അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.റീ റിലീസിന് ഒരുങ്ങി ബോളിവുഡിന്റെ സൂപ്പര്‍ ഹിറ്റ് ചിത്രം. ഷാരൂഖ് ഖാനും സല്‍മാന്‍ ഖാനും പ്രധാന കഥാപാത്രങ്ങളായി എത്തിയ കരണ്‍ അര്‍ജുന്‍ എന്ന ചിത്രമാണ് ഇത്തവണ റീ റിലീസ് ചെയ്യുന്നത്. ചിത്രം നവംബര്‍ 22ന് ലോകമെമ്പാടുമുള്ള തീയേറ്ററുകളില്‍ എത്തും. 30 വര്‍ഷത്തിനുശേഷമാണ് പ്രേക്ഷകരിലേക്ക് വീണ്ടും കരണ്‍ അര്‍ജുന്‍ എത്തുന്നത്. കജോള്‍, രാഖി, മംമ്ത കുല്‍ക്കര്‍ണി, അമരീഷ് പുരി, ജോണി ലെവര്‍ തുടങ്ങിയവരാണ് ചിത്രത്തിലെ മറ്റ് അഭിനേതാക്കള്‍.
1995 ല്‍ ആയിരുന്നു കരണ്‍ അര്‍ജുന്‍ റിലീസ് ചെയ്തത്. ചിത്രത്തിന്റെ റീ റിലീസിനോട് അനുബന്ധിച്ച് അണിയറ പ്രവര്‍ത്തകര്‍ പുതിയ ടീസര്‍ പുറത്തുവിട്ടിട്ടുണ്ട്. പുതിയ ടീസറിന് വലിയ ജനപ്രീതിയാണ് ലഭിച്ചുകൊണ്ടിരിക്കുന്നത്. ആരാധകര്‍ ഇരുകൈയും നീട്ടിയാണ് പുതിയ ടീസര്‍ ഏറ്റെടുത്തത്. രാജേഷ് റോഷന്‍ സംഗീത സംവിധാനം ചെയ്ത ചിത്രത്തിലെ ഗാനങ്ങളും വളരെയധികം ശ്രദ്ധ നേടിയിരുന്നു.
ദില്‍വാലെ ദുല്‍ഹനിയ ലേ ജായേംഗേ എന്ന സിനിമയ്ക്ക് ശേഷം ഏറ്റവും കൂടുതല്‍ ബോക്‌സ് ഓഫീസില്‍ കളക്ഷന്‍ നേടിയ ചിത്രമാണ് ഇപ്പോള്‍ റീ റിലീസിന് ഒരുങ്ങുന്നത്. കരണ്‍ അര്‍ജുനിലെ ഷാരൂഖിന്റെയും സല്‍മാന്റെയും അമരീഷ് പുരിയുടെയും ഒക്കെ കഥാപാത്രങ്ങള്‍ ഇന്നും പ്രേക്ഷകരുടെ മനസ്സില്‍ നിറഞ്ഞു നില്‍ക്കുകയാണ്. റോക്ക് സ്റ്റാര്‍, സിന്ദഗി നാമിലേംകി ദൊബാര, ചക്ക് ദേ ഇന്ത്യ, ലൈലാ മജ്‌നു തുടങ്ങിയ സിനിമകള്‍ ബോളിവുഡില്‍ ഇതിനുമുന്‍പ് റീ റീലീസ് ചെയ്തിരുന്നു. ഈ ചിത്രങ്ങള്‍ക്ക് ഒക്കെ വലിയ പ്രതികരണമായിരുന്നു ലഭിച്ചതും.
