അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ബെംഗളൂരു: ലഹരി പാർട്ടി കേസിൽ തെലുങ്ക് നടി ഹേമയെ സെൻട്രൽ ക്രൈം ബ്രാഞ്ച് അറസ്റ്റ് ചെയ്തു. ഇന്ന് ഹേമയടക്കം എട്ടുപേരെ നോട്ടീസ് നൽകി ചോദ്യം ചെയ്യാൻ വിളിപ്പിച്ചിരുന്നു. ഇതിന് പിന്നാലെയാണ് നടിയുടെ അറസ്റ്റ് രേഖപ്പെടുത്തിയത്.
ഇലക്ട്രോണിക് സിറ്റിയിലെ ജി.ആർ ഫാംഹൗസിൽ മേയ് 19നു നടന്ന റെയ്ഡിലാണ് മയക്കുമരുന്ന് ഉൾപ്പെടെയുള്ള ലഹരി വസ്തുക്കൾ പിടികൂടിയത്. ‘സൺസെറ്റ് ടു സൺറൈസ് വിക്ടറി’ എന്ന പേരിൽ നടന്ന പാർട്ടിയിൽ തെലുങ്ക് താരങ്ങൾ, ഐ.ടി ജീവനക്കാർ ഉൾപ്പെടെ നൂറോളം പ്രമുഖരാണു പങ്കെടുത്തിരുന്നത്. രഹസ്യ വിവരത്തിന്റെ അടിസ്ഥാനത്തിലാണ് നാർകോട്ടിക്‌സ് വിഭാഗവും പൊലീസും സ്ഥലത്തെത്തിയത്.
പരിശോധനയിൽ ലഹരി വസ്തുക്കൾ പിടിച്ചെടുക്കുകയായിരുന്നു. തുടർന്നു നടത്തിയ ചോദ്യംചെയ്യലിൽ നടി പാർട്ടിയിൽ പങ്കെടുത്തിട്ടില്ലെന്നു വ്യക്തമാക്കിയിരുന്നു. എന്നാൽ, പാർട്ടിയിൽ പങ്കെടുത്ത 73 പുരുഷന്മാരുടെയും 30 സ്ത്രീകളുടെയും മൂത്ര സാംപിളുകൾ നാർകോട്ടിക്‌സ് വിഭാഗം പരിശോധിച്ചു. ഇതിൽ 59 പുരുഷന്മാരും 27 സ്ത്രീകളും ലഹരി ഉപയോഗിച്ചതായി വ്യക്തമായി.
തെലുങ്ക് നടൻ ആഷി റോയിയും പാർട്ടിയിൽ പങ്കെടുത്തിരുന്നു. നിശാ പാർട്ടി സംഘാടകനും മൂന്ന് ലഹരി ഇടപാടുകാരും ഉൾപ്പെടെ അഞ്ചുപേർ കേസിൽ നേരത്തെ അറസ്റ്റിലായിരുന്നു.
