അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കൊൽക്കത്ത: മണിപ്പുരിൽ വിദ്യാർഥിപ്രക്ഷോഭം ആളിക്കത്തിയതോടെ ഇംഫാൽ താഴ്വരയിൽ അനിശ്ചിതകാലത്തേക്കു കർഫ്യൂ പ്രഖ്യാപിച്ചു. 5 ദിവസത്തേക്ക് ഇന്റർനെറ്റ് നിരോധിച്ചു. ഇംഫാൽ ഈസ്റ്റിലും വെസ്റ്റിലും ആളുകൾ വീടിനു പുറത്തിറങ്ങുന്നതു തടഞ്ഞ് കലക്ടർമാർ ഉത്തരവിട്ടു. രാജ്ഭവനിലേക്ക് മാർച്ച് നടത്തിയ മെയ്തെയ് വിദ്യാർഥികൾ ഇന്നലെയും സുരക്ഷാസേനയുമായി ഏറ്റുമുട്ടി. 40 പേർക്ക് പരുക്കേറ്റു.
മണിപ്പുരിലെ സുരക്ഷാ ഉപദേഷ്ടാവിനെയും ഡിജിപിയെയും മാറ്റണമെന്നും യൂണിഫൈഡ് കമാൻഡിന്റെ ചുമതല മുഖ്യമന്ത്രി ബിരേൻ സിങ്ങിന് നൽകണമെന്നും ആവശ്യപ്പെട്ടു രാജ്ഭവനിലേക്ക് മാർച്ച് ചെയ്ത സ്ത്രീകളടക്കമുള്ള ആയിരക്കണക്കിനു വിദ്യാർഥികളെ പൊലീസും സുരക്ഷാ സേനയും തടഞ്ഞു. സമരക്കാർ കല്ലേറു തുടങ്ങിയതോടെ കണ്ണീർവാതക ഷെല്ലുകളുംമോക് ബോംബുകളും ഉപയോഗിച്ചാണു നേരിട്ടത്. ഇംഫാൽ വെസ്റ്റിലും മണിപ്പുർ സർവകലാശാലയിലെ മെയ്തെയ് വിദ്യാർഥികളുടെ നേതൃത്വത്തിൽ വൻറാലി നടന്നു. ആഭ്യന്തരമന്ത്രി അമിത് ഷായുടെ കോലം കത്തിച്ചു. സെക്രട്ടേറിയറ്റിലേക്ക് നീങ്ങിയ വിദ്യാർഥികളെ പൊലീസ് തടഞ്ഞു.
വ്യാജ വാർത്തകളും വിഡിയോകളും പ്രചരിക്കുന്ന സാഹചര്യത്തിലാണ് ഇംഫാൽ ഈസ്റ്റ്, വെസ്റ്റ്, തൗബാൽ, ബിഷ്ണുപുർ, കാക്ചിങ് തുടങ്ങിയ മെയ്തെയ് ഭൂരിപക്ഷ ജില്ലകളിൽ ഇന്റർനെറ്റ് നിരോധിച്ചത്. വിദ്യാഭ്യാസ സ്ഥാപനങ്ങൾക്ക് ഇന്നും നാളെയും അവധിയാണ്. ഭരണകക്ഷിയിലെ മെയ്തെയ്, നാഗാ എംഎൽഎമാരുമായി യോഗം ചേർന്നതിനു ശേഷം ഇന്നലെയും മുഖ്യമന്ത്രി ബിരേൻ സിങ് ഗവർണറെ കണ്ടു.
പരമ്പരാഗത ഭൂമി തട്ടിയെടുക്കാനുള്ള മെയ്തെയ് സംഘടനകളുടെ ശ്രമത്തിനെതിരെ അവസാനതുള്ളി രക്തവും ചിന്തുമെന്ന് കുക്കി ഗോത്ര സംഘടനകളുടെ ഏകോപനസമിതി കമ്മിറ്റി ഓൺ ട്രൈബൽ യൂണിറ്റി പ്രഖ്യാപിച്ചു. കുക്കി-സോ ഗോത്രങ്ങളെ വംശഹത്യ നടത്താനാണ് സർക്കാർ ശ്രമിക്കുന്നത്. ഇനിയൊരിക്കലും മെയ്തെയ്കൾക്കൊപ്പം സഹകരിക്കാൻ പറ്റില്ലെന്നും പ്രത്യേക ഭരണപ്രദേശം വേണമെന്നും അവർ ആവശ്യപ്പെട്ടു. ഒരാഴ്ചയ്ക്കിടയിൽ 11 പേരാണ് മെയ്തെയ് -കുക്കി വിഭാഗങ്ങൾ തമ്മിലുള്ള സംഘർഷത്തിൽ കൊല്ലപ്പെട്ടത്. അസം റൈഫിൾസിനെ പിൻവലിച്ചു; മെയ്തെയ്കളെ പ്രീതിപ്പെടുത്താനെന്ന് വിമർശനം.
