അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.2022 ഏപ്രില്‍ 14-നായിരുന്നു ആലിയ -റണ്‍ബീര്‍ വിവാഹം. 2022 നവംബറില്‍ ദമ്പതികള്‍ അവരുടെ മകള്‍ റാഹയെ സ്വാഗതം ചെയ്തു. ഏകദേശം ഒരു വര്‍ഷത്തോളം ദമ്പതികള്‍ റാഹയുടെ ചിത്രങ്ങള്‍ എവിടെയും പോസ്റ്റ് ചെയ്തിരുന്നില്ല. 2023 ലെ ക്രിസ്മസ് ദിനത്തിലാണ് ഇരുവരും റാഹയ്ക്കൊപ്പമുളള ഫോട്ടോ ആദ്യമായി പങ്കുവെച്ചത്. പിന്നീടിങ്ങോട്ട് റാഹയുമൊത്തുളള വിശേഷങ്ങള്‍ താരദമ്പതിമാര്‍ സോഷ്യല്‍ മീഡിയയില്‍ പങ്കുവെക്കാറുണ്ടായിരുന്നു. റാഹയെ കുറിച്ച് ഒരുപാട് വാചാലരാവുകയും ചെയ്തിരുന്നു ഇരുവരും.
ഇപ്പോളിതാ ആലിയ ഭട്ടിന്റെയും മകളുടെയും ഒരു വീഡിയോ ആണ് സോഷ്യല്‍ മീഡിയയില്‍ വൈറലാകുന്നത്. മഴയുള്ള ഒരു വൈകുന്നേരം കാറില്‍ നിന്നും റാഹയുമൊത്ത് ഇറങ്ങുന്ന ആലിയ ഭട്ടിന്റെ വീഡിയോയാണ് സോഷ്യല്‍ മീഡിയയില്‍ വൈറലായിക്കൊണ്ടിരിക്കുന്നത്. ആലിയയുടെ തോളില്‍ കിടന്നുറങ്ങുന്ന റാഹയെ മഴ നനയാതിരിക്കാനായി ആലിയ ഒരു പുതപ്പെടുത്ത് പുതുപ്പിക്കുന്നതായാണ് വീഡിയോയില്‍ കാണുന്നത്. നിമിഷനേരം കൊണ്ടാണ് വീഡിയോ ആരാധകര്‍ ഏറ്റെടുത്തത്. നിരവധി കമന്റ്‌സുകളാണ് വീഡിയോയ്ക്ക് ലഭിച്ചുകൊണ്ടിരിക്കുന്നതും.
View this post on Instagram
‘ഒരമ്മ കുട്ടികളെ എങ്ങനെ പരിപാലിക്കണമെന്ന് ആലിയ ഭട്ട് കാണിച്ചുതരുന്നു’എന്നായിരുന്നു ഒരു കമന്റ്. മറ്റൊരു കമന്റ് ആകട്ടെ ‘അവര്‍ കുഞ്ഞിനെ സ്വന്തമായി എടുത്തുകൊണ്ടു പോകുന്നു’എന്നായിരുന്നു. ‘ആലിയക്ക്് മാത്രമേ ബോളിവുഡില്‍ ഇതൊക്കെ ചെയ്യാന്‍ കഴിയൂ’എന്നും ഒരാള്‍ എഴുതി. ബോളിവുഡില്‍ സാധാരണ കുട്ടികളെ എടുത്തുകൊണ്ടു നടക്കുന്നത് അവരുടെ ആയമാരായിരിക്കും.. എന്നാല്‍ അതില്‍ നിന്നെല്ലാം വ്യത്യസ്തയാണ് ആലിയഭട്ടെന്നും ആരാധകര്‍ കുറിച്ചു.
ആലിയയുടെ വരാനിരിക്കുന്ന ചിത്രം ‘ആല്‍ഫ’ ആണ്. യാഷ് രാജ് ഫിലിംസിന്റെ അടുത്ത സ്പൈ യൂണിവേഴ്‌സ് ചിത്രമായ ആല്‍ഫയില്‍ ആലിയ ഭട്ട് ഒരു സൂപ്പര്‍ ഏജന്റായി അഭിനയിക്കാന്‍ ഒരുങ്ങുകയാണ്. വാസന്‍ ബാലയുടെ ജിഗ്ര, സഞ്ജയ് ലീല ബന്‍സാലിയുടെ ലവ് ആന്‍ഡ് വാര്‍ എന്നിവയും ആലിയയുടെ വരാനിരിക്കുന്ന ചിത്രങ്ങളാണ്. 1999 ല്‍ ബാലതാരമായി സംഘര്‍ഷ് എന്ന സിനിമയിലാണ് ആലിയഭട്ട് ആദ്യം അഭിനയിക്കുന്നത്. കരണ്‍ജോഹര്‍ സംവിധാനം ചെയ്ത സ്റ്റുഡന്റ് ഓഫ് ദ ഇയര്‍ (2012) എന്ന സിനിമയിലാണ് ആലിയ നായികയായി ആദ്യം അഭിനയിക്കുന്നത്. ഈ സിനിമയിലെ അഭിനയത്തിന് ആലിയക്ക് ഫിലിംഫെയറിന്റെ മികച്ച പുതുമുഖ അഭിനേത്രിക്കുള്ള പുരസ്‌കാരം ലഭിച്ചു.
