണസ് ഷെയർ എന്നിവയുടെ നികുതി ബാധ്യത എത്രയെന്നും എങ്ങനെയെന്നും നോക്കാം.ഒരു കമ്പനിയുടെ അറ്റാദായത്തിൽ നിന്നും അതിന്റെ ഓഹരി ഉടമകൾക്ക് വീതിച്ചു നൽകുന്ന പ്രതിയോഹരി വീതമാണ് ഡിവിഡന്റ്. പ്രധാനമായും മൂന്ന് രീതിയിലാണ് ഡിവിഡന്റ് നിക്ഷേപകന് ലഭിക്കുക. ഫൈനൽ ഡിവിഡന്റ്, ഇന്ററിം ഡിവിഡന്റ് സ്പെഷ്യൽ ഡിവിഡന്റ്.മേൽസൂചിപ്പിച്ച ഡിവിഡന്റുകൾ എല്ലാം, ഓഹരി കൈവശം നിലനിർത്തിക്കൊണ്ടു തന്നെ ഓഹരി ഉടമകൾക്ക് ലഭിക്കുന്ന അധിക വരുമാനമാണ്. ആയതിനാൽ ഇൻകം ടാക്സ് റിട്ടേൺ സമർപ്പിക്കുന്ന ഘട്ടത്തിൽ, നിക്ഷേപകന്റെ വാർഷിക ആദായത്തിനൊപ്പം ഡിവിഡന്റ് ഇനത്തിൽ സ്വീകരിച്ച തുകയും കൂടി ചേർക്കണം. തുടർന്നുള്ള മൊത്തം വരുമാനത്തിന് നിക്ഷേപകന്റെ നികുതി സ്ലാബ് അടിസ്ഥാനമാക്കിയുള്ള നിരക്കിൽ നികുതി നൽകണം.പണമായി ഡിവിഡന്റ് നൽകുന്നതിനു പകരമായി ഓഹരി ഉടമകൾക്ക് നിശ്ചിത അനുപാതത്തിൽ കൈമാറുന്ന അധിക ഓഹരികളാണ് ബോണസ് ഷെയർ എന്നു വിശേഷിപ്പിക്കുന്നത്. സ്റ്റോക്ക് ഡിവിഡന്റ് എന്നും പറയാം. കമ്പനികൾ സൗജന്യമായാണ് ബോണസ് ഷെയർ നൽകുന്നതിനാൽ ഓഹരി ഉടമകൾക്ക് അധിക വരുമാനം ലഭിക്കുന്ന അവസരമാണിത്. അതേസമയം, ബോണസ് ഷെയർ സ്വീകരിക്കുമ്പോൾ ഓഹരി ഉടമകൾക്ക് നികുതി ബാധ്യത വരുന്നില്ല. പകരം അതു വിൽക്കുന്ന കാലയളവ് പ്രകാരമാണ് നികുതി ബാധകമാകുന്നത്. കാരണം, കമ്പനിയുടെ കൈവശമുള്ള മൂല്യം പുനർവിന്യസിക്കുന്നതായാണ് ബോണസ് ഷെയറിനെ കണക്കാക്കുന്നത്. കമ്പനിയിൽ നിന്നും സ്വീകരിച്ചതു മുതൽ ബോണസ് ഷെയർ വിൽക്കുന്നതു വരെയുള്ള കാലയളവിന്റെ അടിസ്ഥാനത്തിലാണ് നികുതി ബാധ്യത കണക്കുകൂട്ടുക. 2018 ജനുവരി 31ന് മുൻപ് അനുവദിച്ച ബോണസ് ഷെയർ ആണെങ്കിൽ, ആ ഓഹരിയുടെ 2018 ജനുവരി 31ലെ ക്ലോസിങ് വിലയുടെ അടിസ്ഥാനത്തിലാകും ബോണസ് ഷെയറിന്റെയും വില കണക്കുകൂട്ടുക. അതിനാൽ ഇത്തരം ബോണസ് ഷെയർ വിൽക്കുമ്പോൾ‌ നിലവിലെ വിപണി വിലയും 2018 ജനുവരി 31ലെ ക്ലോസിങ് വിലയും തട്ടിക്കിഴിച്ചുള്ള വരുമാനത്തിനാകും നികുതി നൽകേണ്ടത്.