അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.പ്രശസ്ത ഗായകൻ ഹരിഹരൻ നായകനായി അഭിനയിക്കുന്ന ചിത്രമാണ് ദയ ഭാരതി. മലയാളത്തിലെ പ്രമുഖ അഭിനേതാക്കളും അഭിനയിക്കുന്ന ഈ ചിത്രത്തിൻ്റെ മ്യൂസിക്ക് ലോഞ്ചും ട്രയിലർ ലോഞ്ചും ഒക്ടോബർ എട്ടാം തീയതി ചൊവ്വാഴ്ച്ച കൊച്ചി ഗോകുലം പാർക്ക് കൺവൻഷൻ സെൻ്റെറിൽ വച്ചു നടന്നു. കെ.ജി. വിജയകുമാർ തിരക്കഥ രചിച്ച് സംവിധാനം ചെയ്യുന്ന ചിത്രമാണ് ദയാഭാരതി. തമ്പുരാൻ ഫിലിംസിൻ്റെ ബാനറിൽ ബി. വിജയകുമാർ, ചാരങ്ങാട്ട് അശോകൻ എന്നിവർ നിർമ്മിക്കുന്ന ചിത്രമാണ് ദയാ ഭാരതി .
ഈ ചിത്രത്തിലെ രണ്ടു ഗാനങ്ങളും ഹരിഹരൻ ആലപിച്ചിരിക്കുന്നു. നാഞ്ചിയമ്മയാണ് ഈ ചിത്രത്തിലെ മറ്റൊരു ഗാനമാലപിച്ചിരിക്കുന്നത്. ഇരുവരുടെയും സാന്നിധ്യം കൊണ്ട് ചടങ്ങ് കൂടുതൽ ആകർഷകമായി. കാടും കാടിൻ്റെ മനുഷ്യരും, അവിടുത്തെ പക്ഷിമൃഗാദികളുമൊക്കെ നമ്മുടെ സ്വത്താണന്നും, അവ സംരക്ഷിക്കപ്പെടേണ്ടതാണന്നും, ഈ ചിത്രത്തിലൂടെ അടിവരയിട്ടു പറയുന്നു. കാടിൻ്റെ ചൂഷണത്തിനെതിരേയുള്ള, ശക്തമായ താക്കീതും ഈ ചിത്രത്തിലൂടെ നൽകുന്നു. സാമൂഹ്യ പ്രതിബദ്ധത നിറഞ്ഞ ഒരു ചിത്രത്തിൻ്റെ ഭാഗമാകാൻ കഴിഞ്ഞതിൽ ഏറെ സന്തോഷമുണ്ടന്ന് ഈ ചടങ്ങിൽ വച്ച് ഹരിഹരൻ വ്യക്തമാക്കി.
സിനിമയിലെ രണ്ടു ഗാനങ്ങൾ പാടിപ്പിക്കുന്നതിന് വേണ്ടിയാണ് അണിയറ പ്രവർത്തകർ ആദ്യം ഹരിഹരനെ സമീപിക്കുന്നത്. പൂർണ്ണമായും കഥകേട്ട ശേഷം ചിത്രത്തിൽ അഭിനയിക്കാമെന്ന് ഹരിഹരൻ സമ്മതിക്കുകയായിരുന്നു. അതിൽ സന്തോഷമുണ്ടെന്ന് സംവിധായകൻ കെ ജി വിജയകുമാർ പറഞ്ഞു. തമിഴ് സിനിമയിലും ഹരിഹരൻ അഭിനയിച്ചിട്ടുണ്ട്. ആ ചിത്രം ആയിരിക്കും ആദ്യം തിയേറ്ററുകളിൽ എത്തുക എന്നും ഹരിഹരൻ പറയുന്നു. ജനങ്ങൾ തനിക്ക് നൽകിയ സ്നേഹത്തിന് നന്ദി പറയാൻ നാഞ്ചിയമ്മയും മറന്നില്ല.
ചിത്രത്തിൻ്റെ അണിയറ പ്രവർത്തകരും, ചലച്ചിത്ര സാമുഹ്യ പ്രവർത്തകരും, ബന്ധുമിത്രാദികളും പങ്കെടുത്ത ചടങ്ങിൽ നിർമ്മാതാവ് ബി. വിജയകുമാർ സ്വാഗതമാശംസിച്ചു. എൻ. എം. ബാദുഷ. സ്റ്റിൽജു അർജുനൻ, എന്നിവർ ആശംസകൾ നേർന്നു.
അനുക്കുട്ടൻ ഏറ്റുമാന്നൂർ നന്ദിയും പറഞ്ഞു. നിർമ്മാണ പ്രവർത്തനങ്ങൾ പൂർത്തിയായ ഈ ചിത്രം ഒക്ടോബർ ഇരുപത്തിനാലിന് പ്രദർശനത്തിനെത്തുന്നു.
content highlight: daya-bharati-music-launch-and-trailer-launch
