ജൂലൈ 12-നായിരുന്നു അനന്ദ് അംബാനിയുടെയും രാധിക മെര്‍ച്ചന്റിന്റെയും ആഢംബര വിവാഹം. മുംബൈയിലെ ജിയോ വേള്‍ഡ് കണ്‍വെന്‍ഷന്‍ സെന്ററില്‍ നടന്ന പ്രൗഢമായ വിവാഹ ചടങ്ങായിരുന്നു ഇരുവരുടെയും. ബോളിവുഡ് താരങ്ങള്‍, രാഷ്ട്രീയക്കാര്‍, അന്താരാഷ്ട്ര സെലിബ്രിറ്റികള്‍, മറ്റ് പൊതു വ്യക്തികള്‍ എന്നിവര്‍ വിവാഹ ചടങ്ങുകളില്‍ പങ്കെടുത്തിരുന്നു. വിദേശത്തും ഇന്ത്യയിലുമായി നടന്ന പ്രീവെഡ്ഡിങ്ങ് ആഘോഷങ്ങള്‍ക്ക് ശേഷമാണ് മൂന്നു ദിവസ്സം നീണ്ടുനിന്ന അത്യാഢംബര വിവാഹ സല്‍ക്കാരങ്ങള്‍ക്ക് ജിയോ വേള്‍ഡ് കണ്‍വെന്‍ഷന്‍ സാക്ഷിയായത്.
വിവാഹം കഴിഞ്ഞ് ദിവസങ്ങള്‍ പിന്നിട്ടിട്ടും ഇപ്പോളും അംബാനി കല്ല്യാണം വാര്‍ത്തകളില്‍ ഇടം പിടിക്കുകയാണ്. ആനന്ദ് അംബാനിയുടേയും രാധിക മെര്‍ച്ചന്റിന്റേയും വിവാഹാഘോഷത്തിന് നവദമ്പതികള്‍ക്ക് ലഭിച്ച സമ്മാനത്തിന്റെ വിശദാംശങ്ങളാണ് ഏറ്റവും ഒടുവിലായി പുറത്തുവന്നിരിക്കുന്നത്. കോടിക്കണക്കിന് രൂപ വിലമതിക്കുന്ന സമ്മാനങ്ങളാണ് ആനന്ദിനും രാധികയ്ക്കും ബോളിവുഡ് താരങ്ങള്‍ സമ്മാനിച്ചത്.
നവദമ്പതികള്‍ക്ക് ബോളിവുഡിന്റെ കിംഗ് ഖാന്‍ ഷാരൂഖ് ഖാന്‍ സമ്മാനിച്ചത് 40 കോടി രൂപ വില വരുന്ന അപാര്‍ട്മെന്റാണെന്ന് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നത്. ഫ്രാന്‍സിലാണ് ഈ ആഡംബര അപാര്‍ട്മെന്റുള്ളതെന്ന വാര്‍ത്തയും പുറത്തുവരുന്നു. സമ്മാനത്തിന്റെ കാര്യത്തില്‍ ബച്ചന്‍ കുടുംബവും ഒട്ടും പിന്നിലല്ല. 30 കോടി വിലമതിപ്പുള്ള ഒരു മരതക നെക്ക്‌ളേസാണ് അവര്‍ രാധികയ്ക്ക് നല്‍കിയത്. താരദമ്പതിമാരായ രണ്‍വീര്‍ സിങ്ങും ദീപിക പദുക്കോണും 20 കോടി രൂപ വില വരുന്ന കസ്റ്റമൈസ്ഡ് റോള്‍സ് റോയ്സാണ് ദമ്പതികള്‍ക്ക് സമ്മാനമായി നല്‍കിയത്.
ആനന്ദിന്റേയും രാധികയുടേയും അടുത്ത സുഹൃത്തുക്കളായ ആലിയ ഭട്ടും രണ്‍ബീര്‍ കപൂറും ഒമ്പത് കോടി രൂപ വില വരുന്ന മെഴ്‌സഡിഡീസാണ് സമ്മാനിച്ചത്. സമ്മാനപ്പെരുമഴ തീരുന്നില്ല..19 ലക്ഷം രൂപ വില വരുന്ന സ്വര്‍ണമാലയാണ് കത്രീനയും വിക്കിയും രാധികയ്ക്ക് നല്‍കിയത്. 25 ലക്ഷം രൂപയുടെ ഹാന്‍ഡ്മെയ്ഡ് ഷാള്‍ ആണ് കിയാരയുടേയും സിദ്ധാര്‍ഥിന്റേയും സമ്മാനം. ഫെയ്സ്ബുക്ക് സ്ഥാപകന്‍ മാര്‍ക്ക് സുക്കര്‍ബര്‍ഗും ആമസോണ്‍ സിഇഒ ജെഫ് ബെസോസും ഈ പട്ടികയില്‍ ഇടം പിടിക്കുന്നുണ്ട്. 300 കോടി രൂപയുടെ പ്രൈവറ്റ് ജെറ്റാണ് സുക്കര്‍ബര്‍ഗ് സമ്മാനിച്ചതെന്നാണ് റിപ്പോര്‍ട്ടുകള്‍. 11.5 കോടി രൂപ വില വരുന്ന ആഡംബ കാറാണ് ജെഫ് ബെസോസിന്റെ സമ്മാനമെന്നും റിപ്പോര്‍ട്ടുകളുണ്ട്. എന്നാല്‍ ഇക്കാര്യത്തില്‍ ഔദ്യോഗിക സ്ഥിരീകരണങ്ങള്‍ വന്നിട്ടില്ല.