അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ന്യൂഡൽഹി: ഇന്ത്യ – ചൈന അതിർത്തി തർക്കമേഖലകളിൽ നിന്നും സൈന്യത്തെ പിന്തിരിക്കാനൊരുങ്ങി ഇന്ത്യ. കിഴക്കൻ ലഡാക്കിലെ ഡെപ്സാംഗ്, ഡെചോക്ക് പ്രദേശങ്ങളിലെ സൈന്യത്തെ ഇന്ത്യ പിരിച്ചുവിടും. വിദേശകാര്യമന്ത്രി എസ്.ജയശങ്കറാണ് ഇന്ത്യ – ചൈന അതിർത്തിയിലെ സേനാപിന്മാറ്റത്തിന്റെ ആദ്യഘട്ട നടപടി സ്ഥിരീകരിച്ചത്.
2020ലെ ഗാൽവാൻ താഴ്വരയിലെ എറ്റുമുട്ടലിന് പിന്നാലെ സംഘർഷങ്ങൾ വൻതോതിലുയർന്ന യഥാർഥ നിയന്ത്രണ രേഖയിൽ (LAC) യിൽ മാസാവസാനത്തോടെ പട്രോളിങ് പുനരാരംഭിക്കുമെന്നും വിദേശകാര്യ വൃത്തങ്ങൾ കൂട്ടിച്ചേർത്തു.
കഴിഞ്ഞ നാലരവർഷമായി ഈ പ്രദേശത്ത് നിർമിച്ച താത്കാലിക കെട്ടിടങ്ങളും പ്രതിരോധ നിർമിതികളും പൊളിച്ചുമാറ്റുന്നതാണ് ഇതിനായി സ്വീകരിക്കുന്ന ആദ്യ നടപടി. യുദ്ധോപകരണങ്ങളും, സൈനികവാഹനങ്ങളും സൂക്ഷിക്കാനും സൈനികർക്ക് താമസിക്കാനായും പണിത താത്കാലിക കെട്ടിടങ്ങളും ഷെഡുകളുമാണ് പൊളിച്ചുമാറ്റുന്നത്.
പ്രദേശത്തെ സേനാപിന്മാറ്റത്തിൻെ നടപടികളുടെ അവസാനഘട്ട പരിശോധന നാളത്തോടെ (29 ഒക്ടോബർ) പൂർത്തിയാകുമെന്നാണ് നിഗമനം. ചൈനയിൽ നിന്നും ഇതേ നടപടി തന്നെയാണ് ഇന്ത്യയും പ്രതീക്ഷിക്കുന്നത്. ചൈന അവസാനഘട്ട പരിശോധന നടത്തി എന്ന് ഉറപ്പാകാതെ ഇന്ത്യ പരിപൂർണ സേനാപിന്മാറ്റം അംഗീകരിക്കില്ല.
സേനാപിന്മാറ്റ നടപടികൾക്ക് പിന്നാലെ യഥാർഥ നിയന്ത്രണരേഖയിൽ ഇന്ത്യയും ചൈനയും 2020 തർക്കത്തിന് മുമ്പുണ്ടായിരുന്ന നിലയിൽ പട്രോളിങ് പുനരാരംഭിക്കും. നിലവിൽ ഈ രണ്ട് പ്രദേശങ്ങളിൽ മാത്രമാണ് സേനാപിന്മാറ്റ നടപടികൾ ആരംഭിച്ചിട്ടുള്ളത്, മറ്റ് മേഖലകളിലും സമാന നടപടികൾ സ്വീകരിക്കുന്നതിനായി ചർച്ചകൾ പുരോഗമിക്കുകയാണ്.
