അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.പ്രേമം എന്ന മലയാളത്തിലെ ഹിറ്റ് ചിത്രത്തിലൂടെ സിനിമയിലേക്ക് അരങ്ങേറ്റം കുറിച്ച നായിക നടിയാണ് സായ് പല്ലവി. ഇപ്പോള്‍ വലിയ ഫാന്‍ബേസ് ഉള്ള നടികൂടിയാണ് സായ് പല്ലവി. മലയാളം ഉള്‍പ്പെടെ നിരവധി ഭാഷാ ചിത്രങ്ങളില്‍ സായ് പല്ലവി ഇപ്പോള്‍ നായികയായി എത്തുന്നുണ്ട്. താരത്തിന്റെ സിനിമകള്‍ എല്ലാം ഇരുകൈയ്യും നീട്ടിയാണ് പ്രേക്ഷകര്‍ സ്വീകരിക്കുന്നത്. തങ്ങളുടെ വീട്ടിലെ ഒരു കുട്ടി എന്ന ഇമേജാണ് സായ് പല്ലവിക്ക് ആരാധകര്‍ നല്‍കുന്നത്. ദീപാവലിക്ക് റിലീസിന് എത്തുന്ന അമരന്‍ എന്ന ചിത്രത്തിന്റെ പ്രമോഷന്‍ തിരക്കുകളില്‍ ആണ് സായ് പല്ലവി ഇപ്പോള്‍.
ഇന്ദു റബേക്ക വര്‍ഗീസ് എന്ന കഥാപാത്രമായാണ് സായ് പല്ലവി ചിത്രത്തില്‍ എത്തുന്നത്. ഇന്ത്യന്‍ സൈനികനായിരുന്ന മേജര്‍ മുകുന്ദ് വരദരാജന്റെ ജീവിതത്തെ അടിസ്ഥാനമാക്കി ഒരുങ്ങുന്ന ചിത്രമാണ് അമരന്‍. ചിത്രത്തില്‍ ശിവകാര്‍ത്തികേയന്‍ ആണ് നായകനായി എത്തുന്നത്. എന്നാല്‍ ഇപ്പോള്‍ ഇതാ ഇന്ത്യന്‍ സൈന്യത്തെക്കുറിച്ച് മുന്‍പ് ഒരു അഭിമുഖത്തില്‍ സായ് പല്ലവി പറഞ്ഞ ചില കാര്യങ്ങളാണ് വീണ്ടും വൈറല്‍ ആയി കൊണ്ടിരിക്കുന്നത്. ഇതേ പ്രസ്താവനയ്ക്ക് അഭിമുഖം ഇറങ്ങിയ സമയത്ത് നടി സൈബര്‍ അറ്റാക്കുകള്‍ നേരിട്ടിരുന്നു. ഇപ്പോള്‍ വീണ്ടും സൈബര്‍ ഇടത്തില്‍ കുടുങ്ങിയിരിക്കുകയാണ് താരം.
പഴയ അഭിമുഖ വീഡിയോ വൈറല്‍ ആയതിന് പിന്നാലെ സമൂഹ മാധ്യമങ്ങളില്‍ സായ് പല്ലവിക്കെതിരെ ബോയ്‌ക്കോട്ട് ക്യാംപെയിന്‍ ആണ് ഇപ്പോള്‍ നടക്കുന്നത്. ഇന്ത്യന്‍ സൈന്യത്തെ ഇകഴ്ത്തി സംസാരിച്ച സായ് പല്ലവിക്ക് ഇന്ത്യന്‍ ആര്‍മിയെ പ്രതിപാദിക്കുന്ന ചിത്രത്തില്‍ അഭിനയിക്കാന്‍ യോഗ്യതയില്ലന്നാണ് ബോയ്‌ക്കോട്ട് ക്യാംപെയിനിങ് നടത്തുന്നവരുടെ വാദം.
ഇന്ത്യന്‍ സൈന്യം പാകിസ്താനിലെ ജനങ്ങളെ ഭീകരരായാണ് കാണുന്നതെന്നും പാക് ജനത തിരിച്ചും അങ്ങനെയാണ് കാണുന്നതെന്നുമാണ് അഭിമുഖത്തില്‍ സായ് പല്ലവി അന്ന് പറഞ്ഞത്. ഏതുതരത്തിലുള്ള അക്രമവും തന്നെ സംബന്ധിച്ച് ശരിയായി തോന്നുന്നില്ലെന്നും അതിലൂടെ പ്രശ്‌നങ്ങള്‍ പരിഹരിക്കാന്‍ സാധിക്കില്ലെന്നും സായ് പല്ലവി പറഞ്ഞു. നക്‌സലുകളെക്കുറിച്ചുള്ള ചോദ്യത്തിന് മറുപടി നല്‍കുന്നതിനിടെയായിരുന്നു നടിയുടെ ഈ പരാമര്‍ശം. കശ്മീരി പണ്ഡിറ്റുകളുടെ കൂട്ടക്കൊലയും പശുവിന്റെ പേരിലുള്ള ആള്‍കൂട്ട കൊലപാതകവും തമ്മില്‍ വ്യത്യാസമില്ലെന്നും സായ്പല്ലവി പറഞ്ഞത് നേരത്തേ ചര്‍ച്ചയായിരുന്നു. ഞാന്‍ വളര്‍ന്നത് ഏതെങ്കിലും ഒരു പ്രസ്ഥാനത്തോട് രാഷ്ട്രീയമായി ചാഞ്ഞുനില്‍ക്കുന്ന കുടുംബത്തിലല്ലെന്നും ഇടത് വലത് എന്ന് കേട്ടിട്ടുണ്ട്. ഏതാണ് ശരിയെന്ന് അറിയില്ലെന്നും സായ് പല്ലവി അന്ന് പറഞ്ഞിരുന്നു.
ഈ വീഡിയോ സോഷ്യല്‍ മീഡിയയില്‍ മുന്‍പ് ചര്‍ച്ചയായതിനെ തുടര്‍ന്ന് സായ് പല്ലവി തന്നെ നേരിട്ടെത്തി വിശദീകരണം നല്‍കിയിരുന്നു. താന്‍ ഒരു കമ്മ്യൂണിറ്റിയെയും ആക്ഷേപിക്കാന്‍ ഉദ്ദേശിച്ചിട്ടില്ലെന്നും അഭിമുഖത്തിലെ ഒരു ഭാഗം മാത്രം എടുത്ത് പ്രചരിപ്പിക്കുന്നതില്‍ വിഷമമുണ്ടെന്നും സായ് പല്ലവി പറഞ്ഞു.
