അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.സഹകരണമേഖലയിലൂടെ സംസ്ഥാനത്തിന്റെ വികസനം സാധ്യമാക്കുന്നതിനായി സമഗ്ര സഹകരണ കർമ്മ പദ്ധതിക്ക് രൂപം നൽകിയതായി സഹകരണവകുപ്പ് മന്ത്രി വി എൻ വാസവൻ നിയമസഭയെ അറിയിച്ചു. കാർഷിക മേഖല, നിർമ്മാണ സർവ്വീസ് മേഖലകൾ, ആരോഗ്യം, വിദ്യാഭ്യാസം , വ്യവസായം , വിനോദസഞ്ചാരം തുടങ്ങി സഹകരണ മേഖലയുടെ സജീവസാന്നിധ്യമുള്ള എല്ലാ രംഗത്തും സുസ്ഥിരമായ വികസനം സാധ്യമാക്കുന്ന പദ്ധതികൾ ഉൾപ്പെടുത്തിയാണ് സമഗ്രസഹകരണ വികസന പദ്ധതിക്ക് രൂപം നൽകിയിരിക്കുന്നത്. കൂടുതൽ തൊഴിലവസരങ്ങൾ സഹകരണമേഖലയിൽ സാധ്യമാക്കുന്നതിനായി സഹകരണ സ്ഥാപനങ്ങളുടെ ആഭിമുഖ്യത്തിൽ ഉത്പാദനയൂണിറ്റുകൾ ആരംഭിക്കും. കൂടാതെ കൂടുതൽ വായ്പകൾ ഉത്പാദനമേഖലയിൽ അനുവദിക്കും.
നൈപുണ്യവായ്പാ പദ്ധതി, സഹായഹസ്തം പദ്ധതി, സ്‌നേഹതീരം പദ്ധതി എന്നിവ വിപുലീകരിക്കാനും നടപടി സ്വീകരിച്ചിട്ടുണ്ടന്ന് മന്ത്രി പറഞ്ഞു.
ആരോഗ്യവിദ്യാഭ്യാസ മേഖലയിൽ കൂടുതൽ നഴ്‌സിങ്ങ് പാരാമെഡിക്കൽ കോഴ്‌സുകൾ ആരംഭിക്കുന്നതിന് നടപടി സ്വീകരിച്ചു തുടങ്ങി. സഹകരണ ആശുപത്രികളുടെ അപക്‌സ് സ്ഥാപനമായ ആശുപത്രി ഫെഡറേഷൻന്റെ ആഭിമുഖ്യത്തിൽ വൈറോളജി ലാബ് ആരംഭിക്കുന്നതിനുള്ള പ്രവർത്തനങ്ങൾ തുടങ്ങി. വനിതാ സഹകരണസംഘങ്ങളുടെ പ്രവർത്തന മേഖല വിപുലീകരിച്ച് വൈവിധ്യമാർന്ന പദ്ധതികൾ ഏറ്റെടുക്കുന്നതിനുള്ള നടപടികളിലേക്ക് കടന്നു. വ്യവസായ വകുപ്പുമായി ചേർന്ന വനിതാസംഘങ്ങളുടെ ഉത്പാദന യൂണിറ്റുകൾ ആരംഭിക്കും. സഹകരണ സംഘങ്ങളുടെ ആഭിമുഖ്യത്തിൽ വ്യവസായ പാർക്കുകൾ ആരംഭിക്കും.
കാർഷിക ഉത്പന്നങ്ങളുടെ ഉത്പാദനത്തിനും, സംഭരണത്തിനും, വിപണത്തിനുമുള്ള ഇടപടലിനായി കോ ഓപ്പറേറ്റീവ് ഇനിഷ്യേറ്റീവ് ഇൻ ടെക്‌നോളറി ഡ്രൈവൺ അഗ്രികൾച്ചർ പദ്ധതി രൂപീകരിച്ചിട്ടുണ്ട്. കർഷകർക്ക് വരുമാനവും, സാധാരണക്കാർക്ക് ഗുണമേന്മയുള്ള അരിയും ലഭ്യമാക്കുന്നത് ലക്ഷ്യമിട്ട് പ്രവർത്തനം തുടങ്ങിയ കാപ്‌കോസിന്റെ നേതൃത്വത്തിൽ റൈസ് മില്ല് ആരംഭിക്കുന്നതിനുള്ള നടപടികൾ പുരോഗമിച്ചു വരുന്നു. സംസ്ഥാനത്തിന്റെ ഭക്ഷ്യ സുരക്ഷ ഉറപ്പുവരുത്തുക, തൊഴിൽ അവസരം സൃഷ്ടിക്കുക, സുസ്ഥിര വികസനം സാധ്യമാക്കുക എന്നിവയാണ് സമഗ്ര സഹകരണ വികസന കർമ്മപദ്ധതിയിലൂടെ ലക്ഷ്യമിടുന്നതെന്ന് മന്ത്രി പറഞ്ഞു. മന്ത്രി ഒ. ആർ കേളു, ടി പി രാമകൃഷ്ണൻ, എച്ച് സലാം, എന്നിവരുടെ ചോദ്യത്തിന് ഉത്തരമായാണ് മന്ത്രി ഇക്കാര്യം നിയമസഭയെ അറിയിച്ചത്.
